جاس ءانشى جاندوس قارجاۋباي شىرقاپ جۇرگەن بۇل ءاننىڭ اۋەنى دە, ءسوزى دە تىڭدارماندى ەلىتىپ اكەتەدى. توي-تومالاق توڭىرەگىندەگى جەڭىل اندەي كورىنگەنىمەن, شىعۋ تاريحى سالماقتى, شىنايى ماحابباتتىڭ قۇدىرەتىنەن تۋعان دۇنيە. ءسوزىنىڭ دە, سازىنىڭ دا اۆتورى – سامار اۋدانىنىڭ تۋماسى اسقار ىسقاق. كەزىندە «مۇزتاۋ» توبىنىڭ قۇرامىندا ءان شىرقاپ, جۇرتشىلىققا تانىلعان ونەرپازبەن ارقانى كەڭگە سالىپ, اڭگىمەلەسكەنىمىز بار. كوڭىلدى كەشتە لەك-لەگىمەن اۆتورلىق اندەرىن ورىندادى. ءبىز قول سوقتىق, بارەكەلدى دەستىك. سوندا عوي, بۇگىندە حيتكە اينالعان «اقمارالىم» ءانىنىڭ شىعۋىنا ۇڭىلگىمىز كەلگەنى. اسقار ىسقاق تا تارتىنبادى, جىميىپ قويىپ, تاعدىرلى تاريحتان تارتا سويلەدى.
«قىزمەت بابىمەن كوكپەكتى اۋدانىنا اۋىسىپ, سول جاقتا كونتسەرت بەردىك. «مۇزتاۋ» توبىنىڭ دۇركىرەپ تۇرعان شاعى. ءان مەن كۇيگە سۋساعان ەل زالعا لىق تولدى. جاسى بار, قارتى بار... كورەرمەن قول سوققان سايىن شابىتتانامىز. اندەتىپ تۇرىپ, ءبىر ۋاقىتتا زالدىڭ ورتاسىنداعى سۇلۋعا كوزىمنىڭ تۇسكەنى. مولدىرەگەن سۇلۋ ماعان قادالا قاراپ تۇرعانداي كورىندى. ءانىمنىڭ ءسوزىن ۇمىتىپ قالماسام ەكەن دەيمىن. كونتسەرت تەزىرەك اياقتالىپ, الگى قىزبەن تانىسۋعا اسىقتىم. ءبىر جارىم ساعاتتىق كونتسەرتىم عاسىرعا سوزىلعانداي, ۋاقىت وتپەدى. ارۋ دا كوز الدىمنان كەتپەدى. كونتسەرت سوڭىندا ەل-جۇرتتىڭ قوشەمەتىنەن, قۇشاق-قۇشاق گ ۇلىنەن گورى الگى قىزدىڭ قيىلا قاراعانى ماڭىزدى سەكىلدى ەدى. كوپشىلىكتىڭ ىشىنەن ىزدەپ ءجۇرىپ تاپتىم ايتەۋىر. قالاي باتىلىم جەتكەنى ەسىمدە جوق, تانىستىم. سول اۋىلداعى اپكەسىنىڭ ۇيىنە كەلىپ جۇرگەن 11-سىنىپ وقۋشىسى ەدى. ەسىمى اقمارال. اڭگىمەمىز جاراسقان سوڭ سەزىمىمدى ءبىلدىردىم. ءوزى كورشى اۋىلدا تۇرادى ەكەن. ول زاماندا كولىك جوق, كورشى اۋىلدىڭ وزىنە جەتۋ قيامەت-قايىم. اۋەلدە دەمالىس سايىن كەلىپ جۇرگەن, كەيىن سيرەتتى. ساعىنا باستادىم. اپكەسىنىڭ ءۇيى جاعىنا ەلەڭدەي ءجۇرىپ, كومەيگە ادەمى اۋەن كەلە باستادى. كەيىن جۇرەكتەگى سەزىم ءسوز بولىپ توگىلدى.
«جوعالاسىڭ كوپ نەگە,
كەلىپ كەتپەي اپكەڭە؟
ساعىنىشىم, قايداسىڭ,
قاسىما كەل, ەركەلە...» دەپ اندەتىپ ءجۇردىم. ءسويتىپ ءجۇرىپ, كادىمگى ولەڭ بولىپ ءورىلىپ ءتۇستى. اۋەن دە دايىن ەدى. شىعارماشىلىعىمىزدىڭ دا شارىقتاپ تۇرعان شاعى. ءار شىعارعان ءانىمىز تىڭدارماننىڭ قۇلاق قۇرىشىن قاندىرىپ جاتتى. كوپ ۇزاماي جاڭا ءانىم «اقمارالىمدى» دا ساحناعا الىپ شىقتىق. تەز تاراپ كەتتى. 2000 جىلداردىڭ ءحيتى دەسەك تە بولادى. جىلدار ءوتتى. اقمارال ەكەۋىمىز ءسوز بايلاسىپ, الىپ قاشاتىن بولىپ شەشتىم. سەبەبى, ونىڭ اكەسى ماعان قارسى بولدى. اشىعىن ايتايىن, مەن قاراپايىم وتباسىدان شىققان بالامىن. يىعىما اسىپ جۇرگەن دومبىرامنان باسقا تۇگىم جوق. ونەرىم – ولەڭىم. ول بولسا, باقۋاتتى بايدىڭ قىزى. اكەسى اۋدانداعى بەدەلدى كاسىپكەر. دەسە دە, ءبىزدىڭ ءبىر-بىرىمىزگە دەگەن سەزىمىمىز بارىنەن بيىك تۇر ەدى. ناعىز ماحاببات وسى شىعار دەپ ويلاعام. سولاي دا. شىن عاشىق بولماسام, مۇنداي ولەڭ تۋماس تا ەدى عوي. ءسويتىپ, ۋادەلەسكەنىمىزدەي ايلى ءتۇنى اقمارالىمدى الىپ قاشتىم. الىپ قاشقاندا دا ءوز اۋىلىما ەمەس, قالبا جوتالارىنىڭ قايداعى ءبىر قۋىسىنداعى الماس دوسىمنىڭ اۋىلىنا قاراي اتتاندىم. قۋعىنشى شىقسا, اداستىرىپ كەتسەم دەگەن وي عوي. باعىت بوكە دەيتۇعىن شاعىن اۋىل. زۋلاعاننان زۋلاپ, ءتۇن اۋا جەتتىك. اۋىل ءىشى جىم-جىرت. كەشكى اس-سۋىمىزدى ىشكەن سوڭ كوڭىل دە جايلاندى. باقىتتان باسىمىز اينالىپ ءمازبىز. ىشتەي بولاشاقتىڭ جوسپارىن قۇرىپ تاستادىق. سويتكەنشە بولعان جوق, ءۇيدىڭ ارتقى جاعىنان اۆتوكولىكتىڭ جارىعى جارق ەتتى. ەسىگى سارت-سۇرت جابىلدى دا, باسا-كوكتەپ قىزدىڭ اكەسى كىردى. سۇستانا قارادى بىزگە. قىزىن سۇيرەي جونەلدى. مەن سوڭدارىنان شىقتىم. اقمارالدى ارتقى ەسىكتەن وتىرعىزىپ, ءوزى رۋلگە جايعاسقانشا, اقمارال ارعى ەسىكتەن اتىپ شىعىپ قاشقان. دۇنيە استاڭ-كەستەڭ بولدى دا كەتتى. اشۋلى اكە قويسىن با, قىزىن اقىرى الىپ كەتتى. ءبىر ساتكە ءومىر وسىمەن توقتاپ قالعانداي كورىندى. سونداعى تاڭعالعانىم, اكە جۇرەكتىڭ جۇمباق سەزىمى. ەشكىمنىڭ ويى تۇگىلى تۇسىنە كىرمەيتىن اۋىلعا الىپ قاشقانىن قايدان ءبىلدى دەيمىن دە.
ۋاقىت ءوتتى. بۇل جاعداي ۇمىت بولا باستادى. اقمارالمەن جاسىرىن كەزدەستىك. ۇرلانا بارىپ ءجۇردىم. ماحابباتىمىز ودان سايىن ءورشي ءتۇستى. اقىر اياعى ۇيلەندىك, ءۇيلى بولدىق, ۇلدى بولدىق. قۇدايعا شۇكىر, ۇلىم قازىر ەر جەتتى...» دەپ تاعدىرىنان سىر شەرتە وتىرىپ, «اقمارالىم» ءانىن دومبىرامەن ورىنداپ بەردى اسقار ىسقاق. ويلاپ وتىرساق, ەكەۋىنىڭ عاشىقتىق وقيعاسى كەشەگى ەڭلىك پەن كەبەكتىڭ, قوزى مەنەن باياننىڭ ماحابباتىنا پارا-پار. قايدان وقىعانىمدى ۇمىتتىم, ساعان اقىن نەمەسە جازۋشى عاشىق بولسا دەيدى, ولمەيدى ەكەنسىڭ. ايتقانداي, اسقاردىڭ جۇرەگىندە عانا ەمەس, كۇللى تىڭدارماننىڭ جۇرەگىندە اقمارال ماڭگى جاسايدى.
