ء«بىر عانا سكانەرلەۋ ارەكەتى قارجىڭىزدى سىپىرىپ الۋى مۇمكىن. بۇگىندە الاياقتارعا بانك جۇيەسىن بۇزۋدىڭ نەمەسە كۇردەلى تەحنيكالىق شابۋىل جاساۋدىڭ قاجەتى جوق. ولار الدەقايدا وڭاي جولدى تاڭدادى, قىزمەت كورسەتۋ سالاسىنداعى QR-كودتاردى اۋىستىرىپ, ادامداردى جالعان سايتتارعا باعىتتايدى. سىرت كوزگە ءبارى رەسمي پاراقشاعا ۇقسايدى, بىراق ەنگىزىلگەن دەرەكتەر تىكەلەي قىلمىسكەرلەردىڭ قولىنا تۇسەدى. QR-كودتىڭ ءوزى قاۋىپ تۋدىرمايدى. بۇل – تەك شيفرلانعان سىلتەمە. قاۋىپ – سول كود ءسىزدى قاي جاققا باعىتتايتىنىندا بولىپ تۇر. حالىق كودتى سكانەرلەگەنگە دەيىن سىلتەمەگە ءمان بەرە بەرمەيدى. تەحنيكالىق بەلگىلەردەن گورى كوزى ۇيرەنگەن تانىس ورتاعا سەنىم ارتادى: تانىس ءدامحانا, بەلگىلى لوگوتيپ, رەسمي تەرمينال...ەش كۇماندانباي, كودتى سكانەرلەي سالادى. الاياقتار ادامنىڭ ءدال وسىنداي سەنىمىن پايدالانادى», دەيدى ساراپشى گ.يساەۆا.
QR-كودتى كەز كەلگەن ونلاين سەرۆيستە ءبىر مينۋتتا جاساپ شىعارۋعا بولادى. ال شىنايى كودتى اۋىستىرۋ ءتىپتى وڭاي, جالعان نۇسقاسىن باسىپ شىعارىپ, تۇپنۇسقاسىنىڭ ۇستىنە جاپسىرا سالسا جەتكىلىكتى. پايدالانۋشى سكانەرلەگەن كەزدە رەسمي سايتقا ۇقساس, بىراق جالعان پاراقشا اشىلادى. اگەنتتىك وكىلىنىڭ ايتۋىنشا, مۇنداي سحەمالارعا الدانۋ ادامنىڭ پسيحولوگيالىق مىنەز-قۇلقىنا دا بايلانىستى.
«الاياقتار بانكتەردىڭ قورعانىسىن بۇزۋعا تىرىسپايدى. ولار ادامداردىڭ كۇندەلىكتى قالىپتاسقان ادەتىنە سۇيەنەدى. ءبىز بايلانىسسىز تولەمگە ۇيرەنىپ قالدىق, ينتەرفەيسكە سەنە سالامىز, كەزەكتە تۇرعاندا نەمەسە اسىقساق, سىلتەمەنى تەكسەرۋگە ۋاقىت بولمەيمىز. ادام دەرەكتەرىن ەنگىزىپ جاتىپ, ونىڭ سالدارىن ويلامايدى. وقيعالار دا سونى دالەلدەيدى. مىسالى, دامحاناعا كەلگەن ادام ۇستەلدەگى QR-كودتى سكانەرلەپ, ءمازىردى اشادى. ءبارى ادەتتەگىدەي كورىنەدى. تولەم جاساۋ كەزىندە SMS ارقىلى كەلگەن كودتى ەنگىزۋ سۇرالادى. ارادا 20 مينۋت وتكەن سوڭ ونىڭ شوتىنان 180 مىڭ تەڭگەدەن استام قاراجات ەسەپتەن شىعارىلادى. كەيىن انىقتالعانداي, تۇپنۇسقا QR-كودتىڭ ۇستىنە جالعان كود جابىستىرىلعان», دەيدى ساراپشى.
قندرا كەيىنگى كەزدە بولعان بىرنەشە وقيعانى دا ايتىپ بەردى. تاعى ءبىر جاعدايدا ەر ادام اۆتوتۇراق اقىسىن تەرمينالداعى QR ارقىلى تولەيدى. اشىلعان سايت رەسمي پاراقشادان اينىمايدى. ايىرماشىلىعى – دومەن اتاۋىندا, ءبىر عانا ءارىپ باسقا. ول 500 تەڭگە تولەۋ ءۇشىن كارتا دەرەكتەرىن ەنگىزەدى. كەيىن كارتاسىنان بىرنەشە رەت ءىرى سومالار الىنعانى بەلگىلى بولعان.
تاعى ءبىر تۇرعىن ەسىك الدىنان «جەتكىزۋ مالىمەتتەرىن ناقتىلاۋ ءۇشىن QR بويىنشا ءوتۋىڭىزدى سۇرايمىز» دەگەن حابارلاما تابادى. كودتى سكانەرلەگەندە «قايتا جىبەرۋ اقىسى» رەتىندە 1,2 مىڭ تەڭگە تولەۋ ۇسىنىلادى. پاراقشا ستاندارتتى تولەم فورماسىنا ۇقسايدى. ازامات كارتا دەرەكتەرىن ەنگىزگەننەن كەيىن بۇل مالىمەتتەر باسقا سايتتاردا ونلاين ساۋدا جاساۋ ءۇشىن پايدالانىلعان. سوندىقتان اگەنتتىك ماماندارى كۇماندى QR-كودتى سكانەرلەگەن جاعدايدا ۋاقىت سوزباي, ارەكەت ەتۋ كەرەكتىگىن ەسكەرتەدى.
«ەگەر ءسىز كۇدىكتى كودتى سكانەرلەپ قويساڭىز, دەرەۋ بانككە حابارلاسىپ, قاجەت بولسا كارتانى بۇعاتتاڭىز. ينتەرنەت-بانكينگ, ەلەكتروندىق پوشتا, باسقا دا ماڭىزدى سەرۆيستەردەگى قۇپياسوزدەردى وزگەرتىڭىز. بارلىق اككاۋنتىڭىزعا ەكى فاكتورلى اۋتەنتيفيكاتسيانى قوسىڭىز. قۇرىلعىنى انتيۆيرۋسپەن تەكسەرىپ, الداعى كۇندەرى شوتىڭىزداعى وپەراتسيالاردى مۇقيات باقىلاڭىز. جىلدام ارەكەت قارجىلىق شىعىندى ازايتۋعا كومەكتەسەدى. تسيفرلىق تولەمنىڭ ىڭعايلىلىعى قاۋىپسىزدىكپەن قاتار جۇرۋگە ءتيىس. ءبىر عانا سكانەرلەۋ ارەكەتى ەلەۋلى قارجىلىق شىعىنعا اكەلۋى مۇمكىن. سوندىقتان ءار QR-كودتى اۆتوماتتى سەنىم ەمەس, تەكسەرۋدى قاجەت ەتەتىن قۇرال رەتىندە قابىلداۋ – بۇگىنگى كۇننىڭ تالابى», دەپ ءتۇسىندىردى قندرا مامانى.
