اكىمدىكتىڭ دەرەگىنشە, وسى باعىتتاعى جۇيەلى جۇمىستاردىڭ ناتيجەسىندە 2025 جىلى وبلىس ورتالىعىندا بارلىعى 327 جالعا بەرىلەتىن پاتەر ساتىپ الىندى. سونىڭ ىشىندە ۇشاقتار كەنتىندە ورنالاسقان 5 قاباتتى, 60 پاتەرلى تۇرعىن ءۇي «وتباسى بانك» اق ارقىلى كەزەكتە تۇرعان ازاماتتارعا ءبولۋ ءۇشىن بەرىلدى.
جيىنعا قاتىسقان ءوڭىر باسشىسى بەرىك ءۋالي جاڭا قونىس يەلەرىن قۋانىشتى مەزەتپەن قۇتتىقتاپ, مەملەكەت باسشىسىنىڭ تاپسىرماسىنا سايكەس وڭىردە تۇرعىنداردى باسپانامەن قامتۋ باعىتىندا جۇيەلى جۇمىس جۇرگىزىلىپ جاتقانىن جەتكىزدى.
«قالامىز كۇننەن كۇنگە كوركەيىپ كەلەدى. تۇرعىنداردىڭ ءومىر ساپاسىن ارتتىرۋ باعىتىندا اۋقىمدى جۇمىس اتقارىلىپ جاتىر. يگى ىستەردىڭ جالعاسى رەتىندە بۇگىن ءبىز ەرەكشە ءساتتىڭ كۋاسى بولعالى وتىرمىز. بۇگىن 26 پاتەردىڭ كىلتى تابىستالماق. ال جاقىن كۇندەرى تاعى 34 وتباسى وسى ۇيدەن باسپانالى بولادى. سوندا ءبىر ءۇيدىڭ وزىنەن عانا 60 ادام قونىس تويىن تويلايدى. بۇل باسپانالار الەۋمەتتىك وسال توپتاعى ازاماتتارعا, جەتىم بالالارعا بەرىلىپ وتىر. بۇل – جاي عانا ءۇي ەمەس, بۇل – جاڭا ومىرگە باستار جول, ءۇمىت پەن سەنىمنىڭ سيمۆولى. سونداي-اق, ناۋرىز ايىنداعى مەرەكەلەردە كەزەگى كەلگەن وتباسىلارعا پاتەر كىلتىن تابىستايمىز. قونىس تويى قۇتتى بولسىن! جاڭا باسپانا جاڭا باقىت اكەلسىن!», دەدى ول.
باسپانالى بولعان تۇرعىندار ءوز ريزاشىلىقتارىن ءبىلدىردى.
ء«بىزدىڭ وتباسىمىز ءۇشىن بۇگىن – ەرەكشە قۋانىشتى كۇن. سەبەبى, 11 جىل ءۇي كەزەگىندە تۇرىپ, تاعاتسىزدانا كۇتتىك. جاڭا باسپاناعا قول جەتكىزگەنىمىزگە ريزامىز. حالىقتىڭ جاعدايىن جاساپ, قولداۋ كورسەتىپ جاتقاندارىڭىزعا العىس ايتامىز», دەدى قالا تۇرعىنى جاننا يمانعازينا.
وبلىس اكىمى سەمەي قالاسىن اباتتاندىرۋ جۇمىسى جالعاساتىنىن, بيىل 75 كوشەگە اسفالت توسەلىپ, 100-گە جۋىق اۋلانىڭ جاڭعىرتىلاتىنىن ايتتى. ايتا كەتەيىك, بىلتىر 52 كوشە اسفالتتالىپ, 35 اۋلا اباتتاندىرىلعان بولاتىن.
ۇشاقتار كەنتىنىڭ دامۋىنا دا ەرەكشە كوڭىل بولىنەدى. قازىرگى ۋاقىتتا جاڭا ساياباق پەن سپورتتىق ساۋىقتىرۋ كەشەنى سالىنىپ جاتىر. ەكى عيماراتتان تۇراتىن سپورت نىسانى – «سامۇرىق قازىنا» ءال اۋقات قورى مەن وبلىس اكىمدىگىنىڭ بىرلەسكەن جوباسى.
بىلتىر قاراعايلى ىقشام اۋدانىندا 27 مىڭ شارشى مەتردى قۇرايتىن 5 تۇرعىن ءۇي پايدالانۋعا بەرىلگەن ەدى. بيىل «اباي جاستارى» باعدارلاماسى اياسىندا تاعى 30 پاتەر بەرىلمەك.
