– ايناگۇل, اڭگىمەمىزدى جۋىردا وتكەن جارىستان باستايىقشى. بۇل ءوزى قانداي تۋرنير؟ الەمنىڭ قانشا ەلىنەن كوماندا قاتىستى؟
– بۇل – جىل سايىن ارنايى ماقساتتاعى بولىنىستەر اراسىندا ۇيىمداستىرىلاتىن بەدەلدى جارىس. بيىل وعان 48 ەلدەن 109 كوماندا قاتىستى. سونىڭ ىشىندە 9 ايەلدەر قۇراماسى ونەر كورسەتتى. بەس كۇنگە سوزىلعان جارىستا بەس ءتۇرلى جاتتىعۋدان سىنعا تۇستىك. ونىڭ ءبارى – ءوزىمىزدىڭ كۇندەلىكتى قىزمەتىمىزگە ارنالعان ايرىقشا جاتتىعۋلار. اتاپ ايتقاندا, عيمارات ءىشىن قىلمىسكەرلەردەن تازارتۋ, كەپىلگە الىنعانداردى قۇتقارۋ دەگەن سەكىلدى تاپسىرمالاردى ورىندادىق.
– سونىڭ ءبىرى ۇلكەن دوڭعالاقتى كوتەرۋ تاپسىرماسى بولعانىن ءدۇيىم ەل كوردى. قازاق قىزدارىنىڭ الىپ دوڭعالاقتى قالاي كوتەرىپ العانىنا قايران قالىپ, تامسانباعان ادام جوق. بۇل جارىستاعى ەڭ قيىن تاپسىرما بولدى ما؟
– ءيا, راس, ەڭ قيىنى وسى بولدى. جالپى, بۇل جارىسقا 6 اي دايىندالدىق. ونىڭ ىشىندە شىدامدىلىقتى, كۇش-قۋاتتى, جىلدامدىقتى ارتتىرۋ ماقساتىندا فيزيكالىق دايىندىق پەن اتۋ, مەرگەندىك تۇرعىسىنان تاكتيكالىق دايىندىققا باسا كوڭىل اۋدارىلدى. بۇعان قوسا كوماندانىڭ پسيحولوگيالىق دايىندىعى دا نازاردان تىس قالعان جوق. ويتكەنى مۇنداي تۋرنيردە كوماندالىق رۋح, ءوزارا تۇسىنىستىك تە ماڭىزدى ءرول وينايدى. تياناقتى دايىندىقتىڭ, سونداي-اق ۇيلەسىمدى كوماندالىق جۇمىستىڭ ارقاسىندا جارىستا جەڭىسكە جەتتىك. ءيا, دوڭعالاقتى كوتەرۋ كەزىندە ازداپ قينالدىق. نەگىزى ونى ءتورت قىز كوتەرۋىمىز كەرەك ەدى. الايدا جارىستا ۋاقىتتى ۇنەمدەۋ ءۇشىن ءبىر قىز باسقا تاپسىرمانى ورىنداۋعا جۇگىرىپ كەتتى دە, دوڭعالاقتى ۇشەۋمىز كوتەردىك. ونى دا ءبىز الدىن الا ابدەن پىسىقتاعان ەدىك. جالپى ايتقاندا, جارىس وتە قارقىندى ءارى قىزىقتى ءوتتى.
– جەڭىمپاز بولعان كەزدەگى سەزىمىڭىز قانداي ەدى؟
– وتانىڭنىڭ اتىنان الەمدىك جارىسقا شىعىپ, ەلدىڭ نامىسىن جىرتىپ, ءبىرىنشى ورىن الۋدىڭ اسەرى تىم بولەك ەكەن. وسى بيىكتەن كورىنۋ جولىندا قانشاما تەر توكتىك دەسەڭشى. بابىمىز تۇرعىسىنان تالاپقا ساي بولدىق. جارىستا باعىمىز دا قوسا شاۋىپ, دىتتەگەن ماقساتىمىزعا قول جەتكىزگەنىمىزگە قۋانىشتىمىن.
– ءوزىڭىز تۋرالى بىرەر سۇراق قويسام. قازىر قانداي قىزمەت اتقاراسىز؟ ىشكى ىستەر سالاسىنا قاشان كەلدىڭىز؟
– قازىرگى قىزمەتىم – ىشكى ىستەر مينيسترلىگىنە قاراستى جەدەل قيمىلدايتىن ارنايى جاساقتىڭ ۆزۆود كومانديرىمىن. بۇل جارىسقا «Tomiris» كومانداسىنىڭ كاپيتانى رەتىندە ەكىنشى مارتە قاتىستىم. اتالعان سالاعا كەلۋىمە بالا كۇنىمنەن پوليتسيا كيىمىنە قىزىعۋشىلىعىم, وسىنداي وقالى كيىم كيسەم دەگەن ارمانىم سەبەپشى بولدى. ماعان دەيىن وتباسىمدا قۇقىق قورعاۋ ورگاندارىندا جۇمىس ىستەگەن ەشكىم جوق. رەسەيدىڭ ومبى وبلىسىندا دۇنيەگە كەلگەنمىن. سول جاقتا جوعارى وقۋ ورنىن بىتىرگەننەن كەيىن اتاجۇرتقا قونىس اۋدارىپ, جۇمىسقا تۇردىم. العاشقى ەڭبەك جولىم ءىىم ديپلوماتيالىق وكىلدىكتەردى قورعايتىن پوليتسيا پولكىندە باستالدى. 2019 جىلى تۇڭعىش رەت ايەلدەردىڭ جەدەل قيمىلدايتىن ارنايى جاساعى قۇرىلعان سوڭ, بىردەن وسى جەرگە قىزمەتكە اۋىستىم. سودان بەرى وسى سالانىڭ ىستىعى مەن سۋىعىنا ءتوزىپ, ەڭبەك ەتىپ جاتىرمىن.
– ارنايى جاساقتا قىزمەت ەتۋ ايەل ادامعا قيىن ەمەس پە؟
– الدىڭا ماقسات قويا بىلسەڭ, قيىن ەمەس. ءوزىمنىڭ جۇمىسىمدى ماقتان تۇتامىن. بىلىك پەن بىلەكتىڭ كۇشىن تالاپ ەتەتىن قىزمەتىمىز ارقىلى كەيىنگى جاستارعا, سونىڭ ىشىندە بالالارىمىزعا دا ۇلگى بولامىز. مەنىڭ دە وتباسىم, بالالارىم بار. ولاردى ەلىمىزدىڭ ابىرويلى, وتانىن قورعايتىن ازاماتى ەتىپ تاربيەلەۋىمە وسى قىزمەتىمنىڭ قوسار ۇلەسى زور.
– ءسىز سەكىلدى قۇقىق قورعاۋ ورگاندارىنا قىزمەتكە تۇرعىسى كەلەتىن سىڭلىلەرىڭىزگە قانداي كەڭەس بەرەر ەدىڭىز؟
– سپورتپەن شۇعىلدانۋ كەرەك. سالاماتتى ءومىر سالتىن ۇستانۋعا شاقىرامىن. اتاپ ايتقاندا, تاماقتانۋ جاعىنا, زياندى ادەتتەردەن اۋلاق بولۋعا ءمان بەرۋ قاجەت. ءوز-ءوزىڭىزدى دامىتىپ, قابىلەتىڭىزگە سەنە بىلسەڭىز, الىنبايتىن اسۋ جوق.
– سپورت دەمەكشى, ءسىز سپورتپەن دە شۇعىلداناتىنىڭىزدى بىلەمىز. استانادا وتكەن
V كوشپەلىلەر ويىندارىنا قاتىسىپ, جۇلدەلى ورىننان كورىندىڭىز. سول جايىندا ايتىپ بەرسەڭىز.
– ءيا, مەن كوشپەلىلەر ويىندارىندا ارقان تارتۋدان قىزدار قۇراماسى ساپىندا بولدىم. بۇل جارىسقا دا 8 اي بويى دايىندالدىق. الدىمەن قالالىق, وبلىستىق جارىستاردا توپ جارىپ, كوشپەلىلەر ويىندارى قارساڭىندا رەسپۋبليكالىق ءتۋرنيردىڭ سوڭعى كەزەڭىندە جەڭىسكە جەتتىك. ال ويىنداردا, وزدەرىڭىز بىلەسىزدەر, فينالعا دەيىن جەتىپ, وكىنىشكە قاراي, سوڭعى تارتىستا رەسەي قۇراماسىنان ۇتىلىپ, كۇمىس مەدالعا يە بولدىق. قازىرگى تاڭدا ارقان تارتۋدان جارىستارعا قاتىسىپ جۇرگەن جوقپىن. الايدا جاتتىعۋ جاساپ تۇرامىن.
– اڭگىمەڭىزگە راحمەت.
اڭگىمەلەسكەن –
ەسكەندىر زۇلقارناي,
«Egemen Qazaqstan»
