اگەنتتىكتىڭ مالىمەتىنە سۇيەنسەك, قازىر جاعداي كۇردەلى ەمەس. بانكتەر تاۋەكەلدى باقىلاۋدا ۇستاپ وتىر. الايدا تۇتىنۋشىلىق نەسيەلەردىڭ ءوسۋ قارقىنى باياۋلايدى. 2026 جىلى ول 18-20% شاماسىندا بولۋى مۇمكىن. سوعان قاراماستان, حالىققا بەرىلەتىن نەسيەلەر بانك سەكتورىنداعى نەگىزگى قوزعاۋشى كۇش بولىپ قالا بەرەدى.
ساراپشىلار ءوسىمنىڭ باياۋلاۋى بانكتەر ءۇشىن بەلگىلى ءبىر دەڭگەيدە پايدالى دەيدى. سەبەبى تابىسى تومەن ازاماتتاردىڭ قارىزى تىم كوبەيسە, قيىن كەزەڭدە بانكتەر شىعىنعا باتادى. مۇنداي جاعدايدا ولار قايتپاي قالۋى مۇمكىن نەسيەلەرگە قوسىمشا رەزەرۆ جيناۋعا ءماجبۇر بولادى.
S&P Global Ratings بولجامىنشا, 2026 جىلى تولەمى كەشىكتىرىلگەن تۇتىنۋشىلىق نەسيەلەردىڭ ۇلەسى 5,5-6%-عا جەتۋى مۇمكىن. بۇل 2025 جىلمەن سالىستىرعاندا ءسال جوعارى كورسەتكىش. بۇعان نەسيەلەر مەرزىمىنىڭ قىسقارۋى جانە ولاردىڭ «ەسكىرۋى» سەبەپ. سونىمەن بىرگە حالىقتىڭ جالپى قارىز جۇكتەمەسى دە ۇلعايىپ كەلەدى. بۇل بانكتەردىڭ قارجىسىنا قوسىمشا سالماق تۇسىرەدى.
سونىمەن قاتار بانكتەردىڭ تابىسى ءالى دە جاقسى دەڭگەيدە ساقتالادى. اگەنتتىك دەرەگىنشە, تازا پايىزدىق مارجا 2025 جىلى شامامەن 7% بولدى. بۇل بانكتەردىڭ پايدا تابۋىنا مۇمكىندىك بەرىپ وتىر.
ال ۇلتتىق بانك مالىمەتىنشە, 2025 جىلى ەلىمىزدەگى بانكتەردىڭ جيىنتىق پايداسى 2,7 ترلن تەڭگەگە جۋىقتادى. بۇل ءبىر جىلدا 7%-عا جۋىق ءوسىم بار ەكەنىن كورسەتەدى. دەگەنمەن ءوسىم قارقىنى بۇرىنعىدان باياۋ. 2024 جىلى بانك سەكتورىنىڭ پايداسى 17%-عا ارتقان بولاتىن.
الداعى ۋاقىتتا بانكتەر ءۇشىن باستى ماسەلە – حالىقتى نەسيەمەن قامتي وتىرىپ, قارىزدىڭ شامادان تىس وسۋىنە جول بەرمەۋ. ال قارىز الۋشىلار ءۇشىن نەگىزگى قاعيدا بىرەۋ: نەسيە الاردا ءوز مۇمكىندىگىن ناقتى ەسەپتەۋ قاجەت.
