7-11 اقپان كۇندەرى بىرىككەن اراب امىرلىكتەرىندە جەتىنشى مارتە ۇيىمداستىرىلعان بۇل سايىس بەيرەسمي تۇردە «ارنايى جاساق وليمپياداسى» اتالىپ كەتكەن. بيىلعى دوداعا الەمنىڭ 48 ەلىنەن 109 كوماندا قاتىسىپ, كاسىبي دايارلىقتىڭ ەڭ جوعارى دەڭگەيىن سىنعا سالدى. قازاقستان اتىنان مەملەكەتتىك كۇزەت قىزمەتى, ۇلتتىق قاۋىپسىزدىك كوميتەتى جانە ىشكى ىستەر مينيسترلىگىنىڭ ارنايى ماقساتتاعى بولىمشەلەرىنەن قۇرالعان بەس قۇراما ونەر كورسەتتى.
جالپى قورىتىندى بويىنشا «Kazakhstan C» كومانداسى التىن جۇلدەنى يەلەندى. ال «Kazakhstan A» قۇراماسى كۇمىس جۇلدەگە قول جەتكىزدى. بۇدان بولەك, تاعى ءۇش وتاندىق كوماندا ۇزدىك 20 قۇرامانىڭ قاتارىنا ەنىپ, ەل قورجىنىن تولتىردى. بۇل ناتيجە وتاندىق ارنايى جاساقتىڭ جۇيەلى دايىندىعى مەن كاسىبي دەڭگەيىن ايقىن اڭعارتتى.
سايىس بارىسىندا قاتىسۋشىلار تاكتيكالىق وپەراتسيالار جۇرگىزۋ, عيمارات پەن مۇنارانى باسىپ الۋ, كەپىلگە الىنعاندار مەن وفيتسەرلەردى قۇتقارۋ, سونداي-اق كۇردەلى كەدەرگىلەر جولاعىنان ءوتۋ سەكىلدى بەس ارنايى تاپسىرمانى ورىندادى. جاۋىنگەرلەر بارلىق كەزەڭدە شاپشاڭدىق, توزىمدىلىك جانە كوماندالىق ۇيلەسىمنىڭ جوعارى ۇلگىسىن كورسەتتى.
حالىقارالىق كورەرمەندەردىڭ ەرەكشە نازارىن «Tomiris» قىزدار قۇراماسى اۋداردى. قۇراما ءتۋرنيردىڭ ءار كەزەڭىندە ايەلدەر كوماندالارى اراسىندا ۇزدىك اتانىپ, جالپى ەسەپتە بىرقاتار ەرلەر كوماندالارىن دا ارتتا قالدىردى. بۇل ايەل جاۋىنگەرلەردىڭ دە الەمدىك دەڭگەيدە باسەكەگە قابىلەتتى ەكەنىن كورسەتتى.
قازاقستاننىڭ ارنايى جاساعى UAE SWAT Challenge-2026 ءتۋرنيرىنىڭ جەڭىمپازى اتاندى
ەلىمىز ارنايى ماقساتتاعى بولىمشەلەرى بۇعان دەيىن دە وسى تۋرنيردە جۇلدەلى ورىندارمەن ورالعان. بيىلعى تابىس سول تۇراقتى جەتىستىكتىڭ زاڭدى جالعاسى سانالادى.
جەڭىسپەن ورالعان ساربازدارعا پرەزيدەنت قاسىم-جومارت توقاەۆ قۇتتىقتاۋ جولداپ, جاۋىنگەرلەردىڭ جوعارى دايارلىعىن, تاباندىلىعى مەن وتانسۇيگىش رۋحىن اتاپ ءوتتى.
UAE SWAT Challenge: قازاقستان ارنايى جاساقتارى ءتۋرنيردىڭ العاشقى كۇنىندە توپ جاردى
12 اقپاندا جەڭىمپازدار مەن تۋرنيرگە قاتىسۋشىلاردى استانا قالاسىنداعى حالىقارالىق اۋەجايدا سالتاناتتى تۇردە قارسى الۋ ءراسىمى ءوتتى. ەل نامىسىن قورعاپ, الەمدىك دودادا توپ جارعان ارنايى جاساق ساربازدارىن ارىپتەستەرى, قىزمەت باسشىلىعى, جاقىندارى مەن جانكۇيەرلەر زور قوشەمەتپەن كۇتىپ الدى.
