سۋرەتتى تۇسىرگەن – ەرلان ومار, «ەQ»
وسىمەن ءۇشىنشى رەت ازەربايجان, وزبەكستان, قازاقستان, رەسەي, وڭتۇستىك كورەيا ەلدەرىنىڭ تاۋداعى كۋرورتتارىن توعىستىرىپ وتىرعان وتاندىق ەتكا جوباسى تابىسسىز دا ەمەس. فەستيۆالدىڭ العاشقى كۇنىندە-اق شىمبۇلاق پەن ەۋرازيانىڭ ايگىلى كۋرورتتارى جاسىل حارتياعا قول قويىپ ۇلگەردى. فەستيۆال بۇعان دەيىن ازەربايجانداعى «شاحداگ» تاۋ كۋرورتىندا وتكىزىلسە, كەلەسى باسقوسۋ تاشكەنت ماڭىنداعى «اميرسويدا» جوسپارلانعان.
«Oi-Qaragai» تاۋ كۋرورتىنىڭ اقتاس بازاسىنان باستاۋ العان فەستيۆالدىڭ باستى وقيعاسى – «Kazakh tourism development» (KTD) كومپانياسى قولعا الىپ وتىرعان «Almaty superski» تاۋ-شاڭعى كۋرورتى جوباسىنىڭ تانىستىرىلۋى.
كومپانيانىڭ باس اتقارۋشى ديرەكتورى ەرجان ەركىنباەۆ حالىقارالىق دەڭگەيدەگى جاڭا تاۋ-شاڭعى كۋرورتى 5 مىڭعا جۋىق ادامعا جۇمىس تاۋىپ بەرىپ, شىمبۇلاق پەن ونىڭ اينالاسىنداعى كىشىگىرىم دەمالىس ورىندارىنا تۇسەتىن سالماقتى دا بولىسەتىنىن اتاپ ءوتتى. ءبىر جاعىنان بۇل جوبا ايماقتاعى ەڭ ءىرى جۇمىس بەرۋشىگە اينالا وتىرىپ, شاھارداعى شاعىن جانە ورتا بيزنەستىڭ دامۋىنا سەرپىن بەرمەك.
«Almaty superski» جوباسىنىڭ اياسىندا ءارتۇرلى دەڭگەيدەگى 60 شاقىرىمدىق شاڭعى تراسساسىن, كۇنىنە 10 مىڭداي ادامدى تاسىمالداي الاتىن وزىق تەحنولوگيالى 16 اسپالى جول سالۋ قاراستىرىلعان.
ەڭ باستىسى, كەزەكتى تاۋ-شاڭعى كۋرورتىنىڭ ەكولوگياعا, قورشاعان ورتاعا كەسىرى تيمەگەنى دە كەرەك. سوندىقتان ESG-قاعيداتتارىنىڭ اشىقتىعى مەن ساقتالۋىن قامتاماسىز ەتۋ, CO₂ شىعىندارىن قاداعالاۋ جۇيەسى ەنگىزىلىپ وتىر.
جالپى العاندا, جوبا ىلە-الاتاۋى مەملەكەتتىك ۇلتتىق تابيعي پاركىنىڭ شامامەن 1002 گەكتارىن نەمەسە 0,5%-داي اۋماعىن الادى. وسى اۋماقتىڭ 20 گەكتارىندا كۋرورتتىق اۋىل, ياعني دەمالىس ورنىن سالۋ جوسپارلانعان.
KTD باس اتقارۋشى ديرەكتورى ە.ەركىنباەۆ «Almaty superski» جاي عانا تاۋ-شاڭعى كۋرورتى ەمەس, ەكونوميكانى ارتاراپتاندىرۋعا, تۋريزم مەن بۇقارالىق سپورتتى دامىتۋعا باعىتتالعان باستاما ەكەندىگىنە توقتالدى.
جاڭا جوبا الماتى تاۋ كلاستەرىنىڭ وزەگىنە اينالىپ, ەلىمىزدىڭ الەۋەتى زور تاۋ ءتۋريزمى سالاسىندا وزىندىك حالىقارالىق برەندىن قالىپتاستىرىپ, ەلدىڭ جاھاندىق تۋريستىك نارىقتاعى بەدەلىن ارتتىرۋعا مۇمكىندىك بەرەدى.
سۋرەتتى تۇسىرگەن – يۋري بەككەر
بۇل جوبادان بولەك, فەستيۆالدا «Shymbulak» پەن ەۋرازيانىڭ ايگىلى كۋرورتتارى جاسىل حارتياعا قول قويدى. ەۋرازيا كەڭىستىگىندەگى تاۋ ءتۋريزمى يندۋسترياسىنىڭ تۇراقتى دامۋىنىڭ ورتاق قاعيداتتارىن ايقىندايتىن ستراتەگيالىق قۇجات تاۋ ەكوجۇيەلەرىن ساقتاۋ, كليماتقا كەرى اسەرىن ازايتۋ, تابيعي رەسۋرستاردى ۇتىمدى پايدالانۋ سىندى ەكولوگيالىق تالاپتارعا ساي باسقارۋ تاجىريبەلەرىن دامىتۋ باعىتىندا كۋرورتتاردىڭ ورتاق جاۋاپكەرشىلىگىن قۋاتتايدى. حارتيا ەرىكتى تۇردە قابىلدانادى ءارى وعان وزگە دە تاۋ كۋرورتتارى قوسىلا الادى.
قۇجاتتىڭ ارنايى بولىمىندە اشىقتىق, ارىپتەستىك پەن ۇتىمدىلىق قاعيداتتارى قامتىلعان. بۇل بيزنەس, مەملەكەت, جەرگىلىكتى قاۋىمداستىقتار مەن عىلىمي ۇيىمدار اراسىنداعى ءوزارا ءىس-قيمىلدى دامىتۋدى كوزدەيدى. قول قويۋشى تاراپتاردىڭ بىرلەسكەن باستامالارىن ەتكا-نىڭ تۇراقتى دامۋ جونىندەگى ساراپتامالىق پلاتفورماسى ۇيلەستىرىپ وتىرادى.
وسى ورايدا «Shymbulak» كۋرورتىنىڭ باس ديرەكتورى رينات ابدراحمانوۆ: «شىمبۇلاق ءۇشىن جاسىل حارتيانى قابىلداۋ – كەيىنگى جىلدارى جۇيەلى تۇردە اتقارىپ كەلە جاتقان جۇمىسىمىزدىڭ زاڭدى جالعاسى. تاۋ كۋرورتى ەكولوگيالىق تەپە-تەڭدىكتى ساقتاماي دامي المايدى. تابيعي لاندشافتاردى قورعاۋ, رەسۋرستاردى جاۋاپكەرشىلىكپەن باسقارۋ, كليماتقا اسەردى ازايتۋ – سالانىڭ ۇزاقمەرزىمدى تۇراقتىلىعىنىڭ نەگىزى», دەپ اتاپ ءوتتى.
جاسىل حارتياعا ەتكا قۇرامىنداعى «Shymbulak Mountain Resort» (قازاقستان), «Oi-Qaragai Mountain Resort» (قازاقستان), «Amirsoy Mountain Resort» (وزبەكستان), «Rosa Khutor» (رەسەي), «Shahdag Mountain Resort» (ازەربايجان), «Grandvalira Andorra» (اندوررا, ەو) سياقتى ايگىلى كۋرورتتار قول قويىپ وتىر. مۇنداي مامىلە, كەلىسىمدەردىڭ پايدالى تۇستارى كوپ. اليانسقا مۇشە ەلدەر كۋرورتتارىنىڭ كليەنتتەرى ءتۇرلى جەڭىلدىكتەرى بار ەتكا-نىڭ بىرەگەي سكي-پاس كارتالارىن قولدانا الادى. زاماناۋي ماركەتينگ دەگەنىمىز دە وسى.
ەۋرازيالىق تاۋ كۋرورتتارى اليانسى 2023 جىلى ەۋرازياداعى جەتەكشى تاۋ كۋرورتتارىنىڭ باستاماسىمەن قۇرىلعان. اليانستىڭ ماقساتى – تاۋ ءتۋريزمى باسقارۋ سالاسىنداعى كۇش-جىگەردى بىرىكتىرۋ, تۋريستىك قىزمەت ساپاسىن ارتتىرۋ, سپورتتىق الەۋەتتى دامىتا وتىرىپ, تۇراقتى تاۋ ءتۋريزمىنىڭ ۇزدىك تاجىريبەلەرىن ىلگەرىلەتۋ. اليانستىڭ شتاب-پاتەرى الماتى قالاسىندا ورنالاسقان. ەتكا قۇرامىنا ەلىمىزدىڭ «Shymbulak», «Oi-Qaragai», ازەربايجاننىڭ «Shahdag», وزبەكستاننىڭ «Amirsoy», رەسەيدىڭ «Rosa Khutor», سونداي-اق وڭتۇستىك كورەيانىڭ «Mona Yong Pyong» كۋرورتتارى كىرەدى. 24 اقپاندا «Grandvalira Resorts Andorra» كۋرورتى اليانسقا قوسىلۋعا نيەتتتى ەكەنى تۋرالى مەموراندۋمعا قول قويدى.
سول سياقتى الماتىدا ەۋرازيالىق تاۋ كۋرورتتارى اليانسى (ەتكا) مەن اندورراداعى ەڭ ءىرى تاۋ كۋرورتتارى جەلىسى – «Grandvalira Resorts Andorra» اراسىندا ءوزارا تۇسىنىستىك تۋرالى مەموراندۋمعا قول قويىلدى. بۇل مامىلە دە Grandvalira-نىڭ اليانس قۇرامىنا قوسىلۋعا نيەتتى ەكەندىگىن, وعان قوسا تاۋ ءتۋريزمى سالاسىندا كوپجاقتى ىنتىماقتاستىقتى دامىتۋعا دايىن ەكەنىن ايعاقتايدى. ەتكا اتىنان مەموراندۋمعا اليانستىڭ باس حاتشىسى اندرەي كۋكۋشكين, «Grandvalira Resorts Andorra» اتىنان تاۋ بيزنەسىن دامىتۋ ديرەكتورى رومان سەررا قول قويدى.
الماتىداعى ەۋرازيالىق تاۋ كۋرورتتارى اليانسىنىڭ III فەستيۆالى جۇماعا دەيىن جالعاسادى.
الماتى
