داريعا نازارباەۆا «استانا وپەرا» تەاترى ۇجىمىمەن بىرگە ارداگەرلەرگە قايىرىمدىلىق كونتسەرتىن ۇيىمداستىردى
ۇلى جەڭىستىڭ 70 جىلدىعىنا جەتكەن اياۋلى ارداگەرلەرگە بيىل كورسەتىلىپ جاتقان قۇرمەت پەن قوشەمەتتىڭ بار ءتۇرى دە جاراسىمدى بولىپ تۇر. ءوز كەزەگىندە اق سامايلى ارداگەرلەرىمىزگە «استانا وپەرا» تەاترىنىڭ وركەسترى مەن حورى داريعا نازارباەۆامەن بىرگە ەرەكشە كونتسەرتتى سىيعا تارتتى. ول كونتسەرتتىڭ تەلەۆيزيالىق نۇسقاسىن «حابار» ارناسى كورەرمەن نازارىنا ۇسىندى.
قالاي دەسەك تە, حاس تالانتتار مەن قاسىرەتتتى تاعدىرلار تۋدىرعان مايدان اۋەندەرى داريعا نازارباەۆانىڭ جۇرەگىنە ەرەك جاقىن ەكەنىن بىلەمىز. ەگەر ەلدىڭ ەسىندە بولسا, داريعا نازارباەۆانىڭ ەڭ العاشقى جەكە كونتسەرتى دە 2001 جىلى ۇلى جەڭىستىڭ قۇرمەتىنە ارنالعان بولاتىن. شىندىعىندا دا تالانتتى, دارىندى جان جىل سايىن وسى ءۇردىستى جالعاستىرىپ, ءوزىنىڭ ەرەكشە قۇرمەت تۇتاتىن تىڭدارماندارىنا قايىرىمدىلىق كونتسەرتتەرىن وتكىزىپ تۇرۋدى داستۇرگە اينالدىردى. ودان تۇسكەن قاراجات تا ۇلى وتان سوعىسى ارداگەرلەرىنىڭ قورىنا ءتۇسىپ وتىرادى.
« ۇلى جەڭىسكە ارناۋ...» اتتى كونتسەرتتىڭ ءاربىر ءانى عاسىر تۋدىرعان اۋەندەردەن قۇرالىپ, تىڭداۋشىلارىن شەكسىز ەموتسياعا شومىلدىرىپ, كوزدەرگە بۇگىنگە تاۋبە ايتقان قۋانىش پەن كەشەگىمىزگە سالاۋات ايتقان ساعىنىشتىڭ جاسىن ءۇيىردى. مايدان مەلوديالارى ولاردى بىردە ماحاببات پەن سوعىس سۇراپىلى ارپالىسقان جاستىق شاققا ساياحات شەككىزىپ, بىردە قاندىكويلەك جولداستارىمەن قاۋىشتىرىپ, بىردە وسى كۇنگە جەتكىزگەن جازمىشتىڭ قۋانىشىنا بولەدى. كونتسەرتتى داريعا نازارباەۆا «انا تۋرالى باللادا» انىمەن اشتى. ءسوزىن اقىن ا.شامكەنوۆ جازىپ, ءانىن سازگەر ج.سەيىلوۆ شىعارعان تۋىندىنى مەتستسو-سوپرانو داۋىستى دارىن يەسى ادەمى ورىنداپ, ءوزىنىڭ اعا بۋىنعا دەگەن شەكسىز دە شىنايى العىسىن ءبىلدىردى. وسىلايشا تاريحقا تاعزىم ەتتى, ءبىر ءسات بولسا دا اياۋلى ارداگەرلەرىمىزگە ەرەكشە كوڭىل-كۇي سىيلادى. ومىراۋلارى وردەنگە, كەۋدەلەرى قازىنالى ەستەلىكتەرگە تولى باتاگوي قاريالارىمىز تالانتتى قىزدارىنا رياسىز قول سوقتى. ماڭگىلىك ايتىلا بەرەتىن, ەشقاشان ەسكىرمەيتىن مايدان اندەرى, وتانعا دەگەن شىنايى سۇيىسپەنشىلىكتەن تۋعان شىعارمالاردىڭ بارلىعى دا ولمەيتىن ناعىز ماحابباتتىڭ قۇدىرەتىمەن سۋارىلعان. سوندىقتان دا حاس تالانتتار تۋدىرعان كونتسەرتتىك باعدارلامانىڭ تالعامپاز رەپەرتۋارى تىڭداۋشىلارىنىڭ دا كوڭىلىنەن شىقتى. ءويتكەنى, وسىناۋ كونتسەرتتە ءاربىر ءاننىڭ ءوز تاعدىرى بولسا, ورىنداۋشىلارى دا ونى جۇرەگىمەن جەتكىزدى. بۇكىل ءبىر ءداۋىردىڭ قۋانىشى مەن قاسىرەتى الماسقان دراماسى ءاننىڭ تىلىمەن ارداگەرلەرگە تارتۋ ەتىلدى. اسىرەسە, ارداگەرلەرگە «قايىقتا», «ءانىم سەن ەدىڭ» جانە «اۋىلىم» مەن قۇلاققا جىلى تيەتىن «سيني پلاتوچەك», «جدي مەنيا», «ۆ گورودسكوم سادۋ», «سمۋگليانكا», «ستارىي پارك», «ستاريننىي ۆالس», «ۆالس و ۆالسە», «پەسني يزدالەكا» سياقتى ۇلكەن ورىنداۋشىلىق شەبەرلىكتى تالاپ ەتەتىن تاماشا اندەر اعا بۋىنعا ەستەن كەتپەس ۇلكەن اسەر سىيلادى. كونتسەرت ادەمى ەستەلىكتەرمەن ءورىلىپ وتىرىلدى. كونتسەرتكە «استانا وپەرا» تەاترىنىڭ مۋزىكالىق جەتەكشىسى, قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ ديريجەرلىك ەتىپ, ساحنالىق قويىلىمداردى قورعانىس مينيسترلىگىنىڭ ورتالىق انسامبلىنىڭ مۋزىكانتتارى مەن بيشىلەرى كوركەمدەدى. ايگىلى پيانيست تيمۋر ۋرمانچەەۆ «قاراتورعاي» ارقىلى مۋزىكالىق شەبەرلىگىن پاش ەتتى. ونىڭ ۇستىنە بۇگىندە سالتاناتى كەلىسكەن «استانا وپەرا» زالى مەن تەاتردىڭ ايتۋلى سوليستەرى كونتسەرتتىڭ سالماعىن اسىردى. داريعا نازارباەۆا زامانا اۋەندەرى شىرقالىپ جۇرگەن ءارى مەملەكەتىمىزدىڭ دە ماقتانىشى بولىپ تابىلاتىن وسىناۋ بەكزات ساحنانىڭ ساڭلاقتارى – مەدەت شوتاباەۆ, مەيىر باينەش, اندرەي ترەگۋبەنكو, ازامات جىلتىركوزوۆ, يگور بلاگودارنىي سىندى ناعىز تالانتتارمەن ءبىر دەڭگەيدە شىرقاپ, ارداگەرلەرىمىزدىڭ قوشەمەتىنە دە بولەندى, باتاسىن دا الدى.
ايناش ەسالي, «ەگەمەن قازاقستان».
استانا.
