اقتوبەدە تەلەەكسپەديتسيا جولعا شىقتى

اقتوبە. 13 تامىز. اقتوبەدە تەلەەكسپەديتسيا جولعا شىقتى. بۇل تەلەەكسپەديتسيانى «قازاقستان-اقتوبە» تەلەكومپانياسى قازاق حاندىعىنىڭ 550 جىلدىعىنا وراي ۇيىمداستىردى. ونىڭ قۇرامىنداعى شىعارماشىلىق توپ وبلىستاعى 12 اۋداندى ارالاپ, تاريحي زەرتتەۋلەر جۇرگىزىپ, تىڭ دەرەكتەردى تاۋىپ, بەينەبايان تۇسىرەدى. وسى جۇمىستاردىڭ ناتيجەسى «اتاجۇرت» باعدارلاماسىندا كورسەتىلەتىن بولادى. بۇل تۋرالى egemen.kz ءتىلشىسى حابارلادى. عىلىمي ەكسپەديتسيانىڭ جەتەكشىسى – تاريحشى بەكارىستان مىرزاباي. جوبانىڭ باس دەمەۋشىسى – «كول-اۆتو-اقتوبە» كولىك ورتالىعى. ال «اتاجۇرت» باعدارلاماسىنىڭ رەداكتورى, تەلەجۇرگىزۋشى ەربول شىما. – بيىل  كەرەي مەن ءاز جانىبەك نەگىزىن قالاعان قازاق حاندىعىنا 550 جىل تولادى. ءبىزدىڭ ۇجىمنىڭ ۇيىتقى بولۋىمەن ۇيىمداستىرىلعان تەلەەكسپەديتسيانىڭ باستى ماقساتى – وسى ەل ومىرىندەگى ەلەۋلى وقيعانىڭ ءوز دەڭگەيىندە اتالىپ وتىلۋىنە ۇلەس قوسۋ بولىپ تابىلادى. ءبىزدىڭ وڭىردە قۇندى جادىگەرلەر, تاريحي ورىندار وتە كوپ. كونەنىڭ كوزىندەي سول تاريحي ورىنداردى زەرتتەپ, زەردەلەپ, كورەرمەندەرگە ۇسىنۋدى ماقسات ەتكەن ەكسپەديتسيا جۇمىسى العا اۋدانىنان باستالادى, – دەيدى راۋكەن وتىنشين. شىعارماشىلىق توپ ءوز جۇمىسىن ەسەت كوكى ۇلى كەسەنەسىنە بارىپ, اتا رۋحىنا تاعزىم ەتىپ, قۇران باعىشتاۋدان باستايدى. ودان كەيىن تەدەەكسپەديتسيا بەلگىلى اقىن ءىزتاي مامبەتوۆتىڭ كىندىك قانى تامعان تابانتال-بەسقوسپا سەلولىق وكرۋگىنە بارادى. جوسپار بويىنشا ەكسپەديتسيا مۇشەلەرى ءار اۋدانعا ءبىر كۇننەن ايالدايدى. تەلەەكسپەديتسيانىڭ عىلىمي جەتەكشىسى بەكارىستان مىرزاباي ۋاقىتتىڭ تىعىزدىعىن, وسى از ۋاقىتتىڭ ىشىندە مول مالىمەت جيناپ ۇلگەرۋ كەرەكتىگىن ايتادى. ءبىزدىڭ وبلىستىڭ قاي ءوڭىرى بولماسىن, تۇنعان تاريح, تولعان شەجىرە ەكەنىن العا تارتادى. مىسالى, العادا ايگىلى الاش قايراتكەرى احمەت بايتۇرسىنوۆ ءدارىس بەرگەن مەكتەپتىڭ ورنى بار ەكەنىن, الاش كوسەمىنىڭ مۇندا 17 جىل العا وڭىرىندە بولىس بولعان احمەتكەرەي قوسۋاقوۆتىڭ ارنايى شاقىرتۋىمەن كەلگەنىن جەتكىزدى. ول اعىلشىن ساياحاتشىسى دجون كەستلدىڭ قارعالى, جامان قارعالى وزەندەرىنىڭ بويىندا بىرنەشە كۇن ايالداپ, قورعانداردى قازعانى تۋرالى دەرەكتەر بار ەكەنىن دە تىلگە تيەك ەتتى. سونداي-اق, ءاز جانىبەك حاننىڭ اقىلشىسى بولعان اسان قايعى بابامىزدان قالعان كەرەمەت جىرلاردى حالقىمىزدىڭ جادىندا ساقتالعانىن ەسكە سالا كەلىپ, تەلەەكسپەديتسيا ساپارى بارىسىندا اتقارىلار شارۋالاردىڭ بىرقاتارىنا توقتالا كەتتى. جيىندا «قازاقستان-اقتوبە» تەلەكومپانياسىنىڭ ديرەكتورى راۋكەن وتىنشين «كول-اۆتو-اقتوبە» كولىك ورتالىعىنىڭ وكىلى رافاەل مامبەتوۆكە تەلەەكسپەديتسيانىڭ تۋىن تابىس ەتتى. ءسويتىپ, تاريحتى تۇگەندەۋگە باعىت ۇستاعان تەلەەكسپەديتسيا جولعا شىقتى. بۇل ساپاردىڭ تاعىلىمدى دا, تابىستى بولاتىنىنا سەنىم مول. ساتىبالدى ءساۋىرباي. دەرەك: egemen.kz. سۋرەت: otautv.kz