اقتوبەدە اتا زاڭعا ارنالعان كونفەرەنتسيا ءوتتى

اقتوبە. 13 تامىز. «نۇر وتان» پارتياسىنىڭ اقتوبە وبلىستىق فيليالىندا قازاقستان رەپۋبليكاسى كونستيتۋتسياسىنىڭ 20 جىلدىعىنا ارنالعان كونفەرەنتسيا وتكىزىلدى. بۇل تۋرالى egemen.kz ءتىلشىسى حابارلادى. وبلىستىق ءماسليحات پەن «نۇر وتان» پارتياسىنىڭ وبلىستىق فيليالى بىرلەسىپ ۇيىمداستىرعان كونفەرەنتسياعا ەلىمىزگە تانىمال قوعام قايراتكەرلەرى, وبلىستىڭ قۇرمەتتى ازاماتتارى, وبلىستىق ءماسليحاتتىڭ ءبىرىنشى جانە بەسىنشى شاقىرىلىمدارىنىڭ دەپۋتاتتارى, قالالىق جانە اۋداندىق ءماسليحاتتاردىڭ حاتشىلارى, سايلاۋ كوميسسيالارىنىڭ توراعالارى, سوت, پروكۋراتۋرا جانە ادىلەت ورگاندارىنىڭ, مەملەكەتتىك مەكەمەلەردىڭ باسشىلارى مەن قىزمەتكەرلەرى, ساياسي پارتيالار مەن ۇكىمەتتىك ەمەس ۇيىمداردىڭ وكىلدەرى قاتىستى. القالى ساياسي جيىننىڭ شىمىلدىعى «قازاقستان-اقتوبە» تەلەكومپانياسىنىڭ كونستيتۋتسيانىڭ 20 جىلدىعىنا ارناپ تۇسىرگەن بەينەفيلمىنىڭ كورسەتىلىمىمەن اشىلدى. جيىن باسىندا وبلىستىق ءماسليحاتتىڭي حاتشىسى ءسانيا قالدىعۇلوۆا ءسوز سويلەپ, اتا زاڭىمىزدىڭ ايشىقتى قاعيداتتارىنا نازار اۋداردى. ول ءبىزدىڭ ەلىمىزدە كوپ ۇلتتىلىق جانە ۇلتارالىق كەلىسىمگە باسىمدىلىق بەرىلەتىنىنە, 20 جىل بويى ۇستانىپ كەلە جاتقان كونستيتۋتسيامىزدىڭ بۇل قاعيداتتىڭ ءتيىمدى اتقارىلۋىنا قىزمەت ەتىپ كەلە جاتقانىنا توقتالدى. پارلامەنت ءماجىلىسىنىڭ ەكىنشى جانە ءۇشىنشى شاقىرىلىمدارىنىڭ دەپۋتاتى, فيلوسوفيا عىلىمدارىنىڭ دوكتورى امانگەلدى ايتالى «كونستيتۋتسيا – قازاقستاننىڭ نەگىزگى زاڭى» دەگەن تاقىرىپتا بايانداما جاسادى. ول مەملەكەت ساياساتىنىڭ ءتۇپ قازىعى اتا زاڭ ەكەنىنە نازار اۋدارا كەلىپ, ەلىمىزدەگى كونستيتۋتسيانىڭ قالىپتاسۋ جولدارىن سارالاي اڭگىمەلەدى. ەل ەگەمەندىگىنىڭ, مەملەكەت تاۋەلسىزدىگىنىڭ بەرىك تۇعىرى – اتا زاڭىمىز تۋرالى تاريح عىلىمدارىنىڭ دوكتورى نۇرتازا ابدوللاەۆ, مادەنيەت قايراتكەرى ەركىن قۇمانباەكوۆ تولىمدى پىكىرلەر ايتىپ, تاريح كوشىندەگى اتا زاڭىمىز بەن مەملەكەتتىك رامىزدەرىمىزدىڭ ماڭىزىن اشا ءتۇستى. كونفەرەنتسيا بارىسىندا ايتۋلى داتاعا وراي, ەلىمىزدىڭ كونستيتۋتسيالىق نەگىزىنىڭ قالىپتاسۋى مەن دامۋىنا ەلەۋلى ۇلەس قوسقانى جانە ەلىمىزدىڭ قوعامدىق-ساياسي ومىرىندەگى يگىلىكتى ىستەرى جانە بەلسەندىلىكتەرى ءۇشىن ءبىر توپ اقتوبەلىكتەرگە «قازاقستان ءماسليحاتىنا – 20 جىل» مەرەكەلىك مەدالى مەن وبلىستىق ءماسليحاتتتىڭ العىس حاتتارى تاپسىرىلدى. ساتىبالدى ءساۋىرباي. دەرەك, سۋرەت: egemen.kz.