«قازاقستانداعى تەمىرجول بايلانىسىن ترانسفورماتسيالاۋ (ورتا ءدالىزدى دامىتۋ)» جوباسى ەلدىڭ تەمىرجول جەلىسىنىڭ تيىمدىلىگى مەن ورنىقتىلىعىن ارتتىرۋعا, سونداي-اق ۇلتتىق تەمىرجول وپەراتورى – «قازاقستان تەمىر جولى» ۇلتتىق كومپانياسى» اكتسيونەرلىك قوعامىنىڭ قارجىلىق تۇراقتىلىعى مەن كوممەرتسيالىق ومىرشەڭدىگىن نىعايتۋعا باعىتتالعان.
جوبا قازاقستاننىڭ ەۋرازياداعى نەگىزگى ترانزيتتىك-لوگيستيكالىق حاب رەتىندەگى ءرولىن كۇشەيتىپ, ەكونوميكالىق وسىمگە, وڭىرلىك ىقپالداستىققا جانە كليماتتىق تۇراقتىلىقتى ارتتىرۋعا ىقپال ەتەدى.
دۇنيەجۇزىلىك بانكتىڭ قازاقستان مەن تۇرىكمەنستانداعى تۇراقتى وكىلى اندرەي ميحنەۆتىڭ ايتۋىنشا, جوبا ستراتەگيالىق ينفراقۇرىلىمعا ينۆەستيتسيا سالۋمەن قاتار, «قازاقستان تەمىر جولى» كومپانياسىنىڭ قارجىلىق تۇراقتىلىعى مەن ۇزاق مەرزىمدى باسەكەگە قابىلەتتىلىگىن كۇشەيتەتىن ماڭىزدى رەفورمالاردى قولدايدى. كەزەڭ-كەزەڭىمەن جۇزەگە اسىرىلاتىن ينۆەستيتسيالار, ينستيتۋتسيونالدىق وزگەرىستەر جانە جەكە كاپيتالدى تارتۋ زاماناۋي تەمىرجول جۇيەسىن قالىپتاستىرۋعا جول اشادى.
جوبا ەكى نەگىزگى قۇرامداس بولىكتەن تۇرادى: تەمىرجول ينفراقۇرىلىمىنا ينۆەستيتسيا سالۋ جانە ينستيتۋتسيونالدىق قولداۋ كورسەتۋ.
ءبىرىنشى باعىت مويىنتى مەن قىزىلجار اراسىنداعى ۇزىندىعى 322,3 شاقىرىم جاڭا تەمىرجول جەلىسىنىڭ قۇرىلىسىن قارجىلاندىرۋدى كوزدەيدى. بۇل ماڭىزدى ۋچاسكە جەلىدەگى اينالما باعىتتى جويىپ, ءدالىزدىڭ ۇزىندىعىن 149 شاقىرىمعا قىسقارتادى, جۇكتەمەسى جوعارى بولىكتەردەگى قىسىمدى ازايتادى جانە ەكى قاباتتى كونتەينەرلىك پويىزداردى پايدالانۋعا مۇمكىندىك بەرەدى. جاڭا تەمىرجول جەلىسى زاماناۋي سيگنال بەرۋ جانە تەلەكوممۋنيكاتسيا جۇيەلەرىمەن جابدىقتالىپ, بولاشاقتا كەڭەيتۋگە بەيىمدەلەدى.
ەكىنشى باعىت «قازاقستان تەمىر جولى» كومپانياسىنا تەحنيكالىق قولداۋ كورسەتۋدى جانە ينستيتۋتسيونالدىق نىعايتۋدى قامتيدى. اتاپ ايتقاندا, تاريفتىك رەفورمالاردى جۇزەگە اسىرۋعا قولداۋ كورسەتۋ, بالامالى قارجىلاندىرۋ تەتىكتەرىن زەردەلەۋ, قارجىلىق جانە ەكولوگيالىق باسقارۋ جۇيەسىن جەتىلدىرۋ, سونداي-اق بولاشاقتا اكتسيالاردى باستاپقى جاريا ورنالاستىرۋعا دايىندىق جۇرگىزۋ قاراستىرىلعان.
جوبا 2030 جىلعا قاراي ورتا ءدالىز ارقىلى جۇك تاسىمالى كولەمىن ءۇش ەسەگە ارتتىرۋعا جانە ترانزيتتىك جەتكىزۋ ۋاقىتىن ەكى ەسەگە قىسقارتۋعا ەلەۋلى ۇلەس قوسادى دەپ كۇتىلەدى. جۇكتەردى اۆتوموبيل كولىگىنەن تەمىرجولعا كوشىرۋ تاسىمالعا بايلانىستى زياندى شىعارىندىلاردى ازايتىپ, قازاقستاننىڭ كليماتتىق مىندەتتەمەلەرىن ورىنداۋىنا جانە تۇراقتى دامۋ ماقساتتارىنا قول جەتكىزۋىنە ىقپال ەتەدى.
سونىمەن قاتار زاماناۋي, كليماتتىق وزگەرىستەرگە ءتوزىمدى ينفراقۇرىلىمعا سالىنعان ينۆەستيتسيالار نارىقتارعا قولجەتىمدىلىكتى ارتتىرىپ, ساۋدا شىعىندارىن تومەندەتەدى, جاڭا جۇمىس ورىندارىن اشۋعا جانە جاڭا تەمىرجول جەلىسى بويىنداعى ەلدى مەكەندەردىڭ جەرگىلىكتى ەكونوميكاسىن دامىتۋعا سەرپىن بەرەدى.
جوبا كەزەڭ-كەزەڭىمەن ىسكە اسىرىلاتىن كوپفازالى باعدارلامالىق ءتاسىل اياسىندا جۇزەگە اسىرىلادى. بۇل ءتاسىل تاجىريبە جيناقتاۋعا جانە ۋاقىت وتە كەلە مەملەكەتتىك كەپىلدىكتەرگە تاۋەلدىلىكتى بىرتىندەپ ازايتۋعا مۇمكىندىك بەرەدى. جوبا ورتا ءدالىزدى دامىتۋ جونىندەگى بىرلەسكەن جوسپاردىڭ ءبىر بولىگى بولىپ تابىلادى. اتالعان جوسپار حالىقارالىق قايتا قۇرۋ جانە دامۋ بانكى, حالىقارالىق قارجى كورپوراتسياسى جانە ينۆەستيتسيالارعا كەپىلدىك بەرۋ جونىندەگى كوپجاقتى اگەنتتىكتىڭ ساراپتامالىق ءبىلىمى مەن قارجىلىق قۇرالدارىن بىرىكتىرەدى.
قازاقستان مەن دۇنيەجۇزىلىك بانك 2031 جىلعا دەيىنگى ىنتىماقتاستىق ستراتەگياسىن تالقىلادى
جوبا اياسىندا 1,41 ميلليارد اقش دوللارى كولەمىندە جەكە قارجىلاندىرۋ جۇمىلدىرىلدى. ونىڭ ىشىندە 846 ميلليون دوللار – حالىقارالىق قايتا قۇرۋ جانە دامۋ بانكىنىڭ كەپىلدىگى, ال 564 ميلليون دوللار – ازيا ينفراقۇرىلىمدىق ينۆەستيتسيالار بانكىنىڭ بىرلەسكەن كەپىلدىگى ارقىلى قامتاماسىز ەتىلەدى.
دۇنيەجۇزىلىك بانكتىڭ SPI-2024 رەيتينگىندە قازاقستان نەشىنشى ورىندا تۇر؟
