سۋرەت: facebook.com/railways.kz
ءماجىلىستىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ايگۇل قۇسپان مەن دەپۋتات ولجاس قۇسپەكوۆ ەلوردادا «قازاقستان تەمىر جولى» اق فيليالى – تەمىرجول كولىگى پەرسونالىن باعالاۋ جانە دامىتۋ ورتالىعىنا باردى. كاسىپورىن ۇجىمىمەن كەزدەسۋدە كونستيتۋتسيالىق وزگەرىستەر اياسىنداعى ەڭبەك قاۋىپسىزدىگى جانە قىزمەتكەرلەردىڭ قۇقىعىن قورعاۋ ماسەلەلەرى تالقىلاندى.
دەپۋتات دۇيسەنباي تۇرعانوۆ اتىراۋ جۇرتشىلىعىمەن كەزدەستى. اتىراۋ مۇناي وڭدەۋ زاۋىتىنىڭ ۇجىمىمەن بولعان كەزدەسۋدە ول 15 ناۋرىزعا بەلگىلەنگەن رەفەرەندۋم بارشاعا ءوز ۇستانىمىن بىلدىرۋگە جانە ەلدىڭ بولاشاعىنا ىقپال ەتۋگە مۇمكىندىك بەرەتىنىن ايتتى. دەپۋتاتتىڭ ايتۋىنشا, جاڭا كونستيتۋتسيانى ازىرلەۋ كەڭ قوعامدىق تالقىلاۋمەن قاتار ءجۇردى. ازاماتتاردىڭ ۇسىنىستارى eGov جانە eOtinish تسيفرلىق پلاتفورمالارى ارقىلى كەلىپ ءتۇسىپ, ونداعى باستامالاردى كونستيتۋتسيالىق كوميسسيا اشىق فورماتتا قارادى.
«مەملەكەت باسشىسى اتاپ وتكەندەي, ەلىمىزدەگى رەفورمالار ەشقاشان مۇنداي كەڭ ءارى جالپىحالىقتىق دەڭگەيدە تالقىلانعان ەمەس. بۇل – «حالىق ۇنىنە قۇلاق اساتىن مەملەكەت» تۇجىرىمداماسىنىڭ ايقىن كورىنىسى. ۇسىنىلعان وزگەرىستەر – كەيىنگى جىلدارداعى ساياسي جاڭعىرۋلاردىڭ قيسىندى جالعاسى», دەدى د.تۇرعانوۆ.
كەزدەسۋ بارىسىندا كاسىپورىن قىزمەتكەرلەرى ەكولوگيالىق كۇن ءتارتىبى بويىنشا سۇراقتار قويدى. دەپۋتات قۇجاتتا العاش رەت مەملەكەتتىك ساياسات قاعيداتتارىنىڭ ءبىرى رەتىندە ەكولوگيالىق مادەنيەتتى قالىپتاستىرۋ بەكىتىلىپ, قورشاعان ورتانى قورعاۋ باسىمدىقتار قاتارىنا ەنگىزىلگەنىن ايتتى.
وسىنداي كەزدەسۋ 10 مىڭنان اسا ستۋدەنت ءبىلىم الاتىن حالەل دوسمۇحامەدوۆ اتىنداعى اتىراۋ ۋنيۆەرسيتەتىندە دە ءوتتى. باسقوسۋدا جاڭا جالپىۇلتتىق ديالوگ الاڭى – حالىق كەڭەسىن قۇرۋ, سونداي-اق ۆيتسە-پرەزيدەنت ينستيتۋتىن ەنگىزۋ ماسەلەلەرى قىزىعۋشىلىق تۋدىردى.
ستۋدەنتتەر مەن وقىتۋشىلار ادام كاپيتالىن قالىپتاستىرۋ مەن دامىتۋعا قاتىستى نورمالارعا ەرەكشە نازار اۋداردى. جوبادا مەملەكەتتىك مەكەمەلەردەگى ورتا ءبىلىمنىڭ مىندەتتىلىگى مەن كەپىلدىگى, عىلىم مەن يننوۆاتسيانى دامىتۋ ستراتەگيالىق باسىم باعىتتار رەتىندە بەكىتىلەدى. كەزدەسۋگە قاتىسۋشىلاردىڭ پىكىرىنشە, بۇل پەداگوگ ماماندىعىنىڭ الەۋمەتتىك ماڭىزىن كۇشەيتىپ, جاستاردىڭ تۇراقتى دامۋىنا جاعداي جاسايدى.
د.تۇرعانوۆتىڭ «اتىراۋ وبلىسى سۋ ارناسى» ۇجىمىمەن كەزدەسۋدە ەكولوگيالىق باستامالار مەن تابيعي رەسۋرستاردى ۇتىمدى پايدالانۋ ماسەلەلەرى ءسوز بولدى.
«قازترانسويل» كومپانياسىنىڭ ۇجىمىمەن وتكەن جيىندا سەناتور گەننادي شيپوۆسكيح پەن ءماجىلىس دەپۋتاتى مارات ءباشىموۆ رەفورمالاردىڭ كەلەشەگىن تالقىلادى. كەزدەسۋگە ەلىمىزدىڭ 12 وڭىرىنەن جانە شەتەلدىك فيليالداردان كەلگەن بولىمشەلەردىڭ قىزمەتكەرلەرى قاتىستى.
دەپۋتاتتار جاڭا كونستيتۋتسيا جوباسىنىڭ نەگىزگى ەرەجەلەرى تۋرالى بايانداپ, قىزمەتكەرلەردىڭ سۇراقتارىنا جاۋاپ بەردى. ولار ۇسىنىلعان وزگەرىستەر ەڭبەك كەپىلدىگىنە, كاسىبي تۇرعىدا وسۋگە, زاماناۋي تەحنولوگيالاردى ەنگىزۋگە جانە ينفراقۇرىلىمدى دامىتۋعا قالاي اسەر ەتەتىنىن ايتتى.
سونىمەن قاتار ءماجىلىس دەپۋتاتتارى مارات ءباشىموۆ, نۇرگۇل تاۋ, پاۆەل كازانتسەۆ مادەنيەت جانە اقپارات مينيسترلىگىنىڭ ۇجىمىمەن كەزدەستى. ديالوگ بارىسىندا جاڭا كونستيتۋتسيانىڭ باستى نورمالارى, ادام قۇقىعى مەن ەركىندىگىنە باسىمدىق بەرىلۋى, قۇقىقتىق مەملەكەت قاعيداتتارىن نىعايتۋ, بيلىك تارماقتارىنىڭ اراجىگىن اجىراتۋ جانە مەملەكەتتىڭ زايىرلى سيپاتىن ساقتاۋ ماسەلەلەرى قاراستىرىلدى.
ال استانادا دەپۋتاتتار نۇرلان اۋەسباەۆ پەن اجار ساعىندىقوۆا وڭىرلەردىڭ بەلسەندى جاستارىمەن كەزدەستى. جيىنعا قاتىسۋشىلار ۇسىنىلعان كونستيتۋتسيالىق وزگەرىستەرگە, ولاردىڭ مەملەكەتتىك باسقارۋ جۇيەسىنە اسەرىنە جانە ازاماتتاردىڭ قۇقىعىن قورعاۋ تەتىكتەرىنە قىزىعۋشىلىق تانىتتى. جاستار رەفورمالار اياسىنداعى وزگەرىستەرگە دە نازار اۋداردى.
