ۆيدەودان الىنعان كادر
تاياۋ شىعىستاعى احۋالدىڭ ۋشىعۋى مەن اۋە كەڭىستىگىنىڭ جابىلۋىنا بايلانىستى جۇزدەگەن قازاقستان ازاماتى ءباا اۋماعىنداعى قوناقۇيلەر مەن اۋەجايلاردا قالىپ قويعان. قازىرگى ۋاقىتتا سول جەردە جۇرگەن تۋريستەردىڭ ايتۋىنشا, كەيبىر ازاماتتاردىڭ قوناقۇيدەگى تۇرۋ مەرزىمى ۇزارتىلماعان.
«دەمالىسىمىز ناعىز قيىندىققا ۇلاستى. اۋەجايدا ناقتى اقپارات بەرىلمەيدى. تۋروپەراتورلار جاۋاپكەرشىلىكتەن باس تارتىپ, جاعدايدى ءوز مويىندارىنا الماي وتىر. بالالارىمىزبەن بىرگە دالادا قالۋ قاۋپى بار. قۇرمەتتى پرەزيدەنت, بىزگە قولداۋ كورسەتۋلەرىڭىزدى سۇرايمىز», دەلىنگەن بەينەۇندەۋدە.
وتانداستارىمىز الەۋمەتتىك جەلىدە 2-3 ناۋرىزعا جوسپارلانعان رەيستەرىنىڭ توقتاتىلعانىن, اۋەجايدىڭ جابىلعانىن, قوناقۇي باعاسىنىڭ كۇرت وسكەنىن جازىپ جاتىر.
ولار سىرتقى ىستەر مينيسترلىگىنەن شۇعىل شارا قابىلداپ, ازاماتتاردىڭ ەلگە امان-ەسەن ورالۋىنا جاردەمدەسۋدى تالاپ ەتىپ وتىر.
يرانداعى مەكتەپكە جاسالعان شابۋىل: قازا تاپقان وقۋشىلاردىڭ سانى 150-گە جۋىقتادى
دۋبايداعى قازاقستان كونسۋلدىعىنىڭ وكىلى ءالنۇر امانبەك رەيستەردىڭ كەشىگۋىنە بايلانىستى اۋە كومپانياسى بارلىق شىعىندى تولىق وتەي المايتىنىن مالىمدەگەن. ونىڭ ايتۋىنشا, قوناقۇي اقىسى تولەنبەيتىندىكتەن, كەي ازاماتتارعا ۋاقىتشا قارجىلىق ماسەلەنى شەشۋ ءۇشىن تۋىستارى مەن تانىستارىنان قارىز سۇراۋ نەمەسە نەسيە راسىمدەۋ قاجەتتىگى تۋىنداۋى مۇمكىن.
كونسۋل وكىلىنىڭ سوزىنشە, Air Astana قوناقۇيلەردەگى ورنالاستىرۋ شىعىندارىن تولىق جابا المايتىنىن حابارلاعان. قازىرگى ۋاقىتتا كومپانيا باسشىلىعىمەن كەلىسسوزدەر جۇرگىزىلىپ جاتىر. سونداي-اق قوناقۇيلەرمەن ارنايى تومەندەتىلگەن باعا بويىنشا كەلىسىم جاساۋ ماسەلەسى قاراستىرىلۋدا. الايدا شىعىن كولەمى ۇلكەن بولعاندىقتان, ونى تولىق وتەۋ مۇمكىن ەمەس. شەتەلدە قالىپ قويعان ەل ازاماتتارىنىڭ سانى 15 مىڭنان اسادى, ءارى ارقايسىنىڭ جاعدايى ءارتۇرلى.
قازىرگى تاڭدا ديپلوماتتار ەل ازاماتتارى مەن تۋريستىك اگەنتتىكتەردىڭ ناقتى ءتىزىمىن جاساقتاپ جاتىر. تۋروپەراتور ارقىلى بارعان تۋريستەردىڭ شىعىنىن سول اگەنتتىكتەر وتەۋى ءتيىس دەگەن ۇسىنىس ايتىلۋدا. ال جولدامانى ءوز بەتىنشە العان ازاماتتار ءۇشىن قوناقۇي تاراپىنان جەڭىلدىكتەر قاراستىرۋ كوزدەلىپ وتىر.
يران اياتوللا حامەنەيدىڭ قازاسىن راستادى: ەلدە 40 كۇندىك ازا تۇتۋ جاريالاندى
سونىمەن بىرگە, امىرلىكتەر بيلىگى بەلگىلى ءبىر دەڭگەيدە كومەك كورسەتۋگە دايىن ەكەنىن بىلدىرگەن. قازاقستان تاراپى ءتيىستى جوعارى ورگاندارعا رەسمي تۇردە جۇگىنىپ, وتانداستاردىڭ قوناقۇيدە تۇرۋىنا كەتكەن شىعىندى وتەۋ ماسەلەسىن كوتەرمەك.
