اتىراۋدا پوليتسيا قىزمەتكەرى ادام ءولتىرۋ كۇدىگىمەن قامالدى

اتىراۋ. 13 تامىز. اتىراۋ وبلىسىندا پوليتسيا قىزمەتكەرى ادام ءولتىرۋ كۇدىگىمەن قاماۋعا الىندى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى. ىشكى ىستەر باسقارماسىنا جەرگىلىكتى ازامات تۋىسىنىڭ ءىز-ءتۇسسىز جوعالعانى تۋرالى شاعىمدانعان. «وزبەكستان رەسپۋبليكاسىنىڭ 1987 جىلى تۋعان ازاماتى, ءۇي يەلەرى دەمالىسقا كەتكەندە وسىندا تۇرىپ قالعان. ارىزدانۋشىنىڭ ايتۋىنشا, تامىزدىڭ 5-نەن باستاپ تۋىسىنىڭ تەلەفونى ءوشىرۋلى, بايلانىس بولماعان. پاتەر قۇلپى بۇزىلماعان, بىراق ىشىندە اقشاسى مەن التىن بۇيىمدار ساقتالعان تەمىر جاشىك بولماي شىققان. جەدەل ۋاكىلدەرمەن جوعالعان ازاماتتى ىزدەستىرۋ بارىسىندا بۇل قىلمىسقا پوليتسيا قىزمەتكەرىنىڭ قاتىسى بار دەگەن اقپارات الىندى», – دەپ حابارلادى وبلىستىق ىشكى ىستەر دەپارتامەنتىنىڭ ءباسپاسوز حاتشىسى گۇلنازيرا مۇحتاروۆا. ىشكى ىستەر دەپارتامەنتى باستىعىنىڭ ءبىرىنشى ورىنباسارىنىڭ جەتەكشىلىگىمەن قۇرامىندا وزىندىك قاۋىپسىزدىك باسقارماسى قىزمەتكەرلەرى بار جەدەل تەرگەۋ-ىزدەستىرۋ توبى قۇرىلىپ, قىلمىسقا كۇدىكتى 1989 جىلى تۋعان وزبەكستان ازاماتى ۇستالىپ, ودان ايعاق زاتتار, التىن بۇيىمدار تابىلىپ, تاركىلەندى. سونىمەن بىرگە, وسى قىلمىسقا كۇدىكتى 1993 جىلى تۋعان پوليتسيا قىزمەتكەرى دە  انىقتالىپ, ۇستالدى. ىزدەستىرۋ شارالارىنىڭ ناتيجەسىندە قالادان 33 شاقىرىم قاشىقتاعى اتىراۋ-يندەر تاس جولىنىڭ العا اۋىلى تۇسىندا, دالادا كومىلىپ تاستالعان جابىرلەنۋشىنىڭ دەنەسى تابىلىپ الىندى. قازىر كۇدىكتى ەكەۋ, ءبىرى – پوليتسيا قىزمەتكەرى, ەكىنشىسى – وزبەكستان رەسپۋبليكاسىنىڭ ازاماتى ۋاقىتشا وقشاۋلاۋ ورنىنا قاماۋعا الىندى. ولارعا قىلمىستىق كودەكستىڭ ءۇش بىردەي بابىمەن, اتاپ ايتقاندا, 125-باپ «(ادام ۇرلاۋ), 192-باپ (قاراقشىلىق) جانە 99-باپ (ادام ءولتىرۋ) بويىنشا سوتقا دەيىنگى تەرگەۋ امالدارى جۇرۋدە. جولداسبەك شوپەعۇل. دەرەك: اتىراۋ وبلىستىق ىشكى ىستەر دەپارتامەنتىنىڭ ءباسپاسوز قىزمەتى. سۋرەت: azh.kz.