سۋرەت: baibolsyn.kz
وبلىس اكىمىنىڭ ورىنباسارى قانات دۇزەلباەۆتىڭ ايتۋىنشا, اۋىل شارۋاشىلىعىنىڭ ءوسىمى – 10,2%, ونەركاسىپ – 19,9%, ينۆەستيتسيا قۇيۋ – 3,9%, قۇرىلىس 27% ءوسىم كورسەتكەن. سونداي-اق ساۋدا – 12,6%, بايلانىس 1,1% وسىمگە قول جەتكىزگەن.
سونىڭ ىشىندە اۋىل شارۋاشىلىعى جالپى ءونىمىنىڭ قۇنى 1,1 ترلن تەڭگە بولعان. «مۇنداي تابىسقا قول جەتكىزۋ وڭاي ەمەس, ەگەر مەملەكەت تاراپىنان بولىنگەن 163 ملرد تەڭگەگە تەڭ جەڭىلدەتىلگەن, قولداۋ قارجىلارى بولماسا, جوعارى تابىس مۇمكىن بولماس ەدى», دەيدى ق.دۇزەلباەۆ.
مال ءوسىرۋدىڭ العىشارتتارىنىڭ ءبىرى – ۆەتەرينارلىق قىزمەتتىڭ جوعارى ساپادا بولۋى. وبلىس وسى تالاپتى ورىنداۋ ءۇشىن بيىل جاڭادان 57 ۆەتەرينارلىق بەكەت پەن 2 اۋداندىق ستانسا اشقالى وتىر.
اۋىلدىق جەرلەردە داۋ تۋدىرىپ جۇرگەن ماسەلەنىڭ ءبىرى – اۋرۋدان ولگەن مالدى زارارسىزداندىرۋ جۇمىستارى. وسىنى ەسكەرە وتىرىپ, مالدىڭ ولەكسەسىن كومەتىن 32 ورىن اشۋ جوسپارلانعان. سونىمەن قاتار جوعارى تەحنولوگيالى 85 دانا ۆەتەرينارلىق جاراقتار ساتىپ الۋ دا قاراستىرىلعان.
مال اۋرۋىنىڭ الدىن الۋ ماقساتىندا بيىل 8 ملن تۇياق مالدى ۆاكتسينالاۋ كوزدەلىپ وتىر. بىراق بۇل شارا قاتاڭ باقىلاۋدى قاجەت ەتەدى. ايتپەسە ەكپە سالىنعانى تۋرالى جالعان قۇجات جاساۋ وڭاي. ۆاكتسينالاۋمەن قاتار, وبلىس 1,2 ملن تۇياق مال مەن قۇسقا دياگنوستيكالىق زەرتتەۋلەر جاساۋدى جوسپارلاعان. بۇل – 2025 جىلعا قاراعاندا ەكى ەسەگە ارتىق.
وسى جۇمىستاردىڭ ءبارىن اتقارۋعا ماماندار مەن جۇمىسشى قولى كەرەك. بىلتىر وبلىستا بارلىعى 20 مىڭداي ادام ءتۇرلى جۇمىسقا ورنالاستىرىلعان. ءسويتىپ, وبلىستاعى جۇمىسسىزدىق دەڭگەيى 4,4 پايىزعا تومەندەگەن. جۇمىس ورىندارىن تولتىرۋدىڭ ءبىر امالى – قونىس اۋدارۋشىلار مەن قانداستاردىڭ كوشىپ كەلۋىنە جاعداي جاساۋ. بۇل ماقساتقا ارنايى باعدارلاما جاسالىپ, ىسكە اسىرىلىپ جاتىر.
وبلىستا اۋىل شارۋاشىلىعىنىڭ جاڭا ونىمدەرىن شىعاراتىن جوبالار دا ىسكە اسىرىلىپ وتىر. بىلتىردان بەرى «SalarFarm» جشس تۇيىرشىك جوڭىشقا شىعاراتىن 5 ملرد تەڭگەنىڭ جوباسى ىسكە اسىرىلعان. كاسىپورىن تولىق كۇشىنە ەنگەندە 15 ادامدىق جۇمىس ورنى اشىلۋعا ءتيىس.
سونداي-اق «ەۆرازيان ميلك» جشس جىلىنا 12 مىڭ توننا قويۋلاتىلعان ءسۇت شىعاراتىن تسەحتى ىسكە قوستى. «سەۆەر اگرو LTD» جشس قۇرعاق قىمىز وندىرەتىن يننوۆاتسيالىق فەرما اشتى. 400 تۇياق بيەنىڭ ءسۇتىن قۇرعاتاتىن بۇل ءوندىرىستىڭ قۇنى 3,2 ملرد تەڭگە بولدى.
سولتۇستىك قازاقستان وبلىسى
