فوتو: gov.kz
كەدەندىك باجدار مەن سالىقتاردى تولەۋ مەرزىمدەرى قولدانىستاعى كەدەن زاڭناماسىنىڭ نورمالارىنا سايكەس بەلگىلەنەدى. ءاربىر جاعداي بويىنشا تولەم ۋاقىتى تاۋاردىڭ سيپاتىنا جانە كەدەندىك راسىمگە بايلانىستى ناقتىلانادى.
زاڭنامادا تولەم مەرزىمىن وزگەرتۋ مۇمكىندىگى دە قاراستىرىلعان. اتاپ ايتقاندا, اكەلىنەتىن كەدەندىك باجداردى تولەۋ كەيىنگە قالدىرىلۋى نەمەسە ءبولىپ تولەۋ تارتىبىمەن جۇزەگە اسىرىلۋى مۇمكىن. كەيىنگە قالدىرۋ كەزىندە سوما بىرجولعى تارتىپپەن تولەنسە, ءبولىپ تولەۋ بەكىتىلگەن كەستە بويىنشا كەزەڭ-كەزەڭىمەن جۇرگىزىلەدى. مۇنداي جەڭىلدىك تولەۋشىنىڭ ءوتىنىشى نەگىزىندە كەدەن ورگانىنىڭ شەشىمىمەن جانە مىندەتتەمەلەردىڭ ورىندالۋىن قامتاماسىز ەتۋ شارتىمەن بەرىلەدى.
تولەم مەرزىمىن ۇزارتۋ 6 ايعا دەيىنگى ۋاقىتتى قامتيدى. ەگەر پايىز ەسەپتەلەتىن بولسا, مەرزىم 6 ايعا دەيىن بەلگىلەنەدى. ال زاڭدا كورسەتىلگەن نەگىزدەر بولعان جاعدايدا – توتەنشە جاعدايلار, بيۋدجەتتىك قارجىلاندىرۋ, حالىقارالىق شارتتار نەمەسە اۋىل شارۋاشىلىعى ونىمدەرىن جەتكىزۋ سەكىلدى جايتتاردا – 6 ايعا دەيىن پايىزسىز مەرزىم بەرۋ مۇمكىندىگى قاراستىرىلعان.
كەدەندىك باجدار مەن سالىقتار ۋاقىتىلى تولەنبەگەن جاعدايدا, زاڭنامادا كوزدەلگەن ەرەكشەلىكتەردەن تىس ءوسىمپۇل ەسەپتەلەدى. ال تولەۋدى كەيىنگە قالدىرۋ نەمەسە ءبولىپ تولەۋ كەزىندە ەسەپتەلەتىن پايىز مولشەرى ۇلتتىق بانك بەلگىلەيتىن بازالىق مولشەرلەمە نەگىزىندە ايقىندالىپ, بەلگىلەنگەن تارتىپپەن تولەنەدى.
كەدەندىك تولەمدەر قازاقستاننىڭ ۇلتتىق ۆاليۋتاسىندا جۇرگىزىلەدى. تولەمدى تولەۋشىنىڭ ءوزى نەمەسە ونىڭ تاپسىرماسى بويىنشا ءۇشىنشى تۇلعا جۇزەگە اسىرا الادى. قاراجات ەكىنشى دەڭگەيلى بانكتەر مەن وزگە دە ۋاكىلەتتى ۇيىمدار ارقىلى اۋدارىلىپ, بيۋدجەتكە بيۋدجەتتىك سىنىپتامانىڭ ءتيىستى كودتارى بويىنشا ەسەپكە الىنادى.
تولەم كۇنى رەتىندە تولەم تاسىلىنە قاراي قاراجاتتىڭ بانكتىك شوتتان ەسەپتەن شىعارىلعان كۇنى نەمەسە قولما-قول اقشا ەنگىزىلگەن كۇن ەسەپتەلەدى.
كەدەن سالاسىندا لاۋازىمىن اسىرا پايدالانعان قازاقستان ازاماتى يسپانيادان ەكستراديتسيالاندى
