«شاحماتشى قونجىق» پوەتيكالىق ەرتەگىسى 4-12 جاس ارالىعىنداعى بالالارعا ارنالعان. زاماناۋي ەرتەگى بالانىڭ ءتىلىن دامىتۋعا, ويلاۋ قابىلەتىن جەتىلدىرۋگە, ەموتسيالىق مادەنيەتى مەن قۇندىلىقتارىن قالىپتاستىرۋعا باعىتتالعان.
جوبا اۆتورى, لينگۆا-پەداگوگ لاريسا الدابەرگەننىڭ ايتۋىنشا, ء«تاتتى ەرتەگى» باستاماسى 2024 جىلى الەۋمەتتىك جوبا رەتىندە دۇنيەگە كەلگەن.
«بۇعان سەبەپ – ءبىر عانا بالانىڭ «اناشىم, ماعان ەرتەگى وقىپ بەرشى» دەگەن ءبىر اۋىز ءسوزى. مەكتەپتەر مەن بالاباقشالاردى ارالاپ, قانداي ەرتەگىلەر وقىلىپ جاتقانىن سارالاعاندا, ءبىر بايقاعانىمىز – كوپتەگەن تۋىندى شەت تىلىنەن اۋدارىلعان. وسىلايشا, ءبىز قازاق تىلىندە جازىلعان, ۇلتتىق نەگىزى بار جاڭا ەرتەگى قاجەت دەگەن شەشىمگە كەلدىك. سودان سوڭ اقىن, جۋرناليست بايتاناعالي تولەنتاەۆتىڭ 72 شۋماقتان تۇراتىن وسى پوەمالىق ەرتەگىسى نازارىمىزعا ىلىكتى. اتا-انالارمەن اقىلداسا كەلە, قازاقشا جازىلعان جاڭا كەيىپكەر – قونجىقتى بالالار ادەبيەتىنە ەنگىزۋدى ءجون كوردىك», دەيدى جوبا اۆتورى.
كىتاپ يلليۋستراتسياسىنا التى اي ۋاقىت جۇمسالعان. سۋرەتشى جانسايا دامىس ءار كەيىپكەردىڭ بەينەسىن بالا-نىڭ قابىلداۋىنا ساي ەتىپ جاساعانى كورىنىپ-اق تۇر. جوبا ەكى جىل بويى ساراپتامادان, وقۋ-اعارتۋ مينيسترلىگىنىڭ قوسىمشا ءبىلىم بەرۋ دەپارتامەنتى ماماندارىنىڭ تالقىلاۋىنان وتكەن. ايتا كەتەيىك, بۇل باستاما ء«تاپ-ءتاتتى» كونديتەرلىك ۇيىمىنىڭ قولداۋىمەن جۇزەگە اسىپ, كەيىن جوباعا حالىقارالىق «قازاق ءتىلى» قوعامىنىڭ استانا قالالىق فيليالى مەن حالىقارالىق تۇركى تىلدەس مۇعالىمدەر ۇيىمى سەرىكتەس رەتىندە قوسىلعان. بۇگىندە كىتاپ 30-دان استام ءبىلىم ۇيىمىندا قولدانىسقا ەنگەن. جوبا جەتەكشىسىنىڭ ايتۋىنشا, يتاليا مەن گەرمانيادا وسى كىتاپتىڭ تۇساۋكەسەرىن وتكىزۋ جوسپارلانىپ وتىر. اعىلشىن تىلىندەگى نۇسقاسى دا دايىن كورىنەدى. بۇگىندە ء«تاتتى ەرتەگى» جوباسىنىڭ اينالاسىندا 40-قا جۋىق پەداگوگ پەن ەرىكتى توپتاسقان. ۇيىمداستىرۋشىلار الداعى ۋاقىتتا ء«تاتتى كىتاپتار» سەرياسىن جالعاستىرۋدى كوزدەپ وتىر.
