فوتو: ەڭبەك جانە حالىقتى الەۋمەتتىك قورعاۋ مينيسترلىگى
ەڭبەك جانە حالىقتى الەۋمەتتىك قورعاۋ مينيسترلىگى زاڭسىز كوشى-قوندى ازايتۋ جانە ازاماتتارىمىزدىڭ قۇقىقتارىن قورعاۋ ماسەلەلەرى بويىنشا كورەيا رەسپۋبليكاسىنىڭ ادىلەت مينيسترلىگىمەن جۇرگىزگەن كەلىسسوزدەر بارىسىندا ەرىكتى شىعۋ باعدارلاماسىنىڭ ۋاقىتىن ۇزارتۋعا كەلىستى.
«اتالعان شارالار قۇقىقتىق سالداردى جەڭىلدەتۋگە جانە ءوز مارتەبەسىن رەتتەۋگە دايىن ازاماتتاردى قولداۋعا باعىتتالعان. باعدارلاما ءماجبۇرلى تۇردە دەپورتاتسيالاۋعا جاتاتىن قىلمىستىق قۇقىق بۇزۋشىلىق جاساعان تۇلعالارعا, سونداي-اق 2025 جىلدىڭ 1 جەلتوقسانىنان كەيىن زاڭسىز مارتەبەگە يە بولعان شەتەلدىكتەرگە قولدانىلمايدى.
باعدارلاماعا قاتىسۋ ءۇشىن پاسپورت, ەرىكتى شىعۋ تۋرالى ءوتىنىش جانە اۋە بيلەتى قاجەت. الدىن الا حابارلاندىرۋ ۇشۋ كۇنىنە 15-تەن 3 كۇن قالعانعا دەيىنگى ارالىقتا كورەيا رەسپۋبليكاسىنىڭ كوشى-قون قىزمەتتەرى ارقىلى بەرىلۋى ءتيىس», دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ حابارلاماسىندا.
اتالعان مينيسترلىك قازاقستان ازاماتتارىنا زاڭسىز ميگراتسيا, ەلدەن شىعارىلۋ, ايىپپۇلدار, قۇقىقتاردىڭ شەكتەلۋى جانە ەڭبەك داعدارىستارىنىڭ الدىن الۋ ءۇشىن شەتەلدە تەك زاڭدى نەگىزدە ەڭبەك ەتۋگە كەڭەس بەرەدى.
تەك رەسمي جانە تەكسەرىلگەن ەڭبەك ەتۋ ارنالارى – ليتسەنزيالانعان جۇمىسپەن قامتيتىن جەكەشە اگەنتتىكتەر, مەملەكەتتىك باعدارلامالار جانە جۇمىس بەرۋشىلەردىڭ رەسمي ۇسىنىستارىن پايدالانۋ قاجەت.
