سۋرەت: inbusiness.kz
القا وتىرىسىندا اگەنتتىك توراعاسى دارحان جازىقباي 2025 جىل مەملەكەتتىك قىزمەت جۇيەسى ينستيتۋتسيونالدىق تۇرعىدان جاڭعىرتىلعان جىل بولعانىن اتاپ ءوتتى.
«بىلتىر مەملەكەتتىك قىزمەتتى دامىتۋدىڭ 2024–2029 جىلدارعا ارنالعان تۇجىرىمداماسىن جۇزەگە اسىرۋ ماقساتىندا «مەملەكەتتىك قىزمەت تۋرالى» جاڭا زاڭ جوباسى ازىرلەنىپ, جەلتوقسان ايىندا ءماجىلىس قاراۋىنا ەنگىزىلدى. بۇل قۇجات قازىرگىدەي تەك ەڭبەك قاتىناستارىن, ياعني مەملەكەتتىك قىزمەتكە كىرۋ, وتكەرۋ, ونى توقتاتۋ ماسەلەلەرىن رەتتەۋمەن شەكتەلمەي, ەڭ باستىسى – مەملەكەتتىك قىزمەتشىلەر مىنەز-قۇلقىنىڭ ادامعا باعدارلانعان ۇلگىسىن بەكىتۋدى كوزدەيدى», دەدى د.جازىقباي.
سونداي-اق وتكەن جىلى پرەزيدەنتتىك جاستار كادر رەزەرۆىنە ءتورتىنشى ىرىكتەۋ كەزەڭى ءوتتى. ناتيجەسىندە, رەزەرۆ 6 باعىت بويىنشا 50 سالالىق بىلىكتى مامانمەن تولىقتى. جىل وتكەن سايىن جوباعا قىزىعۋشىلىق ارتىپ كەلەدى. ماسەلەن, 2019 جىلى 13 مىڭ ازامات قاتىسۋعا نيەت بىلدىرسە, 2025 جىلى بۇل كورسەتكىش 32 مىڭعا جەتتى. جالپى رەزەرۆكە الىنعان 450 ازاماتتىڭ 337-ءسى بۇگىندە ءتۇرلى سالالاردا ەڭبەك ەتىپ جاتىر. وڭىرلىك كادر رەزەرۆتەر دە ناقتى ناتيجە كورسەتتى. 538 رەزەرۆشىنىڭ 260-ى جاڭا لاۋازىمدارعا تاعايىندالىپ, ولاردىڭ 193-ءى جەرگىلىكتى اتقارۋشى ورگانداردا باسشىلىق قىزمەتكە ورنالاستى.
سالادا تالانتتاردى تارتۋدىڭ وزگە دە تەتىكتەرى قولدانىلىپ كەلەدى. 735 ۇزدىك تۇلەك (GPA 3,33-تەن تومەن ەمەس) كونكۋرستان تىس اۋىلدىق جانە اۋداندىق دەڭگەيدەگى لاۋازىمدارعا قابىلداندى. اگەنتتىك 964 جوعارى لاۋازىمعا كونكۋرسسىز تاعايىنداۋدى كەلىسىپ, ولاردىڭ 19,5%-ى كۆازيمەملەكەتتىك, جەكە سەكتور وكىلدەرى بولدى.
– «E-قىزمەت» جۇيەسىنىڭ تاجىريبەسى الەمدىك دەڭگەيدە جوعارى باعالاندى. اشىپ ايتساق, ەكونوميكالىق ىنتىماقتاستىق پەن دامۋ ۇيىمىنىڭ حالىقارالىق OPSI پلاتفورماسىندا مەملەكەتتىك سەكتورداعى ۇزدىك يننوۆاتسيالىق جوبا رەتىندە جاريالاندى. بۇل ەلىمىزدىڭ مەملەكەتتىك قىزمەتتەگى پەرسونالدى باسقارۋدى تسيفرلاندىرۋداعى جەتىستىگىنىڭ جاھاندىق دەڭگەيدە مويىندالۋىن بىلدىرەدى. ەل تاجىريبەسى وزگە ەلدەرگە ۇتىمدى تاجىريبە رەتىندە ۇسىنىلادى. قازىرگى تاڭدا بىرقاتار مەملەكەت قازاقستاندىق مودەلگە قىزىعۋشىلىق تانىتىپ وتىر, – دەدى اگەنتتىك توراعاسى.
بىلتىر «بىرىڭعاي كادرلىق جۇيە» ارقىلى بيۋدجەتتىك ۇيىمدارداعى كادرلىق ءىس جۇرگىزۋ تولىق اۆتوماتتاندىرىلدى. جوسپارلانعان 2,4 مىڭ ۇيىمنىڭ ورنىنا 2,9 مىڭ ۇيىم جۇيەگە قوسىلدى. 482 مىڭ قىزمەتكەردىڭ تسيفرلىق ءپروفيلى قالىپتاستىرىلدى. پرواكتيۆتى باقىلاۋ تەتىكتەرى ەنگىزىلىپ, مۇددەلەر قاقتىعىسىن اۆتوماتتى تۇردە انىقتاۋ مۇمكىندىگى ىسكە قوسىلدى.
جاساندى ينتەللەكت قۇرالدارىن ەنگىزۋ, مەملەكەتتىك قىزمەتشىلەردى وقىتۋ جۇمىسى جالعاستى. مەملەكەتتىك باسقارۋ اكادەمياسىندا «تسيفرلىق مەملەكەتتىك باسقارۋ» ماگيسترلىك باعدارلاماسى ىسكە قوسىلدى.
«AI Qyzmet» باعدارلاماسى نەگىزىندە 52 مىڭنان اسا اكىمشىلىك قىزمەتشى وقىتىلدى, ال «AI Governance 500» باعدارلاماسى اياسىندا 100 ساياسي قىزمەتشى ءبىلىم الدى.
مەملەكەتتىك قىزمەت كورسەتۋ سالاسىندا سەرۆيستىك, كليەنتكە باعدارلانعان مودەل نىعايتىلدى. قاشىقتان مونيتورينگ ناتيجەسىندە 2 600-دەن اسا ازاماتتىڭ قۇقىعى پرواكتيۆتى تۇردە قالپىنا كەلتىرىلدى. مەملەكەتتىك قىزمەتشىلەردىڭ قۇقىقتارىن قورعاۋ, ادەپ نورمالارىن ساقتاۋ ماسەلەسىنە دە ەرەكشە نازار اۋدارىلدى. بىلتىر 19 007 بۇزۋشىلىق انىقتالدى. پروفيلاكتيكالىق جۇمىس اياسىندا 28 مىڭنان اسا ءىس-شارا وتكىزىلدى.
مەملەكەتتىك اپپاراتتى بيۋروكراتيادان ارىلتۋ جۇمىسى اياسىندا 1 335 ۇسىنىس ازىرلەنىپ, ونىڭ 406-سى ىسكە اسىرىلدى. جۇرگىزىلگەن تالداۋلار ناتيجەسىندە ميللياردتاعان تەڭگە كولەمىندەگى تاۋەكەلدەردىڭ الدىن الۋ شارالارى قابىلداندى.
ايتا كەتەيىك, جيىنعا پرەزيدەنت اكىمشىلىگىنىڭ وكىلدەرى, ءماجىلىس دەپۋتاتتارى, ۇلتتىق قاۋىپسىزدىك كوميتەتى باسشىلىعى, پرەزيدەنت جانىنداعى مەملەكەتتىك باسقارۋ اكادەمياسى, اگەنتتىك جانىنداعى قوعامدىق كەڭەس, ادەپ جونىندەگى كوميسسيا, بيۋروكراتيادان ارىلتۋ جانە سىبايلاس جەمقورلىققا قارسى ساياساتتى ىسكە اسىرۋ جونىندەگى كونسۋلتاتيۆتىك-ساراپتامالىق توپ مۇشەلەرى, سونداي-اق اگەنتتىكتىڭ اۋماقتىق بولىمشەلەرى مەن مەملەكەتتىك باسقارۋ اكادەمياسىنىڭ فيليالدارى ونلاين قاتىستى.
