مادەنيەت جانە ۇلتتىق سالت-ءداستۇر كۇنىنە وراي ورداباسى اۋدانى ورتالىعىنداعى «سامۇرىق» اللەياسىندا ءبىر مەزەتتە 50 بالدىرعاننىڭ تۇساۋكەسەر ءراسىمى ءوتتى. اۋدان اكىمدىگى, سونداي-اق زيالى قاۋىم وكىلدەرى مەن ارداگەرلەر سالت-داستۇرگە ساي بالدىرعانداردىڭ تۇساۋىن كەسىپ, اق باتالارىن بەردى. قازاق حالقى ءۇشىن تۇساۋكەسەر – بالا ومىرىندەگى ماڭىزدى ءارى تامىرى تەرەڭ داستۇرلەردىڭ ءبىرى. بۇل ءراسىم بالانىڭ ءومىر جولى اشىق, قادامى بەرىك, بولاشاعى جارقىن بولسىن دەگەن ىزگى نيەتتەن تۋعان. جينالعان كوپشىلىك بالدىرعاندارعا اق تىلەگىن ارناپ, جىلى لەبىزىن ءبىلدىردى.
ال تۇركىستان قالالىق مادەنيەت ۇيىندە ونەرپازدار قوناقتاردى «اۋىلدىڭ التى اۋىزى», «جاراپازان» سىندى حالىق اندەرىمەن قارسى الدى. سونداي-اق «ۋگايىم-اي» اجەلەر حورى ونەر كورسەتىپ, كەلۋشىلەرگە «ناۋرىز دامدەرى» ۇلتتىق تاعامدارىن ۇسىندى. «ياسسى» حالىقتىق فولكلورلىق ءانسامبلى ء«ار ۇلت اۋەندەرى» كومپوزيتسياسىن ورىنداپ, ق.امانباەۆ «دومبىرا» ءانىن شىرقادى. تەاترلاندىرىلعان كورىنىستە «كۇن مەن ءتۇن» بەينەلەرى ارقىلى تابيعاتتىڭ جاڭارۋىن بەينەلەيتىن ساحنالىق قويىلىم قويىلدى. سونىمەن قاتار ناۋرىز ارۋى, ۇماي انا, قىدىر اتا بەينەلەرى قاتىسقان «تازارۋ ءراسىمى» كورەرمەن نازارىنا ۇسىنىلدى.
سونىمەن قاتار مەرەكەلىك كەش بارىسىندا «قارا جورعا», ء«از ناۋرىز», «بالاۋسا», «اق تىلەك» اندەرى ورىندالىپ, «ەتنوستايل», «سەمسەر» توپتارى مەن باسقا دا ونەرپازدار حالىق اندەرىنەن پوپۋرري شىرقادى. ءىس-شارا بارلىق قاتىسۋشىنىڭ ورىنداۋىنداعى «ناۋرىز دۋمان» انىمەن قورىتىندىلاندى.
تۇركىستان وبلىسى
