بۇل جولعى ءىس-شارا ەرتە ارالاسۋ ورتالىعىنىڭ مۇمكىندىكتەرىنە ارنالدى. بالالارعا قاي جاستان باستاپ كومەك كورسەتىلەتىنى, سۇيەمەلدەۋ كىمگە قولايلى ەكەنى جانە جۇمىستىڭ ناتيجەسى قالاي باعالاناتىنى تۋرالى ەرتە ارالاسۋ الەۋمەتتىك قىزمەتتەر ورتالىعىنىڭ ديرەكتورى نۇرزيا الىمبەكوۆا ايتىپ بەردى.
ورتالىقتا بالالاردىڭ دامۋىنا كەرى اسەر ەتەتىن فاكتورلاردى ەرتە كەزەڭدە انىقتاپ, وتباسىنا كەشەندى قولداۋ كورسەتۋ, بالالاردىڭ الەۋمەتتىك ءارى ءبىلىم بەرەتىن ورتاعا تەز ءسىڭىسىپ كەتۋىنە جاعداي جاسالعان. ناتيجەسىندە 167 بالاعا جانە وتباسىنا كومەك كورسەتىلگەن.
بالا كۇتىمىنە بايلانىستى جاردەماقى: قاڭتار ايىندا قانشا تەڭگە تولەندى؟
ورتالىققا جۇگىنگەن بالالاردىڭ 82 پايىزىنىڭ دامۋى قيىندىق تۋعىزسا, 33 پايىزىندا قالىپتى ديناميكا بايقالعان. ال 21 پايىزىنا ارنايى قىزمەت كورسەتىلىپ, مەكتەپكە دەيىنگى ءبىلىم بەرۋ ۇيىمدارىنا بارۋعا دايىندىقتان ءوتتى.
«ەرتە ارالاسۋ جوباسىن الەۋمەتتىك قولداۋدىڭ تۇراقتى جۇيەسى رەتىندە قاراستىرىپ وتىرمىز. ونىڭ اياسىندا قىزمەت جەلىسىن كەڭەيتىپ, كادرلىق الەۋەتتى ارتتىرا وتىرىپ, قىزمەت ساپاسىن ارتتىرا تۇسەتىن بولامىز. الداعى ۋاقىتتا قىزمەتتەر جەلىسىن كەڭەيتۋ مەن كادرلىق الەۋەتتى ۇلعايتۋ جوسپارلانىپ وتىر. بيىلعى ءساۋىر ايىنا قاراي رتالىقتاعى مامانداردىڭ سانى 26-عا جەتەدى. ەرتە كومەك بەرەتىن باعدارلامالار بويىنشا جۇمىس ىستەلىپ, دامۋ ديناميكاسىنا ۇزبەي باقىلاۋ جاسالدى. سويلەۋ مەن كوممۋنيكاتسيانى دامىتۋ, قيمىل-قوزعالىس, تانىمدىق بەلسەندىلىك, ءوز-وزىنە قىزمەت كورسەتۋ داعدىسىن قالىپتاستىرۋ بويىنشا قىزمەت كورسەتىلىپ, سونداي-اق اتا-انالارعا پسيحولوگيالىق كەڭەس بەرىپ, بالالاردىڭ الەۋمەتتەنۋىنە بارىنشا جاعداي جاساۋعا تىرىسادى», دەدى سپيكەر.
ونىڭ ايتۋىنشا, بالا تۋا سالىسىمەن ورتالىقتىڭ قىزمەتىن الا الادى. نەگىزىنەن ءۇش جاسقا دەيىنگى بالالاردى قابىلداعانىمەن, كەيدە وتباسى مەن بالا قاجەتتىلىگىنە قاراي جەتى جاسقا دەيىن سۇيەمەلدەنۋى مۇمكىن. مامانداردىڭ پىكىرىنشە, ەرتەرەك جۇگىنسە بالانىڭ دامۋىن ۋاقتىلى قولداپ, الداعى قيىندىقتىڭ الدىن الۋعا مۇمكىندىك بولادى.
ورتالىق جۇمىسىنىڭ ماڭىزدى ەرەكشەلىگى – مەديتسينالىق دياگنوزدىڭ بولۋى مىندەتتى ەمەس. ەگەر بالانىڭ مىنەز-قۇلقى مەن ءجۇرىس-تۇرىسىندا اتا-اناسىن الاڭداتارلىقتاي ءبىر جاعدايلار بولىپ جاتسا, رەسمي مامانداردىڭ الدىنا بارماي-اق, ولار وسى جەردەن-اق كەرەكتى كەڭەس پەن قولداۋ الا الادى.
مۇمكىندىگى شەكتەۋلى بالالارعا – ەرەكشە نازار
«كەيدە اتا-اناسى ءبىر نارسەنىڭ دۇرىس ەمەس ەكەنىن ىشتەي سەزەدى, سونىڭ ءوزى بىزگە جۇگىنۋگە جەتكىلىكتى. ول نە بولعانىن ءتۇسىنىپ, جاعداي ۋشىعىپ كەتپەي تۇرىپ قولداۋ كورسەتۋگە كومەكتەسەدى. ورتالىقتاعى كومەك دامىتۋ ورتالىقتارىنداعى ساباق پەن مەديتسينالىق كومەكتەن وزگەشە. مۇندا ماماندار بالاعا عانا ەمەس, اتا-اناسىنا دا كوڭىل ءبولىپ, جۇمىس ىستەيدى. ۇسىنىستاردى كۇندەلىكتى ومىرگە ەنگىزۋگە كومەكتەسەدى. بۇل ءبىر رەتتىك ساباق ەمەس, جۇيەلى تۇردە سۇيەمەلدەۋ. وتباسىنىڭ كۇندەلىكتى ومىرىندە وسىنداي كەڭەستەرگە ارقا سۇيەگەنى بىزگە وتە ماڭىزدى. ونىڭ تيىمدىلىگىن فورمالدى كورسەتكىشتەرمەن ەمەس, اتا-انالاردىڭ وزدەرى بايقاپ وتىرعان وزگەرىستەر ارقىلى باعالايمىز. بالاعا قارىم-قاتىناس جاساۋ جەڭىلدەيدى سوندا, جاڭا داعدى قالىپتاسادى, ەرەسەكتەر جاعى دا بۇرىنعىداي الاڭداي بەرگەنىن قويادى», دەيدى سپيكەر.
ورتالىق ماماندارى جۇمىسىن وتباسى مۇشەلەرىمەن بىرلەسىپ تالقىلاپ وتىرادى. قاجەت بولعان جاعدايدا كومەك كورسەتۋ فورماتى تۇزەتىلىپ, سۇيەمەلدەۋ بالا مەن ونىڭ جاقىندارىنىڭ سۇرانىسىنا قاراي وزگەرتىلەدى.
