قابىرعالى قالامگەر ءا.قاڭتارباەۆتىڭ 2023 جىلى جارىق كورگەن بۇل تۋىندىسى جارى گۇلجان ادىلعازىقىزىنىڭ رۋحىنا ارنالعان. كىتاپتا شىم-شىتىرىق وقيعادان گورى ەكى جاستىڭ اراسىنداعى نازىك ماحاببات كوبىرەك سيپاتتالعان. ماڭگىلىك ماحاببات باياندالعان. ولاي دەيتىنىمىز, اۆتور جارىمەن جاساسقان جارتى عاسىرلىق عۇمىرىن جازعان. كىتاپتى وقىپ شىعىپ, وي تۇيگەن جازۋشى باقىت جاليەۆا درامالاسا, جاس رەجيسسەر اباي داۋلەت ۇلى ساحناعا لايىقتاپ, جوعارى دەڭگەيدە الىپ شىقتى.
ساحنادا ءۇش الىبەك, ءۇش گۇلجان. سومداعاندارى ءبىر ءرول, ءبىر تاعدىر. ءبىر ساعاتقا سوزىلعان قويىلىمدا قانشاما فيلوسوفيالىق استار بار. ارينە, كوزبەن ەمەس, كوكەيمەن كورگەن ادامعا.
قويىلىمنىڭ تۇپكى ماقساتى جان-جارىڭدى باعالاۋعا, ماحابباتتى ايالاۋعا شاقىراتىنداي. سونداي-اق مىناۋ الەمدە ماڭگىلىك ماحابباتتىڭ بار ەكەنىن دە ەسكەرتەدى. وتباسىلىق قۇندىلىق دەپ ۇرانداتىپ جۇرگەن يدەولوگيامىز دا وسىناۋ قويىلىمنان كورىنىس تابادى.
استارلى فيلوسوفيا دەپ وتىرعانىم, قويىلىم سوڭىندا گۇلجان دۇنيە سالادى. اپپاق ماتا جابىلعان ايەل بەينەسى ساحنا تورىنە كوتەرىلەدى. مىنە, وسى تۇستا «ساعان اقىن نەمەسە جازۋشى, ءيا بولماسا, سۋرەتشى عاشىق بولسا, ولمەيسىڭ» دەگەن ءسوز ەسكە ءتۇستى. سول سەكىلدى الىبەك قاڭتارباەۆ ماڭگىلىك ماحاببات ءرامىزىن كورسەتكەندەي بولدى. كەشە عانا پرەمەراسى وتكەن ليريكالىق دراما وبلىستىڭ باسقا دا اۋداندارىندا ساحنالانا باستادى. ءار قويىلىمدا ينە شانشار ورىن جوق دەسەدى جۇرت.
وسكەمەن
