شاريعات اراق-شاراپ ىشۋگە قاتاڭ تىيىم سالادى. بۇل تۋرالى قۇران كارىمنىڭ ء«مايدا» سۇرەسىندە بىلاي دەيدى:
«ۋا, يمان كەلتىرگەندەر! اقيقاتىندا, اراق, قۇمار ويىندارى, پۇتتار ءھام (بال اشۋعا تىگىلەتىن) جەبەلەر – شايتاننىڭ لاس ىستەرىنەن. ودان اۋلاق بولىڭدار, بالكىم, مۇراتقا جەتەرسىڭدەر!».
مۇحامبەت پايعامبار دا اراق ىشكەن جاننىڭ قىرىق كۇندىك نامازى قابىل بولمايدى دەگەن ءحاديسى جەتكەن.
ءدىني باسقارما حاديس ءتاپسىرشىسى يمام ءناۋاۋيدىڭ مىنا ءسوزىن تياناق قىلادى. ول حاديستەگى «نامازى قابىل بولمايدى» دەگەن ءسوزدى پارىزى موينىنان تۇسەدى, بىراق ساۋابى جوعالادى دەپ تۇسىندىرگەن. ويتكەنى نامازدى ماس كۇيىندە وقۋعا بولمايدى.
سوعان وراي ءمۇفتياتتىڭ ءپاتۋا ءبولىمى بىلاي دەپ تۇجىرىمدايدى:
«ناماز ساۋابىنىڭ جوعالۋى تاۋبە ەتپەي, اراق ءىشۋدى دوعارماۋىنا بايلانىستى. ەگەر شىنايى تاۋبە ەتسە, بۇل جازا (نامازدىڭ ساۋابى جوعالۋى) دا ونىڭ موينىنان تۇسىرىلەدى. ويتكەنى شىنايى تاۋبە الدىڭعى ىستەگەن كۇنا ءىستى جويادى. وسىعان وراي ورازا ۇستاۋشى رامازان ايىنان ەكى كۇن بۇرىن اراق ءىشىپ, سوڭىنان شىنايى تاۋبە ەتسە, اللا ونىڭ تاۋبەسىن قابىل ەتەدى. ونىڭ ورازاسى اراق ىشپەي ورازا تۇتقان ادامنىڭ ورازاسىنداي بولادى. ال ورازا ۇستاپ اراق ءىشۋىن دوعارماسا, ورازاسى دۇرىس بولادى, بىراق ساۋابى بولمايدى. اراق ىشكەنى ءۇشىن كۇنا ارقالايدى».
ايتا كەتەيىك, مۇسىلمان جۇرتشىلىعى اقپاننىڭ 18-ىنەن 19-ىنا قاراعان ءتۇنى اۋىز بەكىتەدى.
ءدىني باسقارمانىڭ بەكىتۋىمەن بيىلعى جىلدىڭ ءپىتىر ساداقاسى ەلىمىز بويىنشا ەكى كەلى ۇننىڭ ورتاشا باعاسى نەگىزىندە 735 تەڭگەنى قۇرادى.
