وتكەن جىلى جازدا استانا قالاسىندا 31 جاستاعى ءسانيا ءالىمجانوۆا قىرشىننان قيىلدى. وعان بۇرىنعى جىگىتى كوكىرەك تۇسىنان جانە ىشىنەن ءۇش رەت پىشاق سوققىسىن جاساعان. سول ساتتە ونىڭ جانىندا 7 جانە 10 جاستاعى ەكى بالاسى بولعان. قاندى قىلمىستان كەيىن ەر ادام 25-قاباتتان سەكىرىپ كەتكەنىمەن ءتىرى قالدى. قازىر بۇل وقيعا بويىنشا سوت پروتسەسى ءوتىپ جاتىر, ونى سۋديا ايجان كۋلباەۆا جۇرگىزىپ جاتىر.
30 جەردەن پىشاق سۇققان: 7 بالانىڭ اكەسىن ءولتىردى دەگەن كۇدىكپەن ايەلى مەن ەنەسى ۇستالدى
الايدا, قوعامداعى تۇرمىستىق زورلىق‑زومبىلىققا قارسى «نەمولچي» ۇيىمى تەرگەۋ بارىسىنا كۇمان كەلتىرىپ وتىر. ۇيىمنىڭ مالىمدەۋىنشە كۇدىكتى شامامەن ەكى ساعاتتان سوڭ ەسىن جيا باستاعان جانە بىرقاتار قۇجاتقا قول قويعان. سونىمەن قاتار, تەرگەۋ جانە كريميناليستيكا قىزمەتتەرى تەرگەۋ ەكسپەريمەنتىن وتكىزبەگەن, باسپالداق الاڭدارىنان نەمەسە قورشاۋلاردان قان ۇلگىلەرى الىنباعان.
«2025 جىلعى 19 ماۋسىمدا ەر ادام بۇرىنعى قىزىنىڭ ۇيىنە پىشاقپەن كەلگەن. قىز پوليتسيا شاقىرعان. بىراق جىگىت ونى ۆانناعا دەيىن سۇيرەپ اپارعان. بالالاردىڭ ايقايىنا قاراماستان ول وعان 3 جەردەن پىشاق جاراقاتىن سالعان. بالالار قورىققانىنان دالىزگە شىعىپ, ەسىكتەردى قاتتى قاعىپ, كورشىلەردى شاقىرعان. كورشى پاتەردەن ەر ادام كەلىپ قىزدى قىلمىسكەردىڭ قولىنان اجىراتۋعا تىرىستى. بىراق ول جارالانعان قىزدى جۇدىرىقپەن سوعۋدى جالعاستىرا بەرگەن. ءسانيا كوپ قان جوعالتىپ, قايتىس بولدى», دەدى «نەمولچي» قورىنىڭ جەتەكشىسى دينا ءتاڭسارى.
ءسانيانىڭ اپكەسى مەن اناسىنىڭ ايتۋىنشا ول سۇلۋلىق سالاسىندا جۇمىس ىستەگەن, وتە ۇنەمشىل بولعان, ادال ەڭبەكپەن تاپقان اقشاسىنا پاتەر ساتىپ العان. بالالارىنىڭ تاربيەسىمەن اينالىسقان, ولاردى بەس ءتۇرلى سەكتسياعا جازدىرعان. ول كۇدىكتىمەن زاڭدى نەكەدە تۇرماعان. ونىڭ ويىنقۇمار ەكەنىن جانە موينىندا 10 ميلليون قارىزى بار ەكەنىن بىلگەننەن كەيىن قارىم-قاتىناستى توقتاتپاقشى بولعان.
وقيعادان كەيىن ەر ادام ءۇيدىڭ توتەنشە جاعداي كەزىندە شاتىرعا شىعاتىن قوسالقى ساتىسىنان سەكىرگەن. ول كولىكتىڭ ۇستىنە قۇلاپ, اۋىر جاراقاتتار الىپ, اۋرۋحاناعا جەتكىزىلدى. دارىگەرلەر ونىڭ ميى جاراقاتتانعانىن, ومىرتقاسى مەن بىرنەشە سۇيەگى سىنعانىن انىقتادى.
سوت ساراپتاماسىندا قىلمىس جاساعان جىگىتتىڭ كۇيزەلىس جاعدايىندا بولعانى جانە سول ساتتە ارەكەتتەرىن تولىق تۇسىنبەگەنى ايتىلعان. بۇل كۇدىكتىنى ەسى دۇرىس ەمەس دەپ تانۋعا نەگىز بولۋى مۇمكىن. سول سەبەپتى ءسانيانىڭ وتباسى مەن جاقىندارى سوت ونى ەسىنەن اداسقان دەپ تانىپ, ءماجبۇرلى پسيحياتريالىق ەمدەۋ مەكەمەسىنە جىبەرۋى مۇمكىن دەپ الاڭدايدى.
ال قوعام بەلسەندىلەرى مەن ساراپشىلار: «كۇدىكتى پىشاقتى 25‑قاباتتان لاقتىرىپ, سودان كەيىن كامەرالاردى اينالىپ ءوتىپ, شامامەن 5‑قاباتتان سەكىرگەن بولۋى مۇمكىن» دەگەن بالامالى نۇسقانى كوتەردى. ولار جوعارعى سوتتان ايىپتالۋشىنىڭ جاعدايىن مۇقيات زەرتتەپ, قوسىمشا كەشەندى تاۋەلسىز ساراپتاما تاعايىنداۋدى سۇراپ وتىر.
ايتا كەتەيىك, ەلىمىزدە تۇرمىستىق زورلىق جانە ايەلدەرگە قارسى زورلىق فاكتىلەرى قوعامدا وتكىر ماسەلە رەتىندە قاراستىرىلىپ كەلەدى. UN Women ۇيىمىنىڭ مالىمەتىندە, الەم بويىنشا كۇن سايىن 140‑تان استام ايەل جاقىن ادامدارىنىڭ قولىنان قازا تاباتىنى ايتىلعان.
