وسىنداي دەرەكتەردى كەلتىرىپ, پرەمەر-مينيسترگە دەپۋتاتتىق ساۋال جولداعان سەناتورلار جەراستى سۋ رەسۋرستارىنىڭ ەلەۋلى بولىگىنىڭ ەكونوميكالىق اينالىمنان تىس قالىپ وتىرعانىن, ولاردى باسقارۋ جۇيەسىنىڭ جەتكىلىكسىزدىگىن ايتتى.
سەناتورلاردىڭ مالىمدەۋىنشە, ەلىمىزدە شارۋاشىلىق-اۋىزسۋ قاجەتتىلىگىنىڭ شامامەن 40%-ى جەراستى سۋلارى ەسەبىنەن, ال 60%-ى جەرۇستى سۋ كوزدەرى ەسەبىنەن قامتاماسىز ەتىلەدى. تۇششى جەراستى سۋلارىنىڭ 68%-ى الماتى, جامبىل, تۇركىستان جانە قىزىلوردا وبلىستارىندا شوعىرلانعان. ال اتىراۋ, ماڭعىستاۋ جانە سولتۇستىك قازاقستان وبلىستارى سۋ تاپشىلىعى جوعارى وڭىرلەر قاتارىنا جاتادى.
«مىسالى, الماتى قالاسىندا جەراستى سۋ قورلارىن پايدالانۋ دەڭگەيى 73%-دى قۇراسا, تۇركىستان قالاسىندا بۇل كورسەتكىش 1%-دان تومەن, بۇل وڭىرلىك دامۋ ءۇشىن پايدالانىلماي وتىرعان ەلەۋلى رەزەرۆتىڭ بار ەكەنىن ايقىن كورسەتەدى. جەراستى سۋلارى اۋىزسۋ كوزى رەتىندە عانا ەمەس, يرريگاتسيا, ونەركاسىپ, مينەرالدى جانە تۇزدى سۋلار رەتىندە دە ەكونوميكانىڭ ماڭىزدى سالالارىن قامتاماسىز ەتۋى ءتيىس. الايدا بۇگىنگى تاڭدا ولاردىڭ الەۋەتى تولىق ىسكە اسىرىلماي وتىر», دەدى دەپۋتاتتىق ساۋالدى جاريا ەتكەن سەناتور جانبولات جورگەنباەۆ.
سونداي-اق دەپۋتاتتاردىڭ ايتۋىنشا, جەراستى سۋلارىنىڭ جالپى ەكسپلۋاتاتسيالىق قورلارىنىڭ 50%-ى, ياعني تاۋلىگىنە 21,3 ملن تەكشە مەترى, سۋارمالى ەگىنشىلىك ماقساتتارىنا ارنايى بارلانعان. سوعان قاراماستان, ناقتى پايدالانۋ كولەمى تاۋلىگىنە نەبارى 0,15 ملن تەكشە مەتر, ياعني 0,7%-دى عانا قۇرايدى. بۇل سۋ تاپشىلىعى جاعدايىندا اۋىل شارۋاشىلىعى ءۇشىن اسا ماڭىزدى ستراتەگيالىق رەزەرۆتىڭ ءىس جۇزىندە پايدالانىلماي وتىرعانىن كورسەتەدى.
