تۇتاس ەل اۋماعىنان حابار تاراتىپ, تاۋەلسىز بايقاۋشىلار مەن باق وكىلدەرىن توعىستىرعان الاڭدا رەفەرەندۋم كۇنى باس-اياعى ءتورت بريفينگ ءوتتى. شتابتىڭ تىكەلەي ەفيرى تاڭعى ساعات 7.00-دە باستالىپ, داۋىس بەرۋ اياقتالىپ, الدىن الا قورىتىندىلار جاريالانعانعا دەيىن 11 ساعات ۇزدىكسىز تىكەلەي ەفير جالعاستى.
ەلدەگى ەڭ ءىرى مەگاپوليستە ساياسي ناۋقان بەلسەندى باستالعانىن ايتۋىمىز قاجەت. ءدال وسى كۇنى كامەلەتتىك جاسقا ەندى اياق باسقان تۇرعىن مەن عاسىر عۇمىردى ەڭسەرگەن كەيۋانا دا داۋىس بەرۋ الاڭىنان تابىلدى. اقپاراتتىق اشىقتىقتى قامتاماسىز ەتۋ ماقساتىندا ۇيىمداستىرىلعان شتاب جۇمىسى كەشكە دەيىن تىنعان جوق. قوعامدىق كوممۋنيكاتسيالار الاڭىنا ءار ساعات سايىن ساياسي ساراپشىلار مەن تاۋەلسىز بايقاۋشىلار كەلىپ رەفەرەندۋمنىڭ ءوتۋ بارىسى تۋرالى تىڭ ماعلۇماتپەن ءبولىسىپ وتىردى. داۋىس بەرۋ ۋچاسكەلەرى اشىلعان ساتتەن باستاپ تىكەلەي قوسىلىمدارعا الماتى جانە شىمكەنت قالالارى, سونداي-اق جەتىسۋ, سولتۇستىك قازاقستان جانە باتىس قازاقستان وبلىستارى (ورال قالاسى) قوسىلدى. كەشكە دەيىن وزگە دە وڭىرلەرمەن بايلانىس ورنادى.
– اقپاراتتىق شتابتىڭ نەگىزگى مىندەتى رەفەرەندۋم بارىسى تۋرالى قوعامدى جەدەل ءارى ناقتى اقپاراتپەن قامتاماسىز ەتۋ, سونداي-اق مۇمكىن بولاتىن اقپاراتتىق ارانداتۋلار مەن جالعان حابارلامالاردىڭ تارالۋىنا جول بەرمەۋ بولدى. باق وكىلدەرىمەن بىرلەسە جۇمىس ىستەي وتىرىپ, جاۋاپتى كەزەڭنىڭ ءار ءساتىن ويداعىداي وتكىزدىك. رەفەرەندۋم بارىسىنداعى جاڭالىقتار تىكەلەي ەفير ارقىلى تۇرعىندارعا جەدەل جەتىپ وتىردى, – دەيدى «Independ.kz» اقپاراتتىق اگەنتتىگىنىڭ باس رەداكتورى رافاەل گاسانوۆ.
بريفينگكە قاتىسۋشىلار الماتى تۇرعىندارىنىڭ ەل ومىرىندەگى ماڭىزدى ساياسي ۋاقيعاعا ورتاشا بەلسەندى ۇلەس قوسقانىن, داۋىس بەرۋشىلەردىڭ لەگى تۇستەن كەيىن قارقىن العانىن مالىمدەدى. قالا اۋماعىندا بارلىعى 2 مىڭنان اسا تاۋەلسىز بايقاۋشى رەفەرەندۋمنىڭ ءار ءساتىن قالت جىبەرمەي قاداعالاعان بولسا, شاھاردىڭ بارلىق اۋدانىنان 80-گە تارتا مامان سوڭعى اقپاراتتاردى جەدەل شتابقا جولداپ وتىردى.
– ءبىزدىڭ 1 308 تاۋەلسىز بايقاۋشىمىز ۋچاسكەلەردە جۇمىس ىستەدى. سونىمەن قاتار 654 كاپيتان باقىلاۋ ۇدەرىسىن ۇيلەستىردى. بۇعان قوسا ءموبيلدى توپتار دا بولدى. باقىلاۋ بارىسىندا قانداي دا ءبىر زاڭعا تومپاق ارەكەت تىركەلگەن جوق, – دەدى بريفينگكە قاتىسقان اۋعان ارداگەرلەرى ۇيلەستىرۋ كەڭەسىنىڭ مۇشەسى ماقسات مامادياروۆ.
«ەر ازامات» قوعامدىق بىرلەستىگىنىڭ وكىلى الينا كان داۋىس بەرۋ ۇدەرىسىنىڭ بەل ورتاسىندا جۇرگەن بايقاۋشىلاردان ساعات سايىن اقپارات الىپ وتىرعانىن, رەفەرەندۋمعا دايىندىق كەزەڭىندە بايقاۋشىلاردىڭ بىلىكتىلىگىن ارتتىرۋ باعىتىنداعى جۇمىس جۇيەلى جۇرگىزىلگەنىن, ولار رەفەرەندۋم اياقتالىپ, داۋىستاردى ساناۋ كەزىندە دە سوندا بولعانىن اتاپ ءوتتى.
سونداي-اق قوعام قايراتكەرى اندرەي اندرەەۆ قوعامنىڭ ساياسي بەلسەندىلىگى مەن ازاماتتىق جاۋاپكەرشىلىگى ارتقانىن, رەفەرەندۋم بارىسىنىڭ اشىقتىعى بارىنشا ساقتالعانىن جەتكىزدى.
داۋىس بەرۋ ۇدەرىسى اياقتالعاننان كەيىن تاۋەلسىز بايقاۋشىلاردىڭ اقپاراتتىق شتابىنىڭ قورىتىندى بريفينگى ءوتتى. شتابقا 30-دان اسا تاۋەلسىز جۋرناليست تارتىلعان. ەفير بارىسى مەن جەدەل قوسىلىمداردى ميلليوننان اسا پايدالانۋشى تاماشالاعان بولسا, شتاب الاڭىنان تاراعان مالىمەتتەر 20-دان اسا بۇقارالىق اقپارات قۇرالىندا جاريالاندى.
شتاب وكىلدەرىنىڭ ايتۋىنشا, قوعامدىق-ساياسي ۇدەرىستەر تۋرالى وسىنداي جەدەل اقپارات بەرۋ فورماتى اشىقتىقتى ارتتىرىپ, قوعاممەن ەركىن ديالوگ ورناتۋ مۇمكىندىكتەرىن كەڭەيتۋگە ىقپال ەتەدى.
الماتى
