كوكشەتاۋدا سالىناتىن جىلۋ ەلەكتر ورتالىعى جوباسىنا ەرەكشە ءمان بەرىلدى. بۇل نىسان سەمەي مەن وسكەمەن قالالارىنداعى ستانسالارمەن بىرگە ەلدىڭ ەنەرگەتيكالىق الەۋەتىن ارتتىرۋعا باعىتتالعان ءىرى جوبالاردىڭ ءبىرى سانالادى. «سامۇرىق-ەنەرگو» اق باسقارما توراعاسى قايرات ماقسۇتوۆتىڭ مالىمەتىنشە, جەو قۇرىلىسىنا 227 گەكتار جەر بولىنگەن, كۇل-قوج قالدىقتارىنا ارنالعان الاڭعا تاعى 130 گەكتار قاراستىرىلعان. ستانسانىڭ جوبالىق ەلەكتر قۋاتى شامامەن 240 مۆت, جىلۋ قۋاتى 520 گكال/ساع بولادى. قوسىمشا سۋ جىلىتۋ قازاندىقتارىن ورناتۋ ارقىلى بۇل كورسەتكىشتى 300 گكال/ساعاتقا دەيىن ارتتىرۋ مۇمكىندىگى بار.
قازىر دايىندىق جۇمىستارى باستالعان. كۇشتىك ترانسفورماتور ورناتىلىپ, ۋاقىتشا جولدار مەن قۇرىلىس شتابى سالىندى. جابدىقتاردى جەتكىزۋ 2027 جىلدىڭ ءبىرىنشى توقسانىنا جوسپارلانعان. قۇرىلىس كەزەڭىندە شامامەن 2,5 مىڭ ادام ەڭبەك ەتەدى. نىسان ىسكە قوسىلعان سوڭ, 400-گە جۋىق تۇراقتى جۇمىس ورنى اشىلادى. جوبا «تازا كومىر» تەحنولوگياسىن قولدانۋ ارقىلى جۇزەگە اسادى. كەشەندى گاز تازارتۋ جۇيەسى تومەن ەميسسيالى قىزدىرعىشتاردى, كاتاليزاتورلار مەن ەلەكتر سۇزگىلەردى قامتيدى.
ءتۇتىن گازىن كەشەندى تازارتۋ جۇيەسى تومەن ەميسسيالى قىزدىرعىشتاردى, كاتاليزاتورلار مەن ەلەكتر سۇزگىلەردى قامتيدى. ءتۇتىن گازدارىن وڭدەۋ بارىسىندا قۇرىلىس سالاسىندا قولدانۋعا جارامدى گيپس تۇزىلەتىن كۇكىرت تازارتۋ رەاكتورى ورناتىلادى. وسىلايشا, ستانسا ەكولوگيالىق كودەكس تالاپتارىنا تولىق ساي بولادى.
ۇكىمەت باسشىسى بۇل نىسان ءوڭىر ينفراقۇرىلىمىن دامىتۋ مەن حالىقتى تۇراقتى جىلۋ كوزدەرىمەن قامتاماسىز ەتۋ ءۇشىن ماڭىزدى ەكەنىن ايتتى. بولجامعا قاراعاندا, 2035 جىلعا قاراي كوكشەتاۋدا جىلۋ ەنەرگياسىنا سۇرانىس 840 گكال/ساعاتتان اسادى. قالادا جىل سايىن 200–240 مىڭ شارشى مەتر تۇرعىن ءۇي پايدالانۋعا بەرىلىپ جاتىر. جەو ىسكە قوسىلعان سوڭ, كوكشەتاۋدىڭ 195 مىڭنان استام تۇرعىنى جىلۋمەن قامتىلادى, 600-گە جۋىق كوپقاباتتى ۇيگە ىستىق سۋ بەرىلەدى. جوبانى 2029 جىلى اياقتاۋ جوسپارلانعان.
جۇمىس ساپارى بارىسىندا پرەمەر-مينيستر كوكشەتاۋداعى وندىرىستىك الاڭداردى دا ارالادى. «Kokshe Industry» يندۋستريالىق ايماعىندا اۋىل شارۋاشىلىعى ونىمدەرىن قايتا وڭدەۋ, جەڭىل ونەركاسىپ, ماشينا جاساۋ, قۇرىلىس ماتەريالدارىن ءوندىرۋ باعىتىنداعى جوبالار جۇزەگە اسىرىلىپ جاتىر. مۇندا «مم Brick» جشس كىرپىش زاۋىتى, «سودرۋجەستۆو كازاحستان» جشس مايلى داقىلداردى وڭدەۋ كەشەنى, «كەدەنترانسسەرۆيس» اق قولعا العان قازاقستان – قىتاي قۇرعاق پورتىنىڭ لوگيستيكالىق تەرمينالى ورنالاسقان.
كوكشەتاۋ قالاسىنىڭ اكىمى ءانۋار كۇمپەكەەۆ يندۋستريالىق ايماقتىڭ اۋماعى 600 گەكتار ەكەنىن ايتتى. قازىر قۇنى 22,7 ملرد تەڭگە بولاتىن جوبالار ىسكە اسىرىلىپ جاتىر. ولار 2026–2027 جىلدارى ىسكە قوسىلىپ, 670 جاڭا جۇمىس ورنى اشىلادى. 2030 جىلعا دەيىن وڭىرگە 520 ملرد تەڭگەدەن استام ينۆەستيتسيا تارتىلىپ, 40-قا جۋىق وندىرىستىك جوبا جۇزەگە اسۋى مۇمكىن.
پرەمەر-مينيستر «قازاقستان اگرو يننوۆاتسيالىق كورپوراتسياسى» جشس كاسىپورنىنا دا باردى. زاۋىت اۋىل شارۋاشىلىعى مەن كوممۋنالدىق تەحنيكا شىعارادى. كاسىپورىن باس ديرەكتورى ولەگ بالىبين وتكەن جىلى 65 ملرد تەڭگەنىڭ ءونىمى ءوندىرىلىپ, 4 مىڭنان استام تەحنيكا شىعارىلعانىن ايتتى. قازىر ءوندىرىستى كەڭەيتۋگە باعىتتالعان ءتورتىنشى كەزەڭ اياقتالعان. 3 ملرد تەڭگەدەن استام ينۆەستيتسيا ءوندىرىس كولەمىن جىلىنا 5 مىڭ تەحنيكاعا دەيىن جەتكىزۋگە مۇمكىندىك بەرگەن. الداعى كەزەڭدە ءوندىرىس قۋاتىن 6 مىڭ تەحنيكاعا دەيىن ۇلعايتۋ جوسپارلانىپ وتىر. جوبانىڭ جالپى ينۆەستيتسيا كولەمى 10 ملرد تەڭگەگە جۋىق. كاسىپورىندا 400-گە جۋىق ادام ەڭبەك ەتەدى.
ولجاس بەكتەنوۆ ونەركاسىپ جوبالارىن جەدەل ىسكە قوسۋ مەن ماشينا جاساۋداعى جەرگىلىكتەندىرۋ دەڭگەيىن ارتتىرۋ ماڭىزدى ەكەنىن ايتتى. ونەركاسىپ جانە قۇرىلىس, اۋىل شارۋاشىلىعى مينيسترلىكتەرىنە, اقمولا وبلىسىنىڭ اكىمدىگىنە ءوندىرىستى كەڭەيتۋ جوسپارلارىن قولداۋ مەن ينفراقۇرىلىمدى ۋاقتىلى جەتكىزۋ تاپسىرىلدى.
سونىمەن قاتار اقمولا وبلىسىندا كوكتەمگى سۋ تاسقىنىنا دايىندىق ماسەلەسى دە قارالدى. ۇكىمەت باسشىسى توتەنشە جاعدايلاردى جويۋ جونىندەگى رەسپۋبليكالىق جەدەل شتابتىڭ وتىرىسىن وتكىزىپ, وڭىردەگى جاعدايمەن تانىستى. كوكشەتاۋدا قىلشاقتى وزەنىن تەرەڭدەتۋ مەن كەڭەيتۋ جۇمىستارى جۇرگىزىلگەن. سونىڭ ناتيجەسىندە كانالدىڭ وتكىزۋ قابىلەتى سەكۋندىنا 136 تەكشە مەترگە دەيىن ارتتى. ۇقساس جۇمىستار شاعالالى وزەنىندە دە اتقارىلعان. وڭىردە 163 ەلدى مەكەن مەن 32 جول ۋچاسكەسى تاسقىنعا قارسى شارالارمەن قامتىلدى.
جيىندا ەكولوگيا جانە تابيعي رەسۋرستار ءمينيسترى ەرلان نىسانباەۆ كوكتەمگى بولجامدى تانىستىردى. قازگيدرومەت دەرەكتەرىنە قاراعاندا, ناۋرىز بەن ءساۋىر ايلارىندا اۋا تەمپەراتۋراسى قالىپتى دەڭگەيدەن جوعارى بولۋى مۇمكىن, جاۋىن-شاشىن مولشەرى ەل اۋماعىنىڭ باسىم بولىگىندە كوپ تۇسەدى دەپ كۇتىلەدى. سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ەلدە 1395 گيدروتەحنيكالىق قۇرىلىس بار ەكەنىن ايتتى.
توتەنشە جاعدايلار ءمينيسترى شىڭعىس ءارىنوۆ 1 ناۋرىزدان بەرى گيدرولوگيالىق احۋال تاۋلىك بويى باقىلاۋدا تۇرعانىن جەتكىزدى. ەل اۋماعىندا سۋ باسۋ قاۋپى بار 1242 ەلدى مەكەن انىقتالعان. ازاماتتىق قورعاۋ قىزمەتتەرىنىڭ 39 مىڭنان استام قىزمەتكەرى دايىندىققا كەلتىرىلگەن. 18 مىڭنان اسا تەحنيكا مەن ارنايى قۇرال ءازىر تۇر. جاعداي كۇردەلەنسە, شۇعىل ارەكەت ەتۋ جوسپارى ىسكە قوسىلادى. وتكەن جىلى مەملەكەت باسشىسىنىڭ تاپسىرماسىمەن ۆەدومستۆونىڭ ماتەريالدىق-تەحنيكالىق بازاسى كۇشەيتىلگەن. 842 ارنايى تەحنيكا, 27 قايىق پەن كاتەر, 4 ۇشاق ساتىپ الىندى. 830 شاقىرىمنان استام قورعانىس بوگەتتەرى تۇرعىزىلدى, 1128 شاقىرىم درەناج جۇيەلەرى مەن كانالدار جوندەلدى نە جاڭادان سالىندى. اۆتوموبيل مەن تەمىرجول بويىندا 934 سۋ وتكىزۋ نىسانى ورناتىلدى نەمەسە جاڭارتىلدى. قاۋىپتى ۋچاسكەلەردە وزەن ارناسىن تەرەڭدەتۋ, جاعالاۋدى نىعايتۋ, تەگىستەۋ, تازارتۋ جۇمىستارى جۇرگىزىلدى.
جيىندا ششۋچينسك پەن سەمەيدە بولعان وقيعالار دا نازارعا الىندى. توتەنشە جاعدايلار ءمينيسترى ەكى دەرەك بويىنشا قىلمىستىق ءىس قوزعالعانىن, ساراپتامالار ءجۇرىپ جاتقانىن حابارلادى. ششۋچينسك قالاسىندا قازا تاپقانداردىڭ وتباسىلارىنا كومەك كورسەتىلگەن. ۆەدومستۆوارالىق كوميسسيا قورىتىندىسى ۇقساس جاعدايلاردىڭ الدىن الۋعا باعىتتالعان كەشەندى شارالاردى ازىرلەۋگە نەگىز بولادى. سەمەيدەگى بالالار ويىن-ساۋىق ورتالىعىندا شىققان ءورت جەدەل سوندىرىلگەن, ادام شىعىنىنا جول بەرىلمەدى. ۇكىمەت باسشىسى توتەنشە جاعدايلار قىزمەتىنە اكىمدىكتەرمەن بىرلەسىپ ءورت قاۋىپسىزدىگىن كۇشەيتۋدى, پروفيلاكتيكالىق رەيدتەر مەن ءتۇسىندىرۋ جۇمىستارىن جانداندىرۋدى تاپسىردى.
جاساندى ينتەللەكت جانە تسيفرلىق دامۋ ۆيتسە-ءمينيسترى مالىك ولجابەكوۆ «Tasqyn» جۇيەسى ارقىلى سۋ تاسقىنى تاۋەكەلدەرىن مودەلدەۋ جۇمىسى جۇرگىزىلىپ جاتقانىن ايتتى. كولىك ۆيتسە-ءمينيسترى ماقسات قالياقپاروۆ اۆتوجولداردىڭ قاۋىپتى ۋچاسكەلەرى تۇراقتى باقىلاۋعا الىنعانىن جەتكىزدى. پرەمەر-ءمينيستردىڭ ورىنباسارى قانات بوزىمباەۆ بىرقاتار وڭىردە مۇز قاباتىنىڭ قالىڭدىعى مەن توپىراقتىڭ قاتۋ دەڭگەيى جوعارى ەكەنىن باياندادى.
وتىرىس قورىتىندىسىندا ۇكىمەت باسشىسى مەملەكەتتىك ورگاندارعا سۋ تاسقىنىنا قارسى دايىندىقتى كۇشەيتۋدى تاپسىردى.
