سۋرەت «ەگەمەن قازاقستاننىڭ» ارحيۆىنەن الىندى
مەملەكەتتىك ەڭبەك ينسپەكتسياسى كوميتەتى اتىراۋ وبلىستىق دەپارتامەنتىنىڭ باسشىسى يگىلىك اۋباكىروۆتىڭ مالىمەتىنشە, بىلتىر قۇقىعى بۇزىلعان 3549 ادامنان ءوتىنىش ءتۇسىپتى. ونىڭ ىشىندە 3060 ءوتىنىش زاڭعا سايكەس زەردەلەنىپ, ءتيىستى شەشىم قابىلدانعان.
«مەملەكەتتىك ەڭبەك ينسپەكتسياسى ءۇشىن باستى باسىمدىق – ازاماتتاردىڭ ەڭبەك قۇقىقتارىن قورعاۋ. بارلىق ءوتىنىش «حالىق ۇنىنە قۇلاق اساتىن مەملەكەت» تۇجىرىمداماسى اياسىندا قارالىپ, ءار ماسەلە جەكە باقىلاۋعا الىندى. بىلتىر اتىراۋ وبلىسىنداعى كاسىپورىنداردا 54 وندىرىستىك جازاتايىم وقيعا تىركەلدى. سونىڭ سالدارىنان 8 ادام قايتىس بولدى. وقيعالاردىڭ باسىم بولىگى جۇمىس بەرۋشىلەردىڭ قاۋىپسىزدىك تالاپتارىن ساقتاماۋىنان تۋىنداعان. وسىعان بايلانىستى مىندەتتى ساقتاندىرۋ ماسەلەسىنە ەرەكشە نازار اۋدارىلىپ وتىر», دەيدى دەپارتامەنت باسشىسى.
ەڭبەك زاڭناماسىنىڭ ساقتالۋىنا قاتىستى 333 تەكسەرۋ جۇرگىزىلگەن. تەكسەرۋ كەزىندە ەڭبەك زاڭدىلىعىن بۇزۋمەن بايلانىستى 353 دەرەك انىقتالىپ, 201 جۇمىس بەرۋشىگە اكىمشىلىك حاتتاما تولتىرىلعان. زاڭ تالابىن بۇزعاندارعا 38,8 ملن تەڭگە ايىپپۇل سالىنعان. انىقتالعان كەمشىلىكتەردى جويۋعا 225 نۇسقاۋ بەرىلگەن.
قازىر وبلىستا مىندەتتى ساقتاندىرۋمەن قامتۋ دەڭگەيى 71%-دى قۇرايدى. بۇل وزەكتى ماسەلەگە اينالعاندىقتان, ساقتاندىرۋ شارتىن جاساماعان كاسىپورىندارعا ءتۇسىندىرۋ جۇمىسى جۇرگىزىلىپ جاتىر. ەڭبەك تاۋەكەلى كارتاسىنا 3 062 كاسىپورىن ەنگىزىلگەن. ونىڭ ىشىندە 110 كاسىپورىن جوعارى تاۋەكەل ساناتىنا جاتقىزىلعان. ءتيىستى ورگاننىڭ قابىلداعان شارالارىنىڭ ناتيجەسىندە 43 كاسىپورىن بۇل ساناتتان شىعارىلعان.
«نەگىزگى ەكى ماسەلەگە باسا نازار اۋدارىپ وتىرمىز. ءبىرىنشىسى – جالاقىنى تولەۋدى كەشىكتىرۋ, ەكىنشىسى – الەۋمەتتىك تولەمدەردى ۋاقىتىندا اۋدارماۋ. جالاقى بەرەشەگىن وتەۋدى جىلدامداتۋعا باسىمدىق بەرىلدى. وسىعان بايلانىستى ناقتى جۇمىس قولعا الىنىپ, بىلتىر 45 كاسىپورىننان 115 ملن تەڭگە جالاقى قارىزى ءوندىرىلدى. وسىلايشا, 184 جۇمىسشىنىڭ قۇقىعى قورعالدى. قازىر وبلىستا 11 كاسىپورىننىڭ 90 قىزمەتكەرگە 43,1 ملن تەڭگە جالاقى قارىزى بار», دەيدى ي.اۋباكىروۆ.
وڭىرلىك دەپارتامەنتتەگى ەڭبەك قاۋىپسىزدىگىن باقىلاۋ ءبولىمىنىڭ باسشىسى يسلام يگامبەرديەۆتىڭ دەرەگىنە قاراعاندا, 226 وندىرىستىك نىسانعا ەڭبەك جاعدايىنا بايلانىستى اتتەستاتسيالاۋ جۇرگىزىلدى. ماقسات – جازاتايىم وقيعالاردىڭ الدىن الۋ. قاۋىپسىزدىك تالاپتارىن ەلەمەگەن 33 مەكەمەگە 12 ملن تەڭگەدەن استام ايىپپۇل سالىندى. سوعان قاراماستان وندىرىستەگى جازاتايىم وقيعالاردى جاسىراتىندار بار. وسىنداي 17 مەكەمەگە 3 ملن 342 مىڭ تەڭگە كولەمىندە ايىپپۇل سالۋعا ۇيعارىم جاسالدى.
وبلىستىق پروكۋراتۋرانىڭ ءباسپاسوز قىزمەتىنەن ءمالىم ەتكەندەي, يساتاي اۋدانىندا 7 كاسىپكەرلىك سۋبەكتىسىندە جۇمىسشىلارمەن جازاتايىم وقيعادان مىندەتتى ساقتاندىرۋ شارتى جاسالماعانى انىقتالعان. سونىڭ سالدارىنان جۇمىس بەرۋشىلەر تاراپىنان 45 جۇمىسشىنىڭ قۇقى بۇزىلىپ وتىر. جۇمىسشىلار قۇرىلىس, دەنساۋلىق ساقتاۋ سالاسىندا جۇمىس ىستەگەن.
«اتالعان دەرەك كونستيتۋتسيانىڭ 24-بابىنا, سونداي-اق ەڭبەك كودەكسىنىڭ تالاپتارىنا قايشى كەلەدى. پروكۋرورلىق قاداعالاۋ اكتىسى نەگىزىندە كىنالى تۇلعالار اكىمشىلىك قۇقىق بۇزۋشىلىق تۋرالى كودەكستىڭ 230-بابىنىڭ 2-بولىگىمەن اكىمشىلىك جاۋاپكەرشىلىككە تارتىلدى. قازىر 45 جۇمىسشى مىندەتتى ساقتاندىرۋمەن قامتاماسىز ەتىلدى», دەپ حابارلادى وبلىستىق پروكۋراتۋرانىڭ ءباسپاسوز قىزمەتى.
اتىراۋ وبلىسى
