شەنول جادىك گەرمانيانىڭ ماينتس قالاسىندا دۇنيەگە كەلگەن. ءتورت بالانىڭ اكەسى, التى ءتىلدى ەركىن مەڭگەرگەن ازامات. ونىمەن استانادا وتكەن وتانداس عالىمدار فورۋمىندا تانىسىپ, ءومىر-دەرەگىن, عىلىمي جولىن سۇراپ, ءبىراز دەرەككە قانىقتىق. ول ءوزىن تەك بەلگىلى ءبىر ەلدىڭ مامانى ەمەس, جاھاندىق مەديتسينالىق كەڭىستىكتىڭ وكىلى رەتىندە قاراستىرادى ەكەن. سوعان قاراماستان, ونىڭ دۇنيەتانىمىندا ۇلتتىق تامىر مەن مادەني جاۋاپكەرشىلىكتىڭ ورىنى ەرەكشە.
مەديتسينالىق ءبىلىمىن ول ماينتستاعى يوگانن گۋتەنبەرگ ۋنيۆەرسيتەتىندە باستاپ, فرانكفۋرت قالاسىنداعى گەتە ۋنيۆەرسيتەتىندە ماماندىق وقۋىن اياقتادى. ال دوكتورلىق عىلىمي دارەجەسىن ەۋروپاداعى ەڭ بەدەلدى كلينيكالىق-عىلىمي ورتالىقتىڭ ءبىرى – گامبۋرگ-ەپپەندورف ۋنيۆەرسيتەتىنىڭ مەديتسينالىق ورتالىعىندا قورعادى. بۇل وقۋ ورىندارى – تەك ءبىلىم بەرەتىن مەكەمە ەمەس, مەديتسينالىق ويدىڭ, زەرتتەۋ مادەنيەتىنىڭ ورتالىعى.
شەنول جادىكتىڭ كاسىبي جولى – كلينيكالىق تاجىريبە مەن اكادەميالىق قىزمەتتىڭ ءساتتى ۇيلەسىمى. ول Kiel ۋنيۆەرسيتەتىندە ءبولىم مەڭگەرۋشىسى قىزمەتىن اتقارىپ, نەيروحيرۋرگيالىق رەانيماتسيا ءبولىمىن باسقاردى. وسى كەزەڭدە ول مي ىسىكتەرى, بالالار نەيروحيرۋرگياسى, قان تامىرلارى پاتولوگياسى جانە ومىرتقا حيرۋرگياسى سالالارىندا تەرەڭ تاجىريبە جيناقتادى. شيرەك عاسىرلىق كاسىبي قىزمەتىندە ول مي مەن ومىرتقاعا قاتىستى جۇزدەگەن كۇردەلى وپەراتسيالاردى ءساتتى ورىندادى. اسىرەسە كۇردەلى جانە قايتالاما ومىرتقا وپەراتسيالارى, ەندوسكوپيالىق جانە مينيمالدى ءينۆازيۆتى ادىستەرى, ديسكىنى تولىق اۋىستىرۋ وپەراتسيالارى, روبوتتاندىرىلعان حيرۋرگيا سالالارىندا جوعارى بىلىكتى ساراپشى رەتىندە تانىلدى.
سونىمەن قاتار ول كوپتەگەن PhD دوكتورانت-قا عىلىمي جەتەكشىلىك جاساپ, جوعارى دەڭگەيدەگى ءدارىس وقىدى. نەيروحيرۋرگيالىق ينتەنسيۆتى تەراپيا سالالارى بويىنشا رەسمي ەمتيحان قابىلداۋشى رەتىندە دە قىزمەت اتقاردى. ول قازىرگى حيرۋرگيانىڭ بەت-بەينەسىن جاساندى ينتەللەكت, ناۆيگاتسيالىق جۇيەلەر جانە روبوتتەحنيكا تۇبەگەيلى وزگەرتىپ جاتقانىن اتاپ ءوتتى. ونىڭ پىكىرىنشە, بۇل تەحنولوگيالار مەديتسينادا جاڭا ستاندارتتاردى قالىپتاستىرۋدا. اتاپ ايتقاندا, ناۋقاستار ءۇشىن بۇل وپەراتسيا دالدىگىنىڭ ايتارلىقتاي ارتۋى, مينيمالدى ءينۆازيۆتى ادىستەر ارقىلى تەز ساۋىعۋ, اۋىرسىنۋ مەن ينفەكتسيا قاۋپىنىڭ تومەندەۋى, اۋرۋحانادا بولۋ ۋاقىتىنىڭ قىسقارۋى, اسقىنۋلاردىڭ ازايۋى سياقتى فاكتورلاردى كومەكتەسەدى.
«بۇل تەحنولوگيالار ءالى تولىق ستاندارتتى ەمدەۋ ادىسىنە اينالعان جوق. بىراق ءبىز ونى كۇتىپ وتىرۋعا ەمەس, ءدال قازىر قولدانۋعا, دامىتۋعا جانە جەتىلدىرۋگە ءتيىسپىز», دەيدى ول. شەنول جادىك جاساندى ينتەللەكتىگە سىندارلى كوزقاراسپەن قارايدى. ول جي-ءدى ادامدى الماستىراتىن كۇش ەمەس, ادام ويىنىڭ كومەكشىسى رەتىندە قابىلداۋدى ۇسىنادى. «جاساندى ينتەللەكت بىزگە كوپ نارسەگە قول جەتكىزۋگە كومەكتەسەدى. بىراق ويلاۋدى تولىعىمەن وعان جۇكتەۋ – زياتكەرلىك كەرى كەتۋگە الىپ كەلۋى مۇمكىن. بۇل اسىرەسە كەلەر ۇرپاق ءۇشىن وتە ماڭىزدى ماسەلە», دەيدى ول.
ونىڭ ايتۋىنشا, ادام بالاسى بۇرىن ينتەرنەت ارقىلى اقپاراتتى تۇتىنۋدى ۇيرەنسە, بۇگىندە جي ارقىلى ويلاۋدان باس تارتۋ قاۋپىمەن بەتپە-بەت كەلىپ وتىر. سوندىقتان تەحنولوگيالىق دامۋ ەتيكالىق جانە ءبىلىم بەرۋ ولشەمدەرىمەن قاتار جۇرۋگە ءتيىس. وسى تۇرعىدا ەلىمىزدە جاساندى ينتەللەكت جانە تسيفرلىق دامۋ مينيسترلىگىنىڭ قۇرىلۋىن ول ماڭىزدى ءارى ۋاقتىلى قابىلدانعان شەشىم دەپ باعالايدى. بۇل قۇرىلىم جي-ءدى دامىتۋ مەن قولدانۋدىڭ ۇلتتىق ستاندارتتارىن قالىپتاستىرۋعا مۇمكىندىك بەرەدى دەپ ەسەپتەيدى.
شەنول جادىك جوعارى ءبىلىمدى مامان رەتىندە ەلىمىزدىڭ دەنساۋلىق ساقتاۋ جۇيەسىنىڭ دامۋىنا ءوز تاجىريبەسى مەن ءبىلىمىن ۇلەس رەتىندە قوسۋعا دايىن ەكەنىن ايتتى. ونىڭ ناقتى ۇسىنىستارىنىڭ قاتارىندا نەيروحيرۋرگيانىڭ ءتۇرلى باعىتتارى بويىنشا ماستەر-كلاستار وتكىزۋ, مەديتسينالىق ءبىلىم بەرۋ ساپاسىن ارتتىرۋعا باعىتتالعان جۇمىس توپتارىنا قاتىسۋ, اۋرۋحانالارعا JCI حالىقارالىق اككرەديتاتسياسىن الۋعا قولداۋ كورسەتۋ, دەنساۋلىق ساقتاۋ سالاسىنداعى ساراپشىلار مەن تەحنولوگيالىق كومپانيالاردى ءتيىمدى ىنتىماقتاستىققا بىرىكتىرۋ جوباسى بار. ءبىر سوزبەن ايتقاندا, شەنول جادىك سىندى قازاق ازاماتىنىڭ وزىق تاجىريبەلى مامان رەتىندە شەت ەلدەردە مويىندالۋىنىڭ ءوزى ءبىز ءۇشىن ۇلكەن جەتىستىك.
