كوللاجدى جاساعان – الماس ماناپ, «EQ»
- وتانداسىمىز «ۇلكەن دۋلىعا» ساناتىنداعى تۋرنيردە ەكىنشى مارتە توپ جاردى. العاش رەت وسىدان ءتورت جىل بۇرىن لوندوندا ءداستۇرلى تۇردە ۇيىمداستىرىلىپ تۇراتىن «ۋيمبلدون» دوداسىندا الدىنا جان سالعان جوق.
- كۇنى بۇگىنگە دەيىن كورتتا جۇرگەن ءۇش تەننيسشىگە عانا «ۇلكەن دۋلىعانىڭ» ەكى بىردەي توسەنىشىندە – ءشوپ پەن حاردا باس جۇلدەنى يەلەنۋ باقىتى بۇيىردى. ولار – ۆينۋس ۋيليامس, يگا شۆيونتەك, ەلەنا رىباكينا.
- قازىر ونەر كورسەتىپ جۇرگەندەر اراسىنان «ۋيمبلدون» مەن «Australian Open» ەكەۋىندە دە جەڭىسكە جەتكەن جالعىز ويىنشى بار. ول – رىباكينا.
- كەيىنگى سەگىز جىلدا WTA-نىڭ قورىتىندى ءتۋرنيرى مەن «Australian Open» دوداسىن قاتار ۇتقان تەك ەلەنا. 2017, 2018 جىلدارى ءدال سونداي تابىسقا دانيالىق كارولينا ۆوزنياتسكي قول جەتكىزگەن ەدى.
- مەلبۋرندە ءوزىنىڭ 12-تيتۋلىن ولجالادى. وسىعان دەيىن «ۇلكەن دۋلىعا», WTA 1000 مەن WTA 250 جارىستارىندا 2 رەت, WTA-نىڭ قورىتىندى تۋرنيرىندە 1 مارتە, WTA 500 باسەكەسىندە 5 رەت تەڭدەسسىز دەپ تانىلدى.
- WTA تۋرنيرلەرىنىڭ فينالىندا قاتارىنان بەسىنشى رەت جەڭىسكە جەتتى. بۇل ءساتتى سەريا 2024 جىلدىڭ ءساۋىر ايىندا گەرمانيادا باستالعان ەدى. جالپى فينالداردا 12 رەت باسىمدىق تانىتىپ, 11 رەت ەسە جىبەردى.
- ەلەنا الەمنىڭ ءبىرىنشى, ەكىنشى راكەتكالارىمەن ءتۇرلى جارىستا جولدارى ءجيى قيىسىپ ءجۇر. يگا شۆەنتەكپەن 12 رەت كەزدەسىپ, ازىرگە ەسەپ تەڭ – 6:6. ارينا سوبولەنكونىڭ ءبىر جەڭىسى ارتىق – 7:8.
- سوبولەنكو مەن شۆەنتەك الەمنىڭ ءبىرىنشى راكەتكالارى اتانىپ وتىرعان تۇستا دا جەرلەسىمىز ولاردى كوبىنە-كوپ ۇتتى. ەسەپ – 9:4.
- جوعارىدا ەسىمدەرى اتالعان بەلارۋس پەن پولشا تەننيسشىلەرى WTA رەيتينگىندە كوش باستاپ تۇرعاندا ولاردىڭ ەكەۋىن تەك رىباكينا عانا جەڭدى.
- 2023 جىلدان بەرى ا.سوبولەنكو جاسىل قۇرلىقتاعى جارىستا تەك ەلەنادان عانا ەكى رەت ۇتىلدى.
- الەمنىڭ ءبىرىنشى راكەتكالارىمەن جولى 15 رەت قيىسقان جەرلەسىمىز سونىڭ توعىزىندا جەڭىس تويىن تويلادى.
- جەر-جاھاننىڭ ەڭ ۇزدىك ويىنشىلارىمەن وتكەن كەزدەسۋدەگى جەڭىس كوەففيتسەنتى 60%-دى قۇرايدى. بۇل – WTA تاريحىنداعى ەڭ ۇزدىك كورسەتكىش.
- كەيىنگى 17 جىل ىشىندە «ۇلكەن دۋلىعانىڭ» ءبىر تۋرنيردە الەمنىڭ ءبىرىنشى, ەكىنشى راكەتكالارىن قاتارىنان ۇتقان ەكى ويىنشى عانا بولدى. سولاردىڭ ءبىرى – رىباكينا.
- «Australian Open» جارىسىندا WTA رەيتينگىندە كوش باستاپ تۇرعان قوس مىقتىنى ۇتۋ باقىتى تورتكۇل دۇنيەنىڭ ءتورت تەننيسشىسىنە عانا بۇيىردى. سولاردىڭ قاتارىندا ەلەنا دا بار.
- بۇگىندە تەڭدەسسىز دەپ تانىلعان تەننيسشىلەردى WTA دەڭگەيىندەگى دودالاردا ءۇش رەت جەڭدى.
- توپ-10-دىقتىڭ قاتارىندا جۇرگەن ۇزدىكتەردى قاتارىنان 10 كەزدەسۋدە ۇتتى.
- توپ تۋرنيرلەردەگى سوڭعى 21 كەزدەسۋدىڭ 20-سىندا جەڭىسكە جەتتى.
- بىلتىرعى «ۋيمبلدون»-نان كەيىن 45 رەت كورتقا شىعىپ, 38 رەت قارسىلاسىن قاپى قالدىردى.
- بيىلعى ماۋسىمدا ەيس جاساۋ جاعىنان جەكە-دارا كوش باستاپ تۇر. ونىڭ قاقىراتا سوققان سوققىلارى 69 مارتە دىتتەگەن جەرىنە ءدوپ ءتۇستى. سول ەيستەردىڭ 47-ءسى اۋستراليانىڭ اشىق بىرىنشىلىگىندە جاسالدى.
- مەلبۋرندەگى جارقىن جەڭىسىنىڭ ارقاسىندا قايتا توپ-3 تەننيسشىنىڭ قاتارىنا قوسىلدى.
