ورتالىقتا زاماناۋي وپەراتسيا زالدارى, ورتالىقتاندىرىلعان وتتەگىمەن قامتاماسىز ەتۋ جۇيەسى, پاتسيەنتتەردى تاسىمالداۋعا ارنالعان جۇك ليفتتەرى ىسكە قوسىلدى. تولىققاندى پەريناتالدىق بلوك, جاڭا تۋعان نارەستەلەرگە ارنالعان قارقىندى تەراپيا, جانساقتاۋ بولىمشەلەرى جۇمىس ىستەيدى. دەنە سالماعى تومەن بالالاردى كۇتۋگە بارلىق جاعداي جاسالعان. بۇل – حالىقارالىق ستاندارتقا سايكەس كورسەتىلەتىن ساپالى ءارى قاۋىپسىز مەديتسينالىق كومەكتىڭ كەپىلى.
–الماتى وبلىسى بولىنگەننەن كەيىن پەريناتالدىق ورتالىق قىزمەتىن قاراساي, ەڭبەكشىقازاق كوپبەيىندى ورتالىق اۋداندىق اۋرۋحانالارى, سونداي-اق الماتى كوپسالالى كلينيكالىق اۋرۋحاناسى اتقارىپ كەلگەن ەدى. مەديتسينالىق ۇيىمدار اۋىر جاعدايداعى پاتسيەنتتەرگە, وبلىستىڭ تۇكپىر-تۇكپىرىنەن جەتكىزىلگەن شالا تۋعان نارەستەلەرگە كومەك كورسەتۋ مىندەتىن جوعارى جاۋاپكەرشىلىكپەن ورىندادى. وسىنداي كۇردەلى كەزەڭدە ايانباي ەڭبەك ەتكەن بارلىق مەديتسينا قىزمەتكەرلەرىنە العىس بىلدىرەمىن. بۇگىندە الماتى وبلىسى دەموگرافيالىق ءوسىم كورسەتكىشى جونىنەن جەتەكشى ورىنعا يە. وڭىرىمىزدە جىل سايىن 30 مىڭعا جۋىق ءسابي دۇنيەگە كەلەدى. بۇل ورايدا مەديتسينا سالاسى قىزمەتكەرلەرىنىڭ ەڭبەكتەرى ەرەن. سىزدەردىڭ كاسىبي بىلىكتىلىكتەرىڭىزدىڭ ارقاسىندا مىڭداعان انا امان-ەسەن ءسابيىن باۋىرىنا الىپ, شاڭىراعىن شاتتىققا كەنەلتتى, – دەگەن ءوڭىر باسشىسى مارات سۇلتانعازيەۆ جاڭا بوسانعان انالار مەن اق جەلەڭدى ابزال جانداردى حالىقارالىق ايەلدەر مەرەكەسىمەن قۇتتىقتاپ, ارنايى سىيلىقتار تابىس ەتتى. وڭىردەگى العاشقى پەريناتالدىق ورتالىقتىڭ اشىلۋ سالتاناتىنا قاتىسقان دەنساۋلىق ساقتاۋ ۆيتسە-ءمينيسترى تيمۋر مۇراتوۆ, «التىن القا» يەگەرى ليزا بايراموۆا اقجارما تىلەكتەرىن بىلدىرسە, ەڭبەك ارداگەرى تىلەۋلەس ۇزاقوۆ اق باتاسىن بەردى.
پەريناتالدىق ورتالىقتا كونسۋلتاتيۆتىك-دياگنوستيكالىق, بوساندىرۋ قىزمەتى مەن نەوناتولوگيالىق كومەك كورسەتىلەدى. ستاتسيوناردا 110 توسەكتىك ورىن بار. ورتالىقتا 45 دارىگەر, 140-قا جۋىق ورتا بۋىن مەديتسينا قىزمەتكەرى مەن 87 كىشى مەيىربيكە, جالپى سانى 286 ادام ەڭبەك ەتەدى.
– پەريناتالدىق ورتالىق ەڭبەكشىقازاق اۋدانىمەن قاتار رايىمبەك, كەگەن, ۇيعىر, تالعار اۋداندارىنىڭ جۇكتى ايەلدەرىنە دە قىزمەت كورسەتەدى. مۇندا دەنساۋلىق جاعدايى ءۇشىنشى دەڭگەيدەگى, سونداي-اق ەكستراگەنيتالدى اۋرۋلارى بار ناۋقاستار مەن شالا تۋعان نارەستەلەر ەم الادى. بۇگىندە 63 ايەل ورنالاسقان. جانساقتاۋ بولىمىندەگى 26 ءسابيدىڭ 8-ءىنىڭ سالماعى 1 كەلىگە جەتپەي شالا تۋعاندار. كۇنىنە شامامەن 10–15 ايەل بوسانادى, – دەيدى ورتالىق ديرەكتورى داۋرەن يماناليەۆ.
الماتى وبلىسى,
ەڭبەكشىقازاق اۋدانى
