سىرتقى ىستەر مينيسترلىگىنىڭ رەسمي وكىلى ەرلان جەتىباەۆ ەل ازاماتتارىنىڭ قاۋىپسىزدىگىن قامتاماسىز ەتۋ ءۇشىن بار كۇش-جىگەر سالىنىپ جاتقانىن جانە كەز كەلگەن جاعدايدا جان-جاقتى قولداۋ كورسەتۋگە دايىن ەكەنىن ايتتى. قازىرگى ۋاقىتقا دەيىن قازاقستان رەسپۋبليكاسى ازاماتتارىنىڭ اراسىندا زارداپ شەككەندەر نەمەسە قازا بولعاندار تۋرالى اقپارات تۇسكەن جوق.
«قازاقستاندىق ديپلوماتتار ورتالىق اپپاراتتا دا, ءوڭىر ەلدەرىندە دە تاۋلىك بويى جۇمىس ىستەۋدە. مەملەكەت باسشىسىنىڭ تاپسىرماسى بويىنشا وتانداستارعا قاجەتتى كومەكتى ۇيىمداستىرۋ جونىندەگى بارلىق جۇمىستى جەدەل ۇيلەستىرەتىن ارنايى شتاب قۇرىلدى.
ازاماتتاردان ەۆاكۋاتسيالاۋ ۇدەرىسىن ۇيىمداستىرۋدىڭ كۇردەلىلىگىنە تۇسىنىستىكپەن قاراپ, قازاقستاننىڭ شەتەلدەگى مەكەمەلەرىنىڭ قىزمەتكەرلەرىنە بارىنشا قولداۋ كورسەتۋدى سۇرايمىز.
ەۆاكۋاتسيا جۇمىستارى كەزىندە زەينەتكەرلەرگە, اتا-اناسىمەن بىرگە جۇرگەن بالالارعا, جۇكتى ايەلدەرگە, كامەلەتكە تولماعاندارعا جانە دەنساۋلىعىندا شەكتەۋلەرى بار ادامدارعا باسىمدىق بەرىلەدى», دەدى ول بريفينگتە.
رەسمي وكىلدىڭ مالىمەتىنشە, بۇگىنگى تاڭدا يراندا – 47, يزرايلدە – 163, قاتاردا – 3000-نان استام, بىرىككەن اراب امىرلىكتەرىندە – 4000-نان استام, ساۋد ارابياسى كورولدىگىندە شامامەن 1800 قازاقستان ازاماتى بار.
اتالعان ەلدەردەگى ازاماتتارمەن تۇراقتى تۇردە بايلانىس بار جاعدايدىڭ دامۋىنا قاراي قاجەتتى ۇسىنىمدار بەرىلۋدە.
مينيسترلىك ۋاكىلەتتى ورگاندارمەن بىرلەسە ازاماتتارىمىز ءۇشىن ەۆاكۋاتسيالىق رەيستەردى پىسىقتادى. بۇگىنگى كۇنگە دەيىن شيەلەنىس ايماقتارىنان 946 ازامات شىعارىلدى.
«جاقىن ارادا ماسكات قالاسىنان الماتىعا 314 ازامات بار رەيس كەلەدى. كەيىن ءدال وسى باعىت بويىنشا شامامەن 230 قازاقستاندىقتى قامتيتىن ەكىنشى توپتىڭ ۇشۋى جوسپارلانعان. وسىلايشا, وماننان ەلگە 500-دەن استام قازاقستان ازاماتى ورالادى دەپ كۇتىلەدى. سونىمەن قاتار بۇگىن دجيددا – اتىراۋ جانە دجيددا – اقتاۋ باعىتتارى بويىنشا ەۆاكۋاتسيالىق رەيستەر جوسپارلانعان, ولارمەن 326 ازامات ەلگە قايتارىلادى», دەيدى ەرلان جەتىباەۆ.
اۋە رەيستەرىنەن بولەك, قازاقستاندىقتاردى شىعارۋ جەرۇستى جولدارى ارقىلى دا جۇزەگە اسىرىلۋدا. اتاپ ايتقاندا, تەگەران, اشحاباد جانە گورگان قالالارىنداعى شەتەلدىك مەكەمەلەر 15 ازاماتتىڭ يران-تۇرىكمەنستان شەكاراسى ارقىلى ءوتۋىن قامتاماسىز ەتتى. ودان ءارى ولارعا اقتاۋعا جەتۋ ءۇشىن قاجەتتى كومەك كورسەتىلدى.
سونىمەن بىرگە تەگەران مەن ەرەۆانداعى ديپلوماتتار «زاركۋح» كومپانياسىنىڭ قالعان 35 قىزمەتكەرىنىڭ يراننان شىعۋىن ۇيىمداستىردى. ولار اۆتوبۋسپەن يران-ارمەنيا شەكاراسىن كەسىپ ءوتتى.
«اۋە كەڭىستىگىنە قويىلعان ەلەۋلى شەكتەۋلەرگە بايلانىستى بەلسەندى اسكەري ءىس-قيمىلدار توقتاپ, جاعداي تولىق قالىپقا كەلگەنگە دەيىن تاياۋ شىعىس ءوڭىر ەلدەرىنە ساپارلاردان باس تارتۋعا قاتاڭ تۇردە كەڭەس بەرەمىز.
وڭىردە جۇرگەن قازاقستان ازاماتتارىن جەكە قاۋىپسىزدىك شارالارىن كۇشەيتۋگە, قاۋىپتى اۋداندارعا بارماۋعا, جەرگىلىكتى بيلىك ورگاندارىنىڭ نۇسقاۋلارى مەن ۇسىنىمدارىن ورىنداۋعا, سونداي-اق قازاقستاننىڭ ەلشىلىكتەرى مەن كونسۋلدىقتارىمەن, تۋروپەراتورلارمەن جانە اۋە تاسىمالداۋشىلارىمەن بايلانىستا بولۋعا تاعى دا شاقىرامىز», دەيدى وكىل.
ونىڭ ايتۋىنشا, ازاماتتارىمىزدىڭ قاۋىپسىز تۇردە ەلگە ورالۋ ماسەلەسى مەملەكەت ءۇشىن باسىمدىق بولىپ قالا بەرەدى.
ەسكە سالا كەتەيىك, يزرايل 28 اقپان, سەنبى كۇنى تاڭەرتەڭ يرانعا سوققى جاسادى. دۋباي, ابۋ-دابي جانە راس-ەل-حايمادا جۇرگەن قازاقستان ازاماتتارى رەيستەردىڭ توقتاتىلۋىنا بايلانىستى ەلگە قايتا الماي وتىر. ال «قازپوشتا» تاياۋ شىعىستاعى جاعدايدىڭ شيەلەنىسۋىنە بايلانىستى حالىقارالىق پوشتا جونەلتىلىمدەرىنە ۋاقىتشا شەكتەۋلەر قويىلعانىن مالىمدەدى.
