فوتو: اقوردا
«قازىرگى تارتىپكە سايكەس جەرگىلىكتى بيۋدجەت بەكىتىلەتىن كەزدە دەپۋتاتتارعا جالپى مالىمەت قانا ۇسىنىلادى, ءتيىستى تۇسىنىكتەمەلەر بەرىلمەيدى. سونداي-اق بيۋدجەت جوباسى ءماسليحاتتىڭ قاراۋىنا سوڭعى ساتتە جولدانادى. سول سەبەپتى ونى دەپۋتاتتار ءۇستىرت قاراپ, قىسقا مەرزىم ىشىندە قابىلداۋىنا تۋرا كەلەدى. سونىڭ سالدارىنان قاراجات حالىقتىڭ ناقتى قاجەتتىلىگىن وتەمەيتىن, ءتيىمسىز جوبالارعا جۇمسالىپ كەتەتىن جاعدايلار پايدا بولادى. ەشكىمگە ناقتى جاۋاپكەرشىلىك جۇكتەلمەگەن سوڭ, ماسەلە سۇراۋسىز قالادى. دەمەك جەرگىلىكتى دەڭگەيدە ءتيىستى باقىلاۋ جۇرگىزىلمەيدى دەگەن ءسوز. سونىڭ ءبارى جەرگىلىكتى تۇرعىنداردىڭ نارازىلىعىن تۋعىزادى. مۇنداي كەلەڭسىزدىككە توسقاۋىل قويۋ ءۇشىن وكىلدى ورگان بيۋدجەتتى جوسپارلاۋ ۇدەرىسىنە اۋەل باستان اتسالىسۋى كەرەك. بىراق بيۋدجەت بويىنشا بارلىق تالقىلاۋ تەك مەملەكەت پەن وڭىرلىك مۇددەلەرگە نەگىزدەلۋگە ءتيىس, لوببيزمگە نەمەسە پوپۋليزمگە جول بەرمەۋ كەرەك. باستى ۇستانىم – ءبارى دە حالىق ءۇشىن», دەدى مەملەكەت باسشىسى.
سونداي-اق مەملەكەت باسشىسى ءاكىمدىكتەگى بيۋدجەتتىك كوميسسيانىڭ قۇرامىنا ءبىلىمدى, بەدەلدى ءماسليحات دەپۋتاتتارىن قوسقان دۇرىس ەكەنىن اتاپ ءوتتى. پرەزيدەنت وسىلايشا, جۇمىستىڭ ساپاسىن, قاراجاتتىڭ ءتيىمدى جۇمسالۋىن قاداعالاۋعا بولاتىنىن جەتكىزدى.
«قىرۋار قارجىنى وڭدى-سولدى شاشىپ, پايداسى جوق باستامالارعا جۇمساۋدى دوعارۋ قاجەت. اكىمدەر رەسپۋبليكالىق بيۋدجەتتەن بەرىلەتىن ءتۇرلى دوتاتسياعا سەنىپ وتىرا بەرمەۋى كەرەك. ماسىلدىق ۇعىمىنان ءبىرجولا ارىلۋ قاجەت. جەرگىلىكتى بيلىك وكىلدەرى تابىستى كوبەيتۋ ءۇشىن بەلسەنە جۇمىس ىستەۋگە ءتيىس. بيۋدجەت قابىلداناتىن كەزدە «قانشا جۇمىس ورنى اشىلادى, جەكە ينۆەستيتسيا تارتىلا ما, بيزنەستىڭ دامۋىنا قانداي جاعداي جاسالادى, قانشا سالىق تولەنەدى؟» دەگەن ساۋالدارعا ناقتى جاۋاپ بەرىلۋى كەرەك. كۇرىشتى كۇرمەكتەن اجىراتا ءبىلۋ قاجەت. بۇل – بارلىق دەڭگەيدەگى اكىمدەر مەن ءماسليحاتتار دەپۋتاتتارى, ەڭ الدىمەن, مەملەكەت مۇددەسىنە قىزمەت ەتەتىن ءبىر ۇجىم, ءبىر كوماندا دەگەن ءسوز. بارلىق ايماقتىڭ ءماسليحاتتارى مەن اكىمدىكتەرى بىرلەسىپ, بيۋدجەتتىڭ ءار تەڭگەسىنىڭ ەل يگىلىگىنە جۇمسالۋىن قامتاماسىز ەتۋگە مىندەتتى», دەدى قاسىم-جومارت توقاەۆ.
پرەزيدەنت: ايماقتار ءوز بيۋدجەتىن مۇقيات جوسپارلاپ, تابىسىن ارتتىرۋعا باسا ءمان بەرۋگە ءتيىس
