– بەرىك ءۋالي ۇلى, اباي وبلىسىنا اكىم بولعان ءبىر جىل كولەمىندە باق وكىلدەرىنە ارنايى سۇحبات بەرگەن ەمەسسىز. اكىم رەتىندەگى العاشقى سۇحباتىڭىزدى «Egemen Qazaqstan» گازەتىنە بەرۋگە كەلىسكەنىڭىزگە راحمەت. مەملەكەت باسشىسىنىڭ تاعايىنداۋىمەن اباي وبلىسىنىڭ اكىمى قىزمەتىنە كىرىسكەنىڭىزگە بۇگىن تۋرا ءبىر جىل تولىپ وتىر. بۇل – ءسىزدىڭ ءوڭىر باسشىسى رەتىندەگى العاشقى جۇمىس تاجىريبەڭىز. وسى ۋاقىت كولەمىندە ءوزىڭىز تۋىپ-وسكەن ولكەدە قانداي وڭ وزگەرىستەر بولدى؟
– ءبىر جىلدىڭ كولەمىندە قانداي وزگەرىستەر بولعانىن وبلىس تۇرعىندارىنان سۇراعان دۇرىس شىعار. اتقارىلعان جۇمىستاردىڭ باعاسىن ەڭ اۋەلى حالىق بەرەدى عوي. دەگەنمەن ءبىر جىلدا ءار سالادا ءبىراز جۇيەلى جۇمىس جۇرگىزىلدى.
مەملەكەت باسشىسى قاسىم-جومارت توقاەۆ مەنى تۋعان جەرىم – اباي وبلىسىنا اكىم ەتىپ جىبەرگەندە الدىما بىرقاتار مىندەت قويدى. وڭىردەگى الەۋمەتتىك-ەكونوميكالىق ماسەلەلەردىڭ شەشىلۋى تۇرعىنداردىڭ تۇرمىس دەڭگەيىن ارتتىرۋعا تىكەلەي ىقپال ەتەتىنىن ايتىپ, ۇكىمەتپەن بىرگە ءوڭىردى قارقىندى دامىتۋ جولدارىن قاراستىرىپ, وزەكتى ماسەلەلەردى كەزەڭ-كەزەڭىمەن شەشۋدى تاپسىردى. بۇل باعىتتا ءبىز ەڭ اۋەلى «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وبلىستا سالىنىپ, قۇرىلىسى سوزىلىپ كەتكەن 65 مەديتسينالىق-سانيتارلىق العاشقى كومەك نىسانى قۇرىلىسىن اياقتاپ, بىلتىر تۇرعىنداردىڭ يگىلىگىنە بەردىك.
«كەلەشەك مەكتەپتەرى» ۇلتتىق جوباسى شەڭبەرىندە بوي كوتەرگەن مەكتەپتەردىڭ قۇرىلىسى دا كەستەدەن كەشىگىپ قالعان ەكەن. مەردىگەرلەرگە قاتاڭ تالاپ قويىپ, ناتيجەسىندە, 2025 جىلى وبلىسىمىزدا 4 زاماناۋي مەكتەپ اشىلدى. بەسقاراعاي اۋدانىندا 300 ورىندىق, اياگوز اۋدانىندا 600 ورىندىق, سەمەي قالاسىنىڭ قاراعايلى شاعىن اۋدانىندا 1200 ورىندىق, ۆودنىي كەنتىندە 600 ورىندىق مەكتەپ پايدالانۋعا بەرىلدى. ۆوستوچنىي كەنتىندە وسى باعدارلامامەن 300 ورىندىق مەكتەپتىڭ قۇرىلىسى اياقتالدى. ءتورتىنشى توقساندا اشۋدى جوسپارلاپ وتىرمىز.
بىلتىر مەملەكەت باسشىسىنىڭ تاپسىرماسىنا ساي اباي قۇنانباي ۇلىنىڭ 180 جىلدىعى لايىقتى دەڭگەيدە اتالىپ ءوتتى. تۇڭعىش رەت 10 كۇندىك رەتىندە وتكەن حاكىمنىڭ مەرەيتويىندا ءتۇرلى مادەني-رۋحاني, تانىمدىق, ينتەللەكتۋالدىق ءىس-شارالار ۇيىمداستىرىلدى. كەشەندى جوسپار اياسىندا ەنتسيكلوپەديالىق پورتالدىڭ, ابايعا قاتىستى بىرقاتار كىتاپتىڭ تۇساۋكەسەرى, عىلىمي كونفەرەنتسيا, جاستار اراسىندا ينتەللەكتۋالدىق سايىس جانە قاراۋىلدا ۇلتتىق ويىندار سىندى حالىقارالىق, رەسپۋبليكالىق, وڭىرلىك دەڭگەيدە 100-دەن استام ءىس-شارا اتقارىلدى.
– سەمەي وبلىسى 1997 جىلى جابىلىپ, 2022 جىلى پرەزيدەنتتىڭ جارلىعىمەن اباي وبلىسى بولىپ قايتا اشىلدى. الايدا وسى ارالىقتا ءوڭىر الەۋمەتتىك-ەكونوميكالىق دامۋ جاعىنان ءبىرشاما كەنجە قالعانى راس. 25 جىلدا قوردالانعان تۇيتكىلدى ماسەلەلەردىڭ ءتۇيىنىن تارقاتۋعا, تولىق ەڭسەرۋگە قانشا ۋاقىت قاجەت؟
– ءوزىڭىز ايتقانداي, سەمەي وبلىسى تاراعاننان كەيىنگى 25 جىلدا ءار سالادا ماسەلەلەردىڭ قوردالانىپ, ۇلىلار تۋعان قاستەرلى ولكە وزىنە تيەسىلى ەنشىسىنەن قاعىلىپ, كوش سوڭىندا قالعانى جاسىرىن ەمەس. ءبىر عانا رەسمي دەرەك كەلتىرەيىن. ۇلتتىق ەكونوميكا مينيسترلىگىنىڭ مالىمەتىنشە, 2024 جىلدىڭ قورىتىندىسىنا ساي وڭىرلىك ستاندارتتار جۇيەسى بويىنشا وبەكتىلەرمەن جانە كورسەتىلەتىن قىزمەتتەرمەن قامتاماسىز ەتۋ دەڭگەيى 64,1 پايىزدى قۇرادى. ال اباي وبلىسىندا بۇل كورسەتكىش رەسپۋبليكادا ەڭ تومەن دەڭگەيدە. ءوڭىردىڭ ينفراقۇرىلىممەن قامتىلۋى 56,3 پايىز بولىپ وتىر. جاقىندا ۇكىمەتتىڭ كەڭەيتىلگەن وتىرىسىندا مەملەكەت باسشىسى وسى ماسەلەگە ەرەكشە نازار اۋدارىپ: «اسىرەسە جاڭادان قۇرىلعان اباي جانە ۇلىتاۋ وبلىستارىندا ينفراقۇرىلىم جەتكىلىكسىز. الماتى وبلىسىندا دا احۋال ءماز ەمەس. بۇل ايماقتاردىڭ دامۋىنا ايرىقشا نازار اۋدارۋ قاجەت», دەپ جاڭادان قۇرىلعان وبلىستارعا ناقتى قولداۋ كورسەتۋ قاجەتتىگىن ايتتى. ارينە, وڭىردەگى ۇزاق جىل بويى قوردالانعان ماسەلەلەردى شەشۋ ءۇشىن ۋاقىت پەن ءتيىستى قولداۋ قاجەت. اباي وبلىسى پرەزيدەنت پەن ۇكىمەت تاراپىنان ناقتى قولداۋدى انىق سەزىنىپ وتىر.
وبلىسىمىزدىڭ شيرەك عاسىردان كەيىن قايتا اشىلىپ, تاريحي ادىلەتتىلىكتىڭ سالتانات قۇرۋى – تىكەلەي مەملەكەت باسشىسىنىڭ قامقورلىعى ەكەنى بارشاعا بەلگىلى. قازىر وڭىرىمىزدەگى وزەكتى ماسەلەلەر بىرتىندەپ شەشىمىن تاۋىپ, ەكونوميكادا تۇراقتى ءوسىم بايقالىپ, تۇرعىنداردىڭ ءال-اۋقاتى جاقسارىپ كەلەدى. مىسالى, بىلتىرعى 9 ايدىڭ قورىتىندىسىندا اباي وبلىسىنىڭ جالپى وڭىرلىك ءونىمى 101,5 پايىزدى قۇراپ, 2 ترلن 385,8 ملرد تەڭگەگە جەتتى. بىلتىر ءوڭىر ەكونوميكاسىنىڭ 12 نەگىزگى كورسەتكىشىنىڭ 10-ىندا ءوسىم قامتاماسىز ەتىلدى. اۋىل شارۋاشىلىعى - 101,1 پايىز, وڭدەۋ ونەركاسىبى – 102,9, ىشكى ساۋدا – 103,5, تۇرعىن ءۇيدى پايدالانۋعا بەرۋ – 105,8, بايلانىس – 106, قۇرىلىس – 106,2, ينۆەستيتسيالار – 106,8, كولىك سالاسى 125,9 پايىزعا ورىندالدى. وتكەن جىلى مەملەكەتتىك بيۋدجەتكە اباي وبلىسىنان 648,7 ملرد تەڭگە سالىق ءتۇستى, بۇل – 2024 جىلمەن سالىستىرعاندا 135,5 پايىزعا ارتىق. مەنشىكتى كىرىستەردىڭ ءوسۋ قارقىنى بويىنشا وبلىس رەسپۋبليكادا ەكىنشى ورىندا تۇر.
– بىلتىر 17 مامىردا ءوڭىردىڭ الداعى دامۋ جوسپارىن جاريا ەتتىڭىز. سول كەزدە سەمەي قالاسىندا «Smart City» اتتى جاڭا شاعىن اۋداننىڭ سالىناتىنىن ايتتىڭىز. قۇرىلىس باستالدى ما؟
– سەمەي قالاسىنىڭ تاريحي ورتالىعىنىڭ ينفراقۇرىلىمى ابدەن ەسكىرگەن. وسىنى ەسكەرە وتىرىپ, جاڭا اكىمشىلىك-ىسكەرلىك ورتالىق سالۋ ماقساتىندا جاڭا اۋدان قۇرۋ تۋرالى شەشىم شىعاردىق. قازىرگى ۋاقىتتا جاڭا اۋداننىڭ دامۋ تۇجىرىمداماسى ازىرلەنىپ, ونىڭ اياسىندا قالانىڭ باس جوسپارىن تۇزەتۋ ءارى ەگجەي-تەگجەيلى جوسپارلاۋ جوبالارىن ازىرلەۋ جۇمىسى جۇرگىزىلۋدە. اتالعان جوبا سەمەي قالاسىنىڭ سولتۇستىك بولىگىندە, جالپى كولەمى 1200 گەكتاردان استام بوس اۋماقتا جۇزەگە اسىرىلادى. مۇندا 75 مىڭ تۇرعىنعا ارنالعان زاماناۋي تۇرعىن ءۇي كەشەندەرى, 40-تان استام اكىمشىلىك, كوممەرتسيالىق جانە الەۋمەتتىك نىساندار سالىنادى.
وبلىسىمىزدا مەملەكەت باسشىسىنىڭ قولداۋىمەن ابايدىڭ 180 جىلدىعىنا وراي «ابايعا قۇرمەت» رەسپۋبليكالىق اكتسياسى باستالعانى بەلگىلى. بۇگىندە وبلىس اكىمدىگى اكتسيا اياسىنداعى جوبالاردى جۇزەگە اسىرۋ بويىنشا وڭىرلەرمەن بەلسەندى جۇمىس جۇرگىزىلىپ جاتىر. اكتسيانى العاشقىلاردىڭ ءبىرى بولىپ ماڭعىستاۋ وبلىسى قولداپ, دوستىق ءۇيىنىڭ قۇرىلىسىن باستادى. تۇركىستان وبلىسى كورمە ورتالىعىن, قىزىلوردا وبلىسى «اناعا تاعزىم» عيماراتىن, اتىراۋ وبلىسى «اباي الەمى» ورتالىعىن, سولتۇستىك قازاقستان وبلىسى مەملەكەتتىك رامىزدەر الاڭىن, اقتوبە وبلىسى جەكپە-جەك سارايىن, پاۆلودار وبلىسى ۇستەل تەننيسى ورتالىعىن, قاراعاندى وبلىسى بوتانيكالىق باق, باتىس قازاقستان وبلىسى جەلىلىك ساياباق, قوستاناي وبلىسى رۋحانيات ورتالىعىن, الماتى قالاسى مەدياورتالىق, استانا قالاسى «كەلەشەك» مەكتەبىن سالىپ بەرسە, شىعىس قازاقستان وبلىسى ەرتىس وزەنى جاعالاۋىن اباتتاندىرادى. رامىزدەر الاڭى بەيبىتشىلىك ارالىندا, جەكپە-جەك سارايى قالانىڭ سول جاعالاۋىندا, زاريا شاعىن اۋدانىندا بوي كوتەرەدى. شىمكەنت قالاسى شىعارماشىلىق ورتالىعىمەن قاتار سەمەي قالاسىنىڭ ۆودنىي كەنتىنە مادەنيەت ءۇيىن سىيعا تارتپاق. وسىلايشا, «ابايعا قۇرمەت» اكتسياسى اياسىندا جاڭا شاعىن اۋداننىڭ عانا ەمەس, وبلىس ورتالىعىنىڭ ءار اۋماعى اباتتاندىرىلىپ, جاڭا كەيىپكە ەنەدى. اكتسيانى ءىرى ينۆەستورلار دا قولداپ وتىرعانىن ىلتيپاتپەن ايتا كەتكەن ءجون. اتاپ ايتساق, «KAZ Minerals» كومپانيالار توبى جاڭا شاعىن اۋداندا 25 مىڭ كورەرمەنگە ارنالعان جاڭا ستاديون قۇرىلىسىن باستاپ كەتتى. بۇدان بولەك, جەكە قوعامدىق قوردىڭ ەسەبىنەن 5 مىڭ ادامعا ارنالعان جاڭا مەشىتتىڭ ىرگەتاسى قالاندى. وسى باعىت بويىنشا باسقا دا ءىرى ينۆەستورلارمەن, ىرگەلى كومپانيالارمەن ءتيىستى جۇمىستار جۇرگىزىلىپ جاتىر.
– اباي وبلىسىندا ينۆەستور تارتۋ باعىتىندا اۋقىمدى جۇمىس اتقارىلىپ جاتقانىن بايقايمىز. بۇل رەتتە ءوزىڭىزدىڭ باستاماڭىزبەن قولعا الىنعان «تۋعان جەرگە تۋىڭدى تىك» جوباسىنىڭ ءجونى بولەك. جوبا اياسىندا بۇگىنگە دەيىن قانداي جۇمىستار جۇزەگە اسىرىلدى؟
– بىلتىر ماۋسىم ايىندا سەمەيدە «تۋعان جەرگە تۋىڭدى تىك» ينۆەستيتسيالىق فورۋمىن وتكىزگەندە 500-گە جۋىق كاسىپكەر جينالدى. ماڭىزدى شارا اياسىندا جالپى قارجىسى 336 ملرد تەڭگەنى قۇرايتىن 15 مەموراندۋمعا قول قويىلدى. فورۋمنىڭ العاشقى ناقتى ناتيجەسى – بىلتىر Cەمەيدە جاڭا جىل قارساڭىندا اشىلعان «Pana Unique Semey» بەس جۇلدىزدى قوناقۇي-مەيرامحانا كەشەنى. جوبانىڭ جالپى قۇنى – 5,7 ملرد تەڭگە, 105 جاڭا جۇمىس ورنى قۇرىلدى. مۇنداي قوناقۇي قالامىزدا بۇرىن-سوڭدى بولعان ەمەس. فورۋم اياسىنداعى كەلىسىمدەرگە سايكەس ىسكە اسىرىلىپ جاتقان اۋقىمدى جوبالاردىڭ ءبىرى – زاماناۋي ەت كومبيناتى. قازىر جاڭاسەمەي اۋدانىندا قۋاتتىلىعى جىلىنا 11 400 توننا ەت جانە ەت ونىمدەرىن تەرەڭ وڭدەيتىن وندىرىستىك كەشەننىڭ قۇرىلىسى قارقىندى جۇرگىزىلۋدە. اعايىندى سايلاۋ جانە ەرلان مۇقاشەۆتەر جەتەكشىلىك ەتەتىن «Eurasia Agro Semey» جشس جۇزەگە اسىرىپ جاتقان جوبا ءوڭىردىڭ اۋىل شارۋاشىلىعى مەن ازىق-ت ۇلىك ونەركاسىبىن دامىتۋعا تىڭ سەرپىن بەرمەك. جوبانىڭ جالپى قۇنى – 7,7 ملرد تەڭگە. وندىرىستىك كەشەندى بيىل تامىز ايىندا ىسكە قوسۋ جوسپارلانىپ وتىر. سونداي-اق «Qazaq Astyq Group» كومپانياسى قازىرگى ۋاقىتتا سەمەيدە كۇنباعىس مايىن تازارتۋ, قۇيۋ جانە قاپتاۋ تسەحىن سالىپ جاتىر. جوبا قۇنى – 7,1 ملرد تەڭگە, 100-دەن استام جاڭا جۇمىس ورنى قۇرىلاتىن بولادى.
وڭىردە ينۆەستيتسيا تارتۋ باعىتىندا جۇيەلى جۇمىس جۇرگىزىلىپ كەلەدى. وسىنىڭ ناتيجەسىندە 2025 جىلى ىسكە اسىرىلعان جوبالار سانى 29-دان 101-گە دەيىن ارتتى. جىل قورىتىندىسىندا جالپى قۇنى 24,1 ملرد تەڭگە بولاتىن 15 ينۆەستيتسيالىق جوبا ىسكە قوسىلىپ, 391 جاڭا جۇمىس ورنى قۇرىلدى. سونىمەن قاتار قۇنى 605,5 ملرد تەڭگە بولاتىن 48 جوبادان تۇراتىن وڭىرلىك ينۆەستيتسيالىق پۋل قالىپتاستىرىلدى. بىلتىر وبلىسقا ينۆەستيتسيا تارتۋ ماقساتىندا 100-دەن استام شەتەلدىك ينۆەستورلارمەن كەزدەستىم. حالىقارالىق ەكونوميكالىق ىنتىماقتاستىقتى نىعايتۋ ماقساتىندا «ۇلكەن التاي» حالىقارالىق سۋبوڭىرلىك كونفەرەنتسياسى اياسىندا قىتاي حالىق رەسپۋبليكاسىنىڭ ءىرى كومپانيالارىمەن جالپى قۇنى 1,5 ملرد دوللاردى قۇرايتىن 15 مەموراندۋمعا قول قويىلدى.
يندۋستريالىق ينفراقۇرىلىمدى دامىتۋ باعىتىندا دا ءتيىستى جۇمىس جۇرگىزىلىپ جاتىر. سەمەي قالاسىنداعى اۋماعى 96 گەكتاردى قۇرايتىن ء«وندىرىس» يندۋستريالىق ايماعىن 190 گەكتارعا دەيىن كەڭەيتىپ, شاعىن ونەركاسىپ پاركىن قۇرۋ جۇمىسى قولعا الىنىپ جاتىر.
– وڭىردەگى قۇرىلىسى توقتاپ تۇرعان نەمەسە مۇلدە باياۋلاپ قالعان نىساندارعا جان ءبىتىپ, ونىڭ بىرقاتارى ىسكە قوسىلعانىن بىلەمىز. ناقتى قانداي عيماراتتار تولىق اياقتالىپ, ەل يگىلىگىنە بەرىلدى؟
– بىلتىر جەلتوقسان ايىندا سەمەيدە 500 بالاعا شاقتالعان, اۋىسىممەن 1500 وقۋشىعا دەيىن قابىلداي الاتىن وقۋشىلار سارايى اشىلدى. مەملەكەت باسشىسىنىڭ ارنايى تاپسىرماسىمەن قۇرىلىسى باستالعان جاڭا وقۋشىلار سارايى – اباي وبلىسى قۇرىلعالى بەرى سالىنىپ بىتكەن تۇڭعىش الەۋمەتتىك نىسان. 2023 جىلى باستالعان بۇل جوبا پرەمەر-ءمينيستردىڭ 2024–2026 جىلدارعا ارنالعان جول كارتاسىنا ەنگىزىلگەن. الايدا قارجىلىق قيىندىقتارعا بايلانىستى قۇرىلىسى توقتاپ قالعان بولاتىن. بىلتىر ۇكىمەتتىڭ قولداۋىمەن 7,6 ملرد تەڭگە قارجى ءبولىنىپ, وقۋشىلاردىڭ يگىلىگىنە بەرىلىپ, ەلىمىزدەگى 10-ىنشى وقۋشىلار سارايى بولدى.
2025 جىلى شەكارا شەبىندەگى ماقانشى اۋدانىنىڭ ورتالىعى ماقانشى اۋىلىنداعى دارىگەرلىك امبۋلاتوريانى اشتىق. جەرگىلىكتى حالىققا اسا قاجەت نىسان قۇرىلىسى 27 جىلدان استام ۋاقىت اياقتالماي, «ساقالدى قۇرىلىسقا» اينالعان بولاتىن. جوبا رەسپۋبليكالىق «اۋىل – ەل بەسىگى» باعدارلاماسى اياسىندا جۇزەگە اسىرىلدى.
– ءار ءوڭىردىڭ وزىنە ءتان ەكونوميكالىق, تۋريستىك جانە الەۋمەتتىك ەرەكشەلىكتەرى, ياعني ءيميدجى بولادى. ءسىز اباي وبلىسىنىڭ نەگىزگى ەرەكشەلىگى مەن باسەكەلەستىك ارتىقشىلىعىن قالاي سيپاتتار ەدىڭىز؟ وسى ەرەكشەلىككە ساي وبلىستى قالاي دامىتۋعا بولادى؟ تۋريستىك الەۋەتىن قالاي ارتتىرعان دۇرىس دەپ ويلايسىز؟
– اباي وبلىسى مەن سەمەي قالاسىنىڭ نەگىزگى ءيميدجى – الاش. بۇل جەر – كۇللى قازاق دالاسىنا ساۋلە شاشقان ۇلىلار مەكەنى. بارشا وركەنيەت جاڭالىعى بولعان تۇڭعىشتاردىڭ باستاۋ العان جەرى. قازاقتىڭ العاشقى تەاتر قويىلىمىنىڭ وسى وڭىردە قويىلۋى, العاشقى كاسىبي ءانشى امىرە قاشاۋباەۆتىڭ دۇنيەگە كەلۋى, العاشقى باسپانىڭ اشىلۋى, تۇڭعىش فۋتبول كلۋبىنىڭ وسىندا قۇرىلۋى, العاشقى تەلەگراف, العاشقى بانكتىڭ, ءتىپتى, العاشقى تسيركتىڭ دە وسىندا باستالۋى ءبارى دە – قۇتتى مەكەنىمىزدىڭ پروگرەسس وتانى ەكەنىنىڭ ايعاعى. «العاشقى تەاتر قويىلىمى» دەپ ايتتىق قوي. تەاتر دەگەننەن شىعادى, سەمەي قالاسىندا 45 جىلدان بەرى بىردە-ءبىر جاڭا مادەني وشاق سالىنباعان ەكەن. 1981 جىلى سالىنعان عيمارات – اباي تەاترى. بۇگىندە مۇندا ءۇش بىردەي ۇجىم جۇمىس ىستەپ وتىر. الداعى ۋاقىتتا سەمەيدە پرەزيدەنتتىڭ تىكەلەي قولداۋىمەن جاڭا دراما تەاتر سالىنادى. مەملەكەت باسشىسى مۇنى قىزىلوردادا وتكەن ۇلتتىق قۇرىلتايدا ەرەكشە اتاپ ءوتتى.
وبلىسىمىزدىڭ تاعى ءبىر ەرەكشەلىگى – اۋىل شارۋاشىلىعى, ونىڭ ىشىندە مال شارۋاشىلىعىن دامىتۋعا قولايلىلىعى. اباي وبلىسىندا كەزىندە قوي شارۋاشىلىعى الدىڭعى قاتاردا بولدى. تاريحي قالىپتاسقان قوي شارۋاشىلىعىنىڭ الەۋەتىن تولىق پايدالانۋ ماقساتىندا اباي وبلىسىنىڭ 2026–2030 جىلدارعا ارنالعان سالالىق باعدارلاماسىن ازىرلەپ جاتىرمىز.
2025 جىلى وبلىستىڭ اۋىل شارۋاشىلىعى سالاسىنا تارتىلعان تىكەلەي ينۆەستيتسيالار كولەمى 45,2 پايىزعا ءوسىپ, 63 ملرد تەڭگەگە جەتتى. وڭىردە اگروونەركاسىپتىك كەشەندى دامىتۋ ماقساتىندا 2026–2028 جىلدار ارالىعىندا جالپى قۇنى 77,3 ملرد تەڭگەنى قۇرايتىن 16 ينۆەستيتسيالىق جوبا ىسكە اسىرىلادى. اتالعان جوبالار ىشكى نارىقتى ساپالى, تابيعي ءارى جەرگىلىكتى ونىمدەرمەن قامتاماسىز ەتۋگە مۇمكىندىك بەرەدى.
– اۋىل شارۋاشىلىعى – ماڭىزدى سالا. جاقىندا الەۋمەتتىك جەلىدەگى پاراقشاڭىزدا «وبلىسىمىزدا اۋىلدى دامىتۋ, كوتەرۋگە «قالادان – اۋىلعا» اتتى جاڭا قاناتقاقتى جوبا, كەشەندى باعدارلاما باستاۋدى جوسپارلاپ وتىرمىز» دەگەن ەدىڭىز...
– بۇل جوبانىڭ ماقساتى – التىن بەسىك اۋىلدى تۇلەتۋ, ءوڭىر تۇرعىندارىنىڭ ءال-اۋقاتىن جاقسارتۋ. باعدارلاما اياسىندا قالادان اۋىلعا كوشكىسى كەلەتىن ازاماتتارعا ناقتى كومەك كورسەتىلەدى. شەتەلدەن قونىس اۋدارعىسى كەلەتىن قانداستارىمىزدى دا قۇشاق جايا قارسى الامىز. جالپى, ۇكىمەت تاراپىنان اۋىل حالقىنا باعىتتالعان بارلىق باعدارلامانىڭ باسىن قوسىپ جانە اباي وبلىسى اكىمدىگى تاراپىنان اۋىلعا كوشىپ كەلەم دەۋشىلەرگە كورسەتىلەتىن قولداۋلاردى جيناقتاپ, «قالادان – اۋىلعا» اتتى جاڭا جوبانى ەلدىڭ نازارىنا ۇسىنعالى وتىرمىز. بۇل قاناتقاقتى جوبا ارقىلى اۋىلعا قونىس اۋدارۋشىلارعا بيزنەس جۇرگىزۋگە, باسپانالى بولۋعا, مال الۋعا ءارتۇرلى مەملەكەتتىك باعدارلامالار ارقىلى جەڭىلدەتىلگەن نەسيە بەرىلەدى.
– اۋىل تۋرالى ءسوز قوزعادىق قوي. ءوزىڭىزدىڭ اۋىلداردى ءجيى ارالايتىنىڭىزدى جاقسى بىلەمىز. بىلتىر 161 كۇنىڭىزدى اۋدانداردا وتكىزگەن ەكەنسىز. وڭىردەگى اۋىلداردىڭ وزەكتى ماسەلەسى قالاي شەشىلىپ جاتىر؟
– اۋىلداردى ءجيى ارالايتىنىم راس. ارالاعاندا شالعايداعى ەلدى مەكەندەرگە ارنايى بارامىن. اۋىلداردى ارالاعاننىڭ پايداسى – ەل-جۇرتپەن تىكەلەي بەتپە-بەت سويلەسىپ, ماسەلەنى ءوز كوزىڭمەن كورەسىڭ.
ەندى سۇراعىڭىزعا كەلسەك, وبلىستا اۋىلدىق ەلدى مەكەندەردىڭ ينفراقۇرىلىمىن نىعايتۋ باعىتىندا جۇيەلى جۇمىس جۇرگىزىلىپ جاتىر. بىلتىر كوكپەكتى اۋدانىنىڭ كوكپەكتى اۋىلىندا ءجۇزۋ باسسەينى, بورودۋليحا اۋدانىنىڭ پەتروپاۆلوۆكا اۋىلىندا سپورتتىق ساۋىقتىرۋ ورتالىعى, جاڭاسەمەي اۋدانىنىڭ العاباس اۋىلىندا سپورت كەشەنى, ماقانشى اۋدانىنىڭ قارابۇلاق اۋىلىندا جانە ءۇرجار اۋدانىنىڭ جاناي اۋىلىندا سپورت ءمودۋلى اشىلدى. قازىر كۋرچاتوۆ قالاسىندا دەنەشىنىقتىرۋ-ساۋىقتىرۋ كەشەنى, اياگوزدە سپورت كەشەنى, اباي اۋدانىنىڭ سارجال, كوكباي اۋىلدارىندا, جارما اۋدانىنىڭ جاڭعىزتوبە اۋىلىندا, بەسقاراعاي اۋدانىنىڭ ەرنازار اۋىلىندا, اقسۋات اۋدانىنىڭ ويشىلىك اۋىلىندا سپورتتىق مودۋلدەردىڭ, شار قالاسىندا, بەسقاراعاي اۋدانىنىڭ بەسقاراعاي اۋىلىندا, جارما اۋدانىنىڭ قالباتاۋ اۋىلىندا ءجۇزۋ باسسەيندەرى سالىنىپ جاتىر.
– وبلىستىڭ دەنساۋلىق ساقتاۋ سالاسىندا دا قوردالانعان ماسەلە از ەمەس. اۋرۋحانالار جەتىسپەيدى, بارىنىڭ ءوزى ەسكىرگەن. وسى تۇيتكىلدەردىڭ ءتۇيىنى قاشان شەشىلمەك؟
– بۇل سالادا ماسەلە كوپ ەكەنىن جاسىرمايمىز. ونى اشىق ايتىپ تا ءجۇرمىز. جىل باسىندا, قاڭتار ايىنىڭ سوڭىندا سەمەي قالاسىنداعى وبلىستىق جەدەل مەديتسينالىق جاردەم ستانساسىنا 10 سانيتارلىق اۆتوكولىكتىڭ كىلتىن سالتاناتتى تۇردە تابىستادىق. بۇل نىسان قازىرگى تاڭدا سانيتارلىق اۆتوكولىكتەرمەن تولىق قامتاماسىز ەتىلگەن. الايدا تەحنيكالاردىڭ جالپى توزۋ دەڭگەيى 90 پايىزدان اسادى. وسى ماسەلەنى شەشۋ ءۇشىن بىلتىر «اباي وبلىسى مەديتسينالىق ۇيىمدارى ءۇشىن سانيتارلىق اۆتوكولىك ساتىپ الۋ» جوباسى شەڭبەرىندە «ونەركاسىپتى دامىتۋ قورى» اق-مەن بىرلەسىپ, وبلىستىق بيۋدجەت قاراجاتى ەسەبىنەن ليزينگتىك قارجىلاندىرۋ ارقىلى Hyundai, JAC جانە «گازەل» ماركالى 100 سانيتارلىق اۆتوكولىكتەر ساتىپ الىندى. ونىڭ ىشىندە 67 اۆتوكولىك وبلىستىق جەدەل مەديتسينالىق جاردەم ستانساسىنا, 33 اۆتوكولىك اۋدانداعى مەديتسينالىق ۇيىمدارعا بەرىلەدى. جاڭا كولىكتەردى بيىلعى قىركۇيەك ايىنا دەيىن تابىستايتىن بولامىز. مۇنداي جاڭا كولىكتەر وبلىسىمىزعا 2020 جىلى الىنعان ەكەن. ياعني بەس جارىم جىلدان بەرى وسى سالاعا جاڭا كولىكتەر الىنباعان. ءوڭىردىڭ دەنساۋلىق ساقتاۋ سالاسىنىڭ ينفراقۇرىلىمىن دامىتۋ ماقساتىندا جۇيەلى جۇمىس جۇرگىزىلۋدە. جالپى, 2025 جىلى وبلىستىڭ دەنساۋلىق ساقتاۋ سالاسىنىڭ ماتەريالدىق-تەحنيكالىق بازاسىن جاڭعىرتۋعا 6 جارىم ملرد تەڭگەدەن استام قارجى ءبولىندى.
– ۋاقىت ءبولىپ, سۇحبات بەرگەنىڭىزگە راحمەت.
اڭگىمەلەسكەن –
باقىتبەك قادىر,
«Egemen Qazaqstan»
