ازىرلەنىپ جاتقان باسسەيندىك جوسپارلار بىلتىر قابىلدانعان سۋ كودەكسىن ىسكە اسىرۋدىڭ نەگىزگى تەتىكتەرىنىڭ ءبىرى سانالادى. ءار باسسەينگە ارنالعان قۇجاتتار كەيىن سۋ رەسۋرستارىن كەشەندى باسقارۋدىڭ باس جوسپارىن دايىنداۋعا نەگىز بولادى. مينيسترلىكتىڭ مالىمەتىنشە, بارلىق باسسەيندىك جوسپاردى جىل سوڭىنا دەيىن اياقتاۋ كوزدەلىپ وتىر, ال باس جوسپار 2027 جىلدىڭ سوڭىنا قاراي دايىن بولادى. بۇل قۇجاتتار مەملەكەتتىك جوسپارلاۋدىڭ ماڭىزدى ەلەمەنتىنە اينالادى.
ءبىز ايتىپ وتىرعان «باسسەين» ۇعىمى تۇرمىستاعى ءجۇزۋ باسسەينى ەمەس, سۋ شارۋاشىلىعىنا قاتىستى عىلىمي تەرمين. سۋ شارۋاشىلىعى باسسەينى دەپ بەلگىلى ءبىر وزەنگە, كولگە نەمەسە سۋ جۇيەسىنە قۇياتىن بارلىق سۋ كوزدەرى قامتىلعان تابيعي اۋماق اتالادى. ياعني, بۇل – سۋدىڭ قايدان كەلىپ, قايدا باعىتتالاتىنىن تۇتاس قاراستىراتىن كەڭىستىك. سۋ رەسۋرستارىن باسقارۋدا ءدال وسى باسسەيندىك قاعيدا قولدانىلادى, ويتكەنى سۋ اكىمشىلىك شەكارامەن ەمەس, تابيعي ارنامەن اعادى. سوندىقتان سۋدى قورعاۋ مەن پايدالانۋدى وبلىس نەمەسە اۋدان بويىنشا ەمەس, تۇتاس سۋ جۇيەسى دەڭگەيىندە جوسپارلاۋ الدەقايدا ءتيىمدى سانالادى.
سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ بۇل جونىندە پارلامەنت سەناتىنىڭ قولداۋىمەن ۇيىمداستىرىلعان «تالداۋ مەكتەبى» قوعامدىق جوباسىنىڭ قاتىسۋشىلارىمەن وتكەن كەزدەسۋدە ايتتى. ونىڭ سوزىنشە, جاڭا جوسپارلار مەملەكەت باسشىسىنىڭ سۋ-ەنەرگەتيكا كارتاسىن ازىرلەۋ جونىندەگى تاپسىرماسىن ورىنداۋعا تىكەلەي قىزمەت ەتەدى.
«مەملەكەت باسشىسى قازاقستاننىڭ سۋ-ەنەرگەتيكا كارتاسىن جاساۋدى تاپسىردى. باسسەيندىك جانە باس جوسپارلار بۇل كارتانى ازىرلەۋگە نەگىز بولادى. ءبىز سۋ نىساندارىندا ەلەكتر ەنەرگياسىن ءوندىرۋ ءۇشىن قانشا كولەمدە سۋ پايدالانۋعا بولاتىنىن ناقتى انىقتاي الامىز. بۇل ماسەلە سۋ كودەكسىن ازىرلەۋ كەزىندە دە ەسكەرىلگەن», دەدى مينيستر.
كەزدەسۋ بارىسىندا مينيسترلىك ماماندارى مەن ۆەدومستۆوعا قاراستى ۇيىمداردىڭ باسشىلارى قاتىسۋشىلارعا سۋ كودەكسىندەگى جاڭاشىلدىقتار, سۋ شارۋاشىلىعى سەكتورىن تسيفرلاندىرۋ بارىسى جانە ىسكە اسىرىلىپ جاتقان ينفراقۇرىلىمدىق جوبالار تۋرالى كەڭىنەن مالىمەت بەردى. باياندامادان كەيىن تىڭداۋشىلار سالانىڭ كادر الەۋەتىن كۇشەيتۋ, قولدانىلىپ جۇرگەن تسيفرلىق شەشىمدەردىڭ تيىمدىلىگى جانە قوعامدا سۋعا ۇقىپتى قاراۋ مادەنيەتىن قالىپتاستىرۋ ماسەلەلەرى بويىنشا سۇراقتارىن جولدادى.
ايتا كەتەيىك, «تالداۋ مەكتەبى» جوباسى 2021 جىلى سەنات جانىنداعى جاس ساراپشىلار كلۋبىنىڭ باستاماسىمەن ىسكە قوسىلعان. باعدارلاما اياسىندا قاتىسۋشىلار سەگىز اپتا بويى دەرەكتەردى جيناۋ مەن تالداۋ ادىستەرىن مەڭگەرىپ, اناليتيكالىق ماتەريال ازىرلەۋ داعدىلارىن جەتىلدىرەدى. وقۋ قورىتىندىسىندا جاس اناليتيكتەر ءوز ۇسىنىستارىن مەملەكەتتىك ورگاندارعا, سونىڭ ىشىندە مينيسترلىككە جولدايدى.
