فوتو: stan.kz
سالاداعى قوماقتى تابىس 2022 جىلى تىركەلگەن. سول كەزدە قۇمار ويىندارىنداعى قىزمەت كولەمى – 553,7 ملرد تەڭگەگە دەيىن جەتىپ, ءبىر جىلدىڭ ىشىندە 7,5 ەسەگە ارتقان. 2023-2025 جىلدارى بەلگىلى ءبىر قۇبىلمالىلىق بايقالعانىمەن, نارىق جىل سايىن شامامەن 470-480 ملرد تەڭگە دەڭگەيىندە تۇراقتاعان. بۇل ون جىل بۇرىنعى كورسەتكىشتەن 20 ەسە كوپ ەكەنى بەلگىلى بولىپ وتىر.
finprom.kz زەرتتەۋىنشە, سوڭعى جىلدارى نارىق قۇرىلىمى دا تۇبەگەيلى وزگەرگەن. بۇرىن نەگىزگى ءرولدى ورتا جانە ءىرى وپەراتورلار اتقارسا, 2025 جىلعا قاراي نارىق كولەمىنىڭ 82%-ىن, ياعني 388,3 ملرد تەڭگەنى شاعىن كاسىپورىندار قامتاماسىز ەتكەن. ال 2019 جىلى شاعىن كاسىپورىنداردىڭ ۇلەسى نەبارى 11,5% نەمەسە 1,5 ملرد تەڭگە عانا بولعان.
116 ملن تەڭگە مەن ZEEKR كولىگى تاركىلەندى: الماتىدا قۇمار ويىندارىن ۇيىمداستىرعاندارعا ۇكىم شىقتى
ماسەلەنىڭ اۋقىمى تەك كومپانيالاردىڭ قارجىلىق ەسەپتەرىمەن عانا ەمەس, الەۋمەتتىك ستاتيستيكامەن دە ايقىندالادى. قارجى ۆيتسە-ءمينيسترى ەرجان ءبىرجانوۆتىڭ ايتۋىنشا, شامامەن 700 مىڭ قازاقستان ازاماتى تۇراقتى تۇردە ءباس تىگەدى.
سونىمەن قاتار قارجى نارىعىن رەتتەۋ جانە دامىتۋ اگەنتتىگى قۇمار ويىندارعا بەلسەندى قاتىسۋ ەكىنشى دەڭگەيلى بانكتەردەن نەسيە الۋ مۇمكىندىگىنە اسەر ەتۋى مۇمكىن ەكەنىن اتاپ ءوتتى. ەگەر بۋكمەكەرلىك شوتتارعا تۇراقتى اۋدارىمدار بايقالسا, بانك قارىز الۋشىنىڭ قارجىلىق جۇكتەمەسىن باعالاۋ كەزىندە ونى ەسەپكە الۋى مۇمكىن.
شەتەلدىك كومپانيالار نارىقتىڭ ايتارلىقتاي ۇلەسىن ءالى دە قامتىپ وتىر. 2024 جىلى ولاردىڭ ۇلەسىنە – 296,2 ملرد تەڭگە تيەسىلى بولدى. 2025 جىلى بۇل كورسەتكىش – 217,2 ملرد تەڭگەگە دەيىن ازايعانىمەن, كاپيتال حالىقارالىق ءباس تىگۋ پلاتفورمالارى ارقىلى ەلدەن ءالى دە بەلسەندى تۇردە شىعىپ جاتىر.
رەسمي تىركەلگەن 700 مىڭ بەلسەندى ويىنشى ماسەلەنىڭ تەك كوزگە كورىنەتىن بولىگى عانا. بۇل – زاڭدى, ليتسەنزياسى بار وپەراتورلارمەن جۇمىس ىستەيتىن ادامدار. ال, شىن مانىندە باسكە بەيىم اۋديتوريا الدەقايدا كەڭ. سالادا زاڭدى نارىقپەن قاتار «كولەڭكەلى» سەگمەنت تە قارقىندى ءوسىپ كەلەدى. ليتسەنزياسى جوق بۋكمەكەرلىك كەڭسەلەر مەن شەتەلدىك يۋريسديكتسيالاردا تىركەلگەن ونلاين-كازينولار قازاقستاننىڭ قۇقىقتىق كەڭىستىگىنەن تىس جۇمىس ىستەيدى جانە سالىق تولەمەيدى, ويىنشىلاردى قورعاۋ تالاپتارىن ساقتامايدى.
ولار قىزمەتىن بلوگەر, ينفليۋەنسەرلەر ارقىلى جارنامالايدى. جەكە ۇسىنىس تاساسىنا جاسىرىلعان قۇمار ويىن جارناماسى Instagram, TikTok جانە Telegram پلاتفورمالارى ارقىلى ميلليونداعان قولدانۋشىلاردى قامتىپ وتىر. مۇنداي فورمات وڭاي اقشا تابۋ يلليۋزياسىن قالىپتاستىرىپ, اسىرەسە 30 جاسقا دەيىنگى جاستارعا قاتتى اسەر ەتەدى. الەۋمەتتانۋشىلاردىڭ دەرەگىنشە, ويىنعا تاۋەلدى ادامداردىڭ باسىم بولىگى ءدال وسى جاس ساناتىنا جاتادى.
ەلىمىزدە بلوگەرلەرگە قۇمار ويىنداردى جارنامالاۋعا زاڭ جۇزىندە تىيىم سالىنعان, ال زاڭ بۇزۋشىلار جاۋاپكەرشىلىككە تارتىلۋى مۇمكىن. الايدا بۇل شەكتەۋدى اينالىپ ءوتۋ وڭاي بولىپ وتىر. مۇنداي جارنامانىڭ نەگىزگى بولىگى رەسەي مەن تمد-نىڭ باسقا ەلدەرىندەگى بلوگەرلەر ارقىلى تارالادى, ال ولارعا قازاقستان زاڭناماسى جۇرمەيدى. ولاردىڭ كونتەنتىن قازاقستاندىق اۋديتوريا ەش كەدەرگىسىز تۇتىنادى, ال ليتسەنزياسى جوق پلاتفورمالار جەرگىلىكتى زاڭداردىڭ ەشقايسىسىن بۇزباي-اق جاڭا ويىنشىلارعا يە بولادى.
جارنامانى قاتاڭ رەتتەۋ, ليتسەنزياسى جوق پلاتفورمالاردى بۇعاتتاۋ جانە ويىنعا تاۋەلدى ادامدارعا ناقتى قولداۋ كورسەتۋ سياقتى كەشەندى شارالار قابىلدانباسا, 700 مىڭ ويىنشى دەگەن كورسەتكىش الداعى ۋاقىتتا ودان ءارى وسە بەرۋى مۇمكىن.
