اتىراۋدا 6 ادامنىڭ ولىمىنە سەبەپشى بولعان جۇرگىزۋشى سوتتالدى

اتىراۋ. 13 تامىز. اتىراۋ وبلىسىنىڭ جىلىوي اۋداندىق سوتى 6 ادامنىڭ ولىمىنە سەبەپشى بولعان جۇرگىزۋشىگە قاتىستى سوت ۇكىمىن جاريا ەتتى. بۇل تۋرالى وبلىستىق سوتتىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. سوتتالۋشى بيىلعى جىلدىڭ 19 مامىرىندا «كاماز-55111» ماركالى اۆتوماشيناسىمەن دوسسور-بەينەۋ تاس جولىندا كەلە جاتىپ الدىنداعى كولىكتى باسىپ وزباقشى بولادى. الايدا, ول كولىگىمەن قارسى باعىتقا شىعىپ, «لادا-لارگۋس» ماركالى اۆتوكولىگىمەن بەتپە-بەت سوقتىعىسادى. ناتيجەسىندە جەڭىل اۆتوكولىكتىڭ ىشىندەگى 6 ادام اپات سالدارىنان كوز جۇمىپ, ءبىر ادام اۋىر دەنە جاراقاتىمەن اتىراۋ وبلىستىق اۋرۋحاناسىنا جەتكىزىلگەن ەدى. «سوت سوتتالۋشىنىڭ جاساعان ارەكەتىنە وكىنەتىندىگىن جاۋاپتىلىعىن جەڭىلدەتەتىن ءمان-جايلار رەتىندە تانىپ, 5 جىلعا كولىك قۇرالىن باسقارۋ قۇقىعىنان جانە 7 جىل مەرزىمگە باس بوستاندىعىنان ايىرۋ جازاسىن تاعايىندادى», – دەپ حابارلادى وبلىستىق سوتتىڭ ءباسپاسوز حاتشىسى بورانباي عاليەۆ. سوت ۇكىمى زاڭدى كۇشىنە ەنگەن جوق. جولداسبەك شوپەعۇل. دەرەك, سۋرەت: اتىراۋ وبلىستىق سوتىنىڭ ءباسپاسوز قىزمەتى.