سۋرەت: kaz.zakon.kz
جيىندا ازىق-ت ۇلىك قاۋىپسىزدىگى, اۋىل شارۋاشىلىعى ونىمدەرىنىڭ ەكسپورتى مەن يمپورتىنا قاتىستى بىرقاتار ماڭىزدى شەشىم قابىلداندى. ىشكى نارىقتاعى باعا احۋالى تۇراقتانىپ, قويما قورلارى جەتكىلىكتى ەكەنى ەسكەرىلدى. وسى جاعداي كارتوپ ەكسپورتىنا ۋاقىتشا شەكتەۋ ەنگىزۋدىڭ قاجەتى جوق ەكەنىن كورسەتتى. كوميسسيا مۇشەلەرى ەكسپورتتى شەكتەۋ تۋرالى ۇسىنىستى قولدامادى.
سيىر ەتىن سىرتقى نارىققا شىعارۋعا ارنالعان كۆوتا بەرۋ ءتارتىبىن جەڭىلدەتۋ ماسەلەسى دە تالقىلاندى. قولدانىستاعى تالاپتار ەكسپورتتاۋشىلاردان كەمىندە 5 مىڭ باسقا ارنالعان بورداقىلاۋ الاڭى مەن جەكە ەت كومبيناتىن تالاپ ەتەدى. كوميسسيا وتىرىسىندا ۇكىمەت بەكىتكەن مال شارۋاشىلىعىن دامىتۋدىڭ كەشەندى جوسپارى ەسكەرىلدى. قۇجات ءىرى قارا مال سانىن 7,9 ملن باستان 12 ملن باسقا جەتكىزۋدى, ەكسپورتتىق الەۋەتتى ارتتىرۋدى كوزدەيدى. وسىعان بايلانىستى اۋىل شارۋاشىلىعى مينيسترلىگى كۆوتا ءبولۋ قاعيدالارىنا وزگەرىس ەنگىزەدى.
انالىق مال باسىن ساقتاۋ ماسەلەسى دە نازاردان تىس قالعان جوق. قايتا وڭدەۋ كاسىپورىندارىن شيكىزاتپەن قامتاماسىز ەتۋ ماقساتىندا قازاقستاننان ءىرى قارا مەن ۇساق مالدىڭ انالىق باسىن, بۇقاشىقتارىن سىرتقا اكەتۋگە قويىلعان شەكتەۋدى ۇزارتۋ جونىندە شەشىم قابىلداندى. بۇل تالاپ ەۋرازيالىق ەكونوميكالىق وداق ەلدەرىنە دە قاتىستى.
قۇس شارۋاشىلىعى سالاسىنداعى جاعداي دا قارالدى. ەلدە 70 قۇس فابريكاسى جۇمىس ىستەيدى. ونىڭ 34-ءى جۇمىرتقا باعىتىندا, 29-ى ەت وندىرۋگە ماماندانعان, 7 كاسىپورىن اسىل تۇقىمدى قۇس وسىرەدى. بىلتىر تاۋىق جۇمىرتقاسىنىڭ ءوندىرىسى 4 568,5 ملن داناعا جەتىپ, 2,4 پايىزعا ءوستى. ىشكى نارىقتى قامتۋ دەڭگەيى 98 پايىزدى قۇرادى. وسى كورسەتكىشتەردى ەسكەرە وتىرىپ, التى اي مەرزىمگە ەاەو ەلدەرىنەن تاۋىق جۇمىرتقاسىن يمپورتتاۋعا تىيىم سالۋ تۋرالى شەشىم قابىلداندى. ءتيىستى بۇيرىقتى اۋىل شارۋاشىلىعى مينيسترلىگى شىعارادى.
كوميسسيا وتىرىسىندا تەمىرجول سالاسىنا قاتىستى ۇسىنىس تا قارالدى. ماسەلە تەمىرجول جىلجىمالى قۇرامىنا ارنالعان بولشەكتەر مەن تەمىرجول توسەمىنىڭ ەلەمەنتتەرىن ءۇشىنشى ەلدەردەن اكەلۋگە شەكتەۋ قويۋعا بايلانىستى بولدى. تالقىلاۋ بارىسىندا وتاندىق جيىنتىقتاۋشى وندىرۋشىلەردىڭ, لوكوموتيۆ شىعاراتىن كاسىپورىنداردىڭ, تۇتىنۋشىلاردىڭ ۇستانىمى تىڭدالدى. قورىتىندىسىندا مۇنداي شەكتەۋ ەنگىزۋ ورىنسىز دەگەن شەشىم قابىلداندى.
دەگەنمەن ۇلتتىق وندىرۋشىلەردى قولداۋ ماسەلەسى نازاردا قالدى. «قازاقستان تەمىر جولى» ۇك-گە جىلجىمالى قۇرامعا ارنالعان قوسالقى بولشەكتەر مەن تەمىرجول توسەمى ەلەمەنتتەرىن ساتىپ الۋ كەزىندە وتاندىق ونىمگە باسىمدىق بەرۋ تاپسىرىلدى.
