ازاماتتىق ماسەلەلەر جونىندەگى كوميسسيانىڭ كەزەكتى وتىرىسى ءوتتى

استانا. 13 مامىر. بۇگىن مەملەكەتتىك حاتشى گۇلشارا ابدىقالىقوۆانىڭ توراعالىعىمەن پرەزيدەنت جانىنداعى ازاماتتىق ماسەلەلەر جونىندەگى كوميسسيانىڭ كەزەكتى وتىرىسى ءوتتى. بۇل تۋرالى akorda.kz حابارلادى. وتىرىستا قازاقستان ازاماتتىعىن الۋ جانە ودان شىعۋ ماسەلەلەرى قارالدى. مەملەكەتتىك حاتشى ەگەمەندىك جىلدارى 956 مىڭنان استام ادام قازاقستان ازاماتتىعىن العانىن, ونىڭ باسىم كوپشىلىگى سوڭعى جىلداردىڭ ۇلەسىنە تيەتىنىن اتاپ ءوتتى. گۇلشارا ابدىقالىقوۆا قازاقستان ازاماتتىعىن الۋعا نيەتتەنگەن الەمنىڭ ءارتۇرلى ەلدەرىندەگى ادامدار سانىنىڭ ۇزدىكسىز وسە ءتۇسۋى ەلباسى نۇرسۇلتان نازارباەۆتىڭ ستراتەگيالىق سىندارلى, الەۋمەتتىك تارتىمدى جانە حالىقارالىق دەڭگەيدە تانىلعان مەملەكەتتىك ساياساتىنىڭ جارقىن كورىنىسى ەكەنىن اتاپ كورسەتتى. مەملەكەت باسشىسى جارلىققا قول قويعاننان سوڭ الىس جانە تاياۋ شەت ەلدەردەن كەلگەن ءتۇرلى ۇلتتىڭ تاعى 570 وكىلى قازاقستان ازاماتى اتاناتىن بولادى. كوميسسيا وتىرىسىنىڭ قورىتىندىسى بويىنشا ءتيىستى شەشىمدەر مەن ۇسىنىمدار قابىلداندى. ەلامان قوڭىر. دەرەك, سۋرەت: akorda.kz.