رابيعا ەركەبايقىزى قۇقىق قورعاۋ سالاسىنىڭ سان تارابىندا تەر توگىپ, بولىمشە باستىعى لاۋىزىمىنا دەيىن ساتىلاي كوتەرىلگەن ەڭبەكقور مامان. ءومىرىنىڭ قوس ونجىلدىعىندا قاتاڭ ءتارتىپ پەن ءجىتى جاۋاپكەرشىلىك جۇكتەيتىن سالادا ابىرويلى قىزمەت ەتۋمەن قاتار, ايەل, انا باقىتىن سەزىنگەن جان. بۇگىندە ول ۇل-قىزىنىڭ سۇيەنىشى بولۋمەن قاتار, قىزمەتتە تالاي نازىك جاننىڭ سۇرىنگەن ساتىندە دەمەپ ءجۇر. وتباسىلىق تۇرمىستىق زورلىق-زومبىلىققا قارسى كۇرەس بولىمشەسىن باسقارىپ وتىرعان كەيىپكەرىمىز ءۇشىن 8-ناۋرىز مەرەكە عانا ەمەس, ايەل تاعدىرى ءۇشىن تولعاناتىن كۇن.
پرەزيدەنت ايەلدەر قاۋىمىن حالىقارالىق مەرەكەمەن قۇتتىقتادى
«مەن ءۇشىن 8-ناۋرىز تەك مەرەكە عانا ەمەس, سونىمەن قاتار ايەلدىڭ قوعامداعى ءرولى مەن تاعدىرى تۋرالى تەرەڭ ويلاناتىن كۇن. بۇل كۇن – انالاردىڭ, قىز-كەلىنشەكتەردىڭ ەڭبەگى مەن توزىمىنە قۇرمەت بىلدىرەتىن ەرەكشە ءسات. كۇندەلىكتى كۇيبەڭ تىرشىلىكتە ايەل ەڭسەرىپ جۇرگەن جۇك كوزگە كورىنبەي, ەلەنبەي قالىپ جاتادى. ال كوكتەمنىڭ وسى ءبىر كوركەم كۇنىندە بار الەم ايەلدىڭ بولمىسىنا باسىپ ءيىپ, قوعام ءۇشىن اتقارىپ جۇرگەن قىزمەتىنە العىس ايتادى, قادىرىن تەرەڭ تۇسىنەدى. سوندىقتان مەرەكە ءمانى ايەلدىڭ, انانىڭ نازىك قىرىن ەسكە ءتۇسىرىپ, ەسەلەپ العىس ايتاتىنى ءۇشىن قۇندى», دەيدى رابيعا ەركەبايقىزى.
شەندى كەيىپكەرىمىزدىڭ قىزمەتى دە ايەلدەردىڭ قۇقى مەن وتباسى, قوعامداعى ورنىنىڭ ورنىقتى بولۋىمەن بايلانىسىپ جاتىر. جاسىراتىنى جوق, قوعامىمىزدا ستالكينگ سەرگەلدەڭ ەتىپ, زورلىق قۇربانىنا اينالعاندار ازايماي تۇر. بۇل تۇستا دا مەملەكەتىمىز ايەل ەركىندىگى مەن قۇقىن زاڭمەن شەگەلەپ بەردى. ىستە جوعارىدا اتالعان جاعىمسىز كورىنىسپەن كۇرەسىپ جۇرگەن رابيعا ەركەبايقىزى, دەسە دە كەيىنگى جىلدارى ايەلدەرگە دەگەن ىزگى كوزقاراس مىعىم ورنىعىپ, وڭ وزگەرىپ كەلە جاتقانىن تىلگە تيەك ەتتى.
«بەس ساۋساق بىردەي ەمەس ەكەنى بەسەنەدەن بەلگىلى. سوندىقتان بولار ايەلدەرگە كۇش قولدانۋ تۇبەگەيلى تولاستاعان جوق. الايدا ولاردىڭ سانى بىرتە-بىرتە ازايىپ كەلە جاتقانىنا كوز جەتكىزىپ ءجۇرمىز. مۇنداي وڭ ناتيجەگە «ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ تۋرالى زاڭ» اياسىندا دا مۇمكىن بولىپ وتىر. قىز-كەلىنشەكتەردىڭ قۇقى زاڭمەن كەپىلدەندىرىلىپ, ادامدىق پاراساتپەن ۇيلەسە تۇسكەندە عانا ولاردىڭ ءومىرى وكسىمەيدى دەپ ويلايمىن», دەگەن ويىن ورتاعا سالعان رابيعا ەركەبايقىزى وزگە ايەلدەرگە اراشا بولاتىن ماماندىعىندا ىشكى كۇيىن بەرىك ەتە العان جان.
«بۇل سالادا ۇزاق جىلدار قىزمەت ەتۋ ءۇشىن ەڭ الدىمەن توزىمدىلىك, ادىلدىككە دەگەن بەرىك ۇستانىم, جاۋاپكەرشىلىك پەن رۋحاني مىقتىلىق قاجەت. سونىمەن قاتار ادامدار تاعدىرىنا بەيجاي قاراماي, ءاربىر شەشىمدى زاڭ مەن ار-وجدان اياسىندا قابىلداي ءبىلۋ ماڭىزدى. مەنىڭ ۇستانىمىم وسىعان سايادى ءارى ايەل قاۋىمىنىڭ قۋانىشى ءۇشىن ءسات سايىن تەر توگىپ جۇرگەنىم مەن ءۇشىن ومىرلىك ماڭىزدى مىندەت», دەيدى ول.
ارينە, تەمىردەي ءتارتىپتى تالاپ ەتەتىن قىزمەتتە وتباسى مەن جاردىڭ قولداۋى ماڭىزدى. كەيىپكەرىمىز جانۇيا مەن ماماندىقتاعى ماردىمدى تىرلىگىن ءومىردىڭ ءار قىرىنداعى تەپە-تەڭدىكپەن بايلانىستىرادى.
قۇرمەتكە بولەنگەن انا: ءلاززات تايمىرقىزىنىڭ تاعىلىمعا تولى عۇمىرى
«تەپە-تەڭدىكتى ساقتاۋ ءۇشىن ۋاقىتتى دۇرىس جوسپارلاۋ, وتباسىعا ساپالى كوڭىل ءبولۋ جانە جۇمىستىڭ جۇيەسىن, ونداعى كوڭىل-كۇيدى ۇيگە الىپ كەلمەۋگە تىرىسۋ ماڭىزدى. وتباسىنىڭ قولداۋى – باستى كۇش. قاي سالادا بولماسىن, ايەل ادام ءۇشىن وتباسى – دەمەۋ ءارى شابىت كوزى. سوندىقتان وتباسىندا قولداۋ كورگەن ايەل ءۇشىن الىنبايتىن قامال قالمايدى», دەپ وي ءتۇيدى رابيعا ەركەبايقىزى.
ۇرپاق ءوربىتىپ, بولاشاق تۇلعالاردى تاربيەلەپ, جان-جاعىنا مەيىرىم مەن ماحاباتتىڭ ۇزدىك ۇلگىسىن كورسەتىپ جۇرگەن جانداردىڭ جادىراپ جۇرگەنى ماڭىزدى. ال وسى سوزدەردى جادىمىزدان شىعارماۋ ەكى ەسە ماڭىزدى.
