كلينيكالىق-دياگنوستيكالىق زەرتحانا قالقانشا بەزىنە قاتىستى تالداۋلار ناتيجەسىن تۇسىندىرەتىن زياتكەرلىك جۇيەنى ىسكە قوستى. بۇل – زەرتحانالىق دياگنوستيكا سالاسىنداعى تىڭ قادامداردىڭ ءبىرى. جاڭا سەرۆيس زەرتتەۋ قورىتىندىسىن جاساندى ينتەللەكت تەحنولوگيالارى ارقىلى قاراپايىم ءارى تۇسىنىكتى تىلدە تارقاتىپ بەرۋگە مۇمكىندىك اشادى.
جۇيە قالقانشا بەزى قىزمەتىنىڭ نەگىزگى كورسەتكىشتەرى سانالاتىن تيرەوتروپتى گورمون (تتگ) مەن ەركىن تيروكسيننىڭ (ەركىن ت4) ماندەرىن جەدەل تالداۋعا كومەكتەسەدى. الگوريتم حالىقارالىق كلينيكالىق ۇسىنىمدارعا سۇيەنىپ جۇمىس ىستەيدى. ناتيجەسىندە قۇرىلىمدالعان ەسەپ دايىندالىپ, وندا كورسەتكىشتەردىڭ ماعىناسى, اۋىتقۋ سەبەپتەرى مەن الداعى قادامدار جونىندەگى ۇسىنىمدار قامتىلادى.
زياتكەرلىك تالداۋدى الۋعا تتگ مەن ەركىن ت4-كە ءبىر مەزگىلدە قان تاپسىرۋ قاجەت. ەسەپ زەرتتەۋ قورىتىندىسىمەن قاتار اۆتوماتتى تۇردە جاسالىپ, پايدالانۋشىنىڭ جەكە كابينەتى مەن ءموبيلدى قوسىمشادا قولجەتىمدى بولادى.
جوبا تاجىريبەلى ەندوكرينولوگ دارىگەرلەردىڭ قاتىسۋىمەن ازىرلەنگەن, دالەلدى مەديتسينا قاعيداتتارىنا نەگىزدەلگەن. سەرۆيس تەك باعىت-باعدار بەرىپ, تەكسەرۋ ناتيجەسىن دۇرىس ۇعىنۋعا جاردەمدەسەدى ءارى دارىگەر قابىلداۋىنا دايىندىقتى جەڭىلدەتەدى. دەگەنمەن ول ماماننىڭ مەديتسينالىق قورىتىندىسىن الماستىرمايدى.
جاساندى ينتەللەكتىنى ەنگىزۋ زەرتحانالىق دياگنوستيكانى تسيفرلىق جاڭعىرتۋ جولىنداعى ستراتەگيالىق قادام سانالادى. الداعى كەزەڭدە الەۋمەتتىك ماڭىزى جوعارى زەرتحانالىق باعىتتاردى قامتيتىن جاڭا زياتكەرلىك ءتۇسىندىرۋ تەتىكتەرى كەزەڭ-كەزەڭىمەن ىسكە قوسىلماقشى.
