Global Times باسىلىمىنىڭ حابارلاۋىنشا, بۇل تۋرالى 16 ناۋرىزدا وتكەن بريفينگتە قىتاي ءسىم-ءنىڭ رەسمي وكىلى لين تسزيان مالىمدەدى. ءباسپاسوز كونفەرەنتسياسى بارىسىندا قىتايدىڭ ورتالىق تەلەۆيدەنيەسىنىڭ ءجۋرناليسى 15 ناۋرىزدا قازاقستاندا وتكەن جالپىحالىقتىق رەفەرەندۋمعا قىتاي تاراپىنىڭ باعاسى تۋرالى سۇراق قويعان.
لين تسزيان قازاقستان رەفەرەندۋمدى ءساتتى وتكىزگەنىن اتاپ ءوتىپ, قىتاي تاراپى وسىعان بايلانىستى قۇتتىقتاۋىن بىلدىرەتىنىن ايتتى. ونىڭ سوزىنشە, قىتاي دوستاس كورشى جانە جان-جاقتى ستراتەگيالىق سەرىكتەس رەتىندە قازاقستاننىڭ ۇزاق مەرزىمدى تۇراقتىلىق پەن قوعامدىق وركەندەۋدى ساقتاپ وتىرعانىن قۋانىشپەن قابىلدايدى.
سونىمەن قاتار ول بەيجىڭدە قاسىم-جومارت توقاەۆ باسشىلىعىمەن قازاقستان مەملەكەتتىك قۇرىلىستا جاڭا ەلەۋلى جەتىستىكتەرگە قول جەتكىزەتىنىنە سەنىمدى ەكەنىن جەتكىزدى. سونداي-اق «ادىلەتتى قازاقستان» قۇرۋ ماقساتى تابىستى جۇزەگە اساتىنىنا سەنىم ءبىلدىرىلدى.
قىتاي ءسىم وكىلى قىتاي قازاقستانمەن ەكىجاقتى قارىم-قاتىناستاردى دامىتۋعا ۇلكەن ءمان بەرەتىنىن ايتىپ, ءوزارا ءتيىمدى ىنتىماقتاستىقتى نىعايتىپ, قازاق-قىتاي سەرىكتەستىگىن جاڭا دەڭگەيگە كوتەرۋگە دايىن ەكەنىن اتاپ ءوتتى.
ايتا كەتەيىك, بۇعان دەيىن مەملەكەت باسشىسىنا رەسپۋبليكالىق رەفەرەندۋم ناتيجەسىنە وراي قۇتتىقتاۋ جەدەلحاتتارى ءتۇسىپ جاتقانىن حابارلاعان ەدىك.
