«Digital Qazaqstan» ستراتەگياسى
– بيىلعى ايتۋلى جىلدىڭ ستراتەگيالىق ماڭىزى مەن نەگىزگى قادامى قانداي بولادى؟
– 2026 جىلدى مەملەكەت باسشىسى «تسيفرلاندىرۋ جانە جاساندى ينتەللەكت جىلى» دەپ جاريالادى. ول جي-ءدىڭ زاماناۋي ترەند پەن ەكسپەريمەنت ەمەس, جاڭا تەحنولوگيالىق داۋىردەگى مەملەكەتتىڭ باسەكەگە قابىلەتتى جولى ەكەنىن ناقتى ايتتى. ەلىمىزدە بۇل باعىتتاعى جۇمىستار بۇرىننان جۇرگىزىلىپ كەلەدى. 2024 جىلدان 2029 جىلعا دەيىنگى جاساندى ينتەللەكتىنى دامىتۋ تۇجىرىمداماسى قابىلداندى. وندا جي-ءدى مەملەكەتتىك باسقارۋدا پايدالانۋ, ماماندار دايارلاۋ, دەرەكتەردى قورعاۋ, قاۋىپسىزدىكتى قامتاماسىز ەتۋ جانە ءتۇرلى تاۋەكەلدەردى باسقارۋ سياقتى نەگىزگى مىندەتتەر بەلگىلەنگەن. بۇل قۇجات تەحنولوگيانى جۇيەسىز ەنگىزبەۋگە, ونى سانالى ءارى جاۋاپتى تۇردە دامىتۋعا باعىتتالعان. جاساندى ينتەللەكتىنىڭ ەكونوميكاعا, ەڭبەك نارىعىنا جانە مەملەكەتتىك قىزمەتتەرگە اسەرىن ەسكەرەتىن جاڭارتىلعان «Digital Qazaqstan» ستراتەگياسىن ازىرلەۋ باستالدى. ياعني تسيفرلاندىرۋ تەك تەحنيكالىق جاڭارتۋ ەمەس, ەل دامۋىنىڭ ماڭىزدى فاكتورى رەتىندە قاراستىرىلا باستادى. ماڭىزدى قادامداردىڭ ءبىرى – العاش رەت «جاساندى ينتەللەكت تۋرالى» زاڭنىڭ قابىلدانۋى. بۇل زاڭ الگوريتمدەردىڭ اشىق بولۋىن, ازاماتتاردىڭ قۇقىقتارىن قورعاۋدى, تاۋەكەلدەردى ازايتۋدى جانە جاساندى ينتەللەكتىنى مەملەكەتتىك باسقارۋ, ءبىلىم بەرۋ, دەنساۋلىق ساقتاۋ سياقتى سالالاردا قولدانۋدىڭ نەگىزگى تالاپتارىن انىقتايدى. بيىل تسيفرلىق تەحنولوگيالاردى دامىتۋعا, جاساندى ينتەللەكتىنى قاۋىپسىز ەنگىزۋگە ارنالعان تسيفرلىق كودەكس تە قابىلداندى. بۇل كودەكس الداعى جىلدارى ەلىمىزدىڭ تسيفرلىق دامۋىنا قاتىستى قۇقىقتىق نەگىزدى قالىپتاستىرىپ, قاۋىپسىز ءارى تۇراقتى تسيفرلىق ورتا قۇرۋعا جول اشادى.
– جاساندى ينتەللەكتىنى بارلىق سالاعا جاپپاي ەنگىزۋگە الەۋەتىمىز جەتە مە؟
– بىلتىر شىلدە ايىندا «Alem.cloud» ۇلتتىق سۋپەركومپيۋتەرلىك ورتالىعىندا «Nvidia» چيپتەرى نەگىزىندەگى, ونىمدىلىگى شامامەن 2 ەكزافلوپس (FP8) بولاتىن سۋپەركومپيۋتەر كلاستەرى ىسكە قوسىلدى. كلاستەردىڭ ۇلكەن تىلدىك مودەلدەردى وقىتۋعا, عىلىمي ەسەپتەۋلەر مەن كۇردەلى اناليتيكالىق مىندەتتەردى ورىنداۋعا جەتكىلىكتى كۇش-قۋاتى بار. ايتا كەتۋ كەرەك, الەمدەگى ەڭ ءىرى سۋپەركومپيۋتەرلەردىڭ TOP-500 تىزىمىندە 86-ورىندا تۇرمىز. قاراشا ايىندا كلاستەر رەسۋرستارىن پايدالانۋ ماقساتىندا وتىنىمدەر قابىلدايتىن تسيفرلىق پلاتفورما ىسكە قوسىلعان بولاتىن. ول قازىرگى تاڭدا مەملەكەتتىك ورگاندار, عىلىمي جانە ءبىلىم بەرۋ ۇيىمدارى, ستارتاپتار مەن جەكە كومپانيالارعا قولجەتىمدى.
– بيىل باسىمدىق قاي سالا مەن جوبالارعا بەرىلەدى؟
– وسى جىلى بىرنەشە ماڭىزى زور سالالارعا نازار اۋدارىلىپ وتىر. ەڭ الدىمەن, IT-ونىمدەر مەن قىزمەتتەردى ەكسپورتتاۋدى ىلگەرىلەتۋ, ياعني جاڭا ءوسىم نۇكتەلەرىن قالىپتاستىرۋ كەرەك. ەلىمىز IT-نارىعىن جانە ستارتاپ-ەكوجۇيەنى بەلسەندى تۇردە دامىتىپ كەلەدى. حالىقارالىق رەيتينگتەردە جوعارى ورىندارعا يە: «EGDI» رەيتينگىندە – 24-ورىن, «OSI» بويىنشا – 10-ورىن. ەلدە 2 مىڭنان استام كومپانيا, سونداي-اق يننوۆاتسيالاردىڭ دامۋىنا ىقپال ەتەتىن 20 وڭىرلىك جانە 4 حالىقارالىق حاب جۇمىس ىستەيدى. IT-ەكسپورت كولەمى 1 ملرد دوللارعا جەتتى, ال «Astana Hub» قاتىسۋشىلارىنىڭ كىرىسى 20%-عا ءوسىپ, 800 ملن تەڭگەنى قۇرادى. 100-دەن استام ستارتاپ شەتەل نارىعىنا ءساتتى شىقتى. 2025 جىلى وڭىردەگى العاشقى وتاندىق يۋنيكورن – «Higgsfield.ai» پايدا بولدى. «Qazaqstan Venture Group» ماقساتتى كولەمى 1 ملرد دوللاردى قۇراي وتىرىپ, 115 ملن دوللار تارتتى. بىلتىر شىلدە ايىندا «QVG» وڭىردەگى العاشقى قورلار قورىنا ينۆەستيتسيا سالاتىن «Alem Ventures Fund» قورىن تىركەدى. اقپاراتتىق تەحنولوگيالار سالاسىن ەكونوميكا درايۆەرى رەتىندە دامىتۋعا دا ەرەكشە نازار اۋدارىلىپ وتىر. بۇل باعىتقا قالالارداعى ءومىر ساپاسىن ارتتىرۋ ءۇشىن تسيفرلىق شەشىمدەردى ەنگىزۋ, سونداي-اق كريپتويندۋستريانىڭ وسۋىنە, ودان تۇسەتىن سالىقتىق تۇسىمدەردى ارتتىرۋعا جاعداي جاساۋ كىرەدى.
2026–2028 جىلدارعا ارنالعان سەرپىندى جوبالار ينفراقۇرىلىم مەن ءومىر ساپاسىن وزگەرتۋگە قابىلەتتى وزىق تەحنولوگيالاردى ەنگىزۋگە باعىتتالعان. ولاردىڭ قاتارىندا ءموبيلدى قۇرىلعىلاردى سپۋتنيكتەرمەن تىكەلەي بايلانىستىراتىن «Direct to Cell» تەحنولوگياسى, لوگيستيكانى جەدەلدەتىپ, قىزمەتتەردىڭ قولجەتىمدىلىگىن ارتتىراتىن درون ارقىلى جەتكىزۋ, قاۋىپسىز ءارى اقىلدى كولىكتىڭ جاڭا بۋىنىن قالىپتاستىراتىن جۇرگىزۋشىسىز اۆتوموبيلدەر, سونداي-اق بولاشاقتاعى قالالىق جانە قالاارالىق تاسىمالدىڭ ەلەمەنتى رەتىندە ۇشاتىن اۆتوموبيلدەر بار.
مەجە ۋاقىتىنان بۇرىن ورىندالدى
– كاسىبي مامانسىز ەشبىر سالا العا ىلگەرىلەمەيتىنى انىق. مامان دايارلاۋ ماسەلەسىنە توقتالا كەتسەڭىز؟
– ەلىمىزدە جاساندى ينتەللەكت بويىنشا وقىتۋعا سۇرانىستىڭ جوعارى ەكەنىن, ونىڭ تۇراقتى تۇردە بولاتىنىنا سەنىمدىمىز. وسىعان وراي قاجەتتى كادرلاردى دايارلاۋدىڭ اۋقىمدى جۇيەسىن باستادىق. ءبىز 5 جىل ىشىندە 1 ميلليون ادامدى جي داعدىلارىنا ۇيرەتەمىز دەگەن ماقسات قويعان ەدىك. بۇل كورسەتكىش 1 جىلدىڭ ىشىندە-اق مەجەسىنە جەتىپ قالدى. وتكەن جىلى مەكتەپتەر مەن ۋنيۆەرسيتەتتەردىڭ, ونلاين جانە كاسىبي باعدارلامالاردىڭ ارقاسىندا شامامەن 1 ميلليون ازامات وقىتىلدى. بۇل – ازاماتتاردىڭ جي-گە قىزىعۋشىلىعىنىڭ جوعارى ەكەنىنىڭ كورسەتكىشى. ناقتىلاي كەتسەك, ۋنيۆەرسيتەت سەگمەنتىندە عىلىم جانە جوعارى ءبىلىم مينيسترلىگىنىڭ «AI Sana» باعدارلاماسى ماڭىزدى ءرول اتقاردى. ول تەك بازالىق ءبىلىم بەرۋمەن شەكتەلمەي, ستارتاپتى جەتىلدىرۋ مەن جي-قۇزىرەتتەرىن دامىتۋعا باعىتتالدى. باعدارلاما اياسىندا 570 مىڭنان استام ستۋدەنت وقىتىلدى. سونىمەن قاتار «Tech Orda» جوباسى قولدانبالى IT-كادرلاردى دايارلاۋدى جالعاستىرىپ كەلەدى. باعدارلاما جۇمىس ىستەگەن ۋاقىت ىشىندە 9 مىڭنان استام ستۋدەنت دايارلاندى. قىزىعۋشىلىق ءالى دە جوعارى. 2025 جىلى 34 مىڭنان استام ءوتىنىم ءتۇسىپ, ىرىكتەۋ ناتيجەسىندە 2 600-دەن اسا قاتىسۋشى قابىلداندى.
– مەملەكەت باسشىسى قاسىم-جومارت توقاەۆ قوعامنىڭ جي ساۋاتتىلىعىن ارتتىرۋعا باسىمدىق بەرۋ كەرەك ەكەنىن اتاپ وتكەن ەدى. وسى تۇرعىدا ستۋدەنتتەردەن بولەك توپتاردى وقىتۋ بويىنشا قانداي جۇمىس اتقارىلدى؟
– وتكەن جىلى «Astana Hub» ەلىمىزدەگى العاشقى جاساندى ينتەللەكت مەكتەبى – «Tomorrow School»-دى «peer-to-peer» وقىتۋ مودەلى مەن تاجىريبەلىك جۇمىستارعا نەگىزدەلگەن فورماتتا ىسكە قوستى. بۇگىندە وندا 20-دان استام باعىت بويىنشا 300-دەن استام تىڭداۋشى ءبىلىم الىپ جاتىر. ال وقۋ قاتىسۋشىلارعا تەگىن. بيىلعى اقپان ايىنان «TUMO Astana» 12–18 جاس ارالىعىنداعى جاسوسپىرىمدەرگە ارنالعان تەگىن وقىتۋ باعدارلاماسى جۇزەگە اسىرىلماق. مۇندا ءبىلىم الۋشىلار باعدارلامالاۋ, ديزاين, كرەاتيۆتى تەحنولوگيا, گەنەراتيۆتى جي-ءدى مەڭگەرەدى. بۇگىندە 2 361 ءوتىنىم تىركەلىپ, 1 134 وقۋ شارتى جاسالدى. «TUMO» – حالىقارالىق دەڭگەيدە مويىندالعان قوسىمشا ءبىلىم بەرۋ مودەلى. الەم بويىنشا بۇل مودەلمەن ءبىلىم العان جانە باعدارلامانى مەڭگەرىپ جاتقان بەلسەندى ازاماتتار سانى 100 مىڭنان اسادى. سونداي-اق اقپان ايىنان باستاپ «AI Corporate» – كومپانيالار مەن قىزمەتكەرلەرگە ارنالعان جي-ءدى نولدەن مەڭگەرىپ, بيزنەس-ۇدەرىستەرگە ەنگىزۋ باعدارلاماسى باستالماق. بۇل دا – جي-ءدى مەڭگەرۋدەگى نەگىزگى باعىتتاردىڭ ءبىرى. بۇل رەتتە «AI Qyzmet» – مەملەكەتتىك قىزمەتشىلەرگە ارنالعان باعدارلاماعا دا باسا نازار اۋدارعان دۇرىس. باعدارلاما اقپاراتتى تالداۋ, جوسپارلاۋ, پرەزەنتاتسيا دايىنداۋ, تاپسىرمالاردى اۆتوماتتاندىرۋ, باسقارۋشىلىق شەشىمدى قولداۋ جانە كوپشىلىك الدىندا سويلەۋ سەكىلدى نەگىزگى تاقىرىپتاردى قامتيدى. باعدارلاما اياسىندا 50 مىڭنان استام مەملەكەتتىك قىزمەتشى وقۋدان ءوتتى.
جي جۇمىستىڭ جۇگىن جەڭىلدەتەدى
– مەملەكەتتىك باسقارۋ سالاسى دا قارقىندى تسيفرلاندىرىپ جاتىر. قازىر قانداي جاڭا باستامالار بار؟
– ەلىمىز ءبىر باعىتتى «Smart City» تۇجىرىمداماسىنان «Smart Region» مودەلىنە كوشىپ جاتىر. ويتكەنى ءاربىر ءوڭىردىڭ وزىندىك ەرەكشەلىگى بار. بۇكىل ەل بويىنشا سالىستىرمالىلىق قامتاماسىز ەتەتىن 16 باعىت پەن 90 KPI قامتىلعان بىرىڭعاي ستاندارت بەكىتىلدى. «GOVTech» ەكوجۇيەسىن دامىتۋ اياسىندا ەلدە جاساندى ينتەللەكتىگە نەگىزدەلگەن تسيفرلىق شەشىمدەر كەزەڭ-كەزەڭىمەن ەنگىزىلىپ جاتىر. ولاردىڭ قاتارىندا جي-كولل-ورتالىقتار, ازاماتتارعا ارنالعان ينتەللەكتۋالدى كومەكشىلەر, وتىنىشتەردى اۆتوماتتى وڭدەۋ جۇيەلەرى جانە مەملەكەتتىك ورگاندارعا ارنالعان اناليتيكالىق قۇرالدار بار. بۇل قىزمەت كورسەتۋ ساپاسىن ارتتىرىپ, كۇندەلىكتى ۇدەرىستەردى اۆتوماتتاندىرۋ ارقىلى مەملەكەتتىك ورگاندارعا تۇسەتىن جۇكتەمەنى ازايتۋعا مۇمكىندىك بەرەتىنى ءسوزسىز. جالپى, 2025 جىل – جاساندى ينتەللەكت جانە تسيفرلىق دامۋ مينيسترلىگى ءۇشىن تسيفرلاندىرۋ كەزەڭىنەن جاساندى ينتەللەكتىنى مەملەكەتتى دامىتۋدىڭ نەگىزگى قۇرالدارىنىڭ ءبىرى رەتىندە ەنگىزۋ كەزەڭىنە ءوتۋ جىلى بولدى.
مەملەكەتتىك اقپاراتتىق جۇيەلەردى «QazTech» بىرىڭعاي تسيفرلىق پلاتفورماسىنا كەزەڭ-كەزەڭىمەن كوشىرۋ دە باستالدى. مەملەكەت باسشىسىنىڭ جارلىعىمەن بيىلدان باستاپ پلاتفورمادان تىس اقپاراتتىق جۇيەلەردى ازىرلەۋگە تىيىم سالىندى. بۇل اقپاراتتىق جۇيەلەردى قاۋىپسىز رەجىمدە جىلدام ىسكە قوسۋعا جانە ولاردىڭ ينتەگراتسياسىن جەڭىلدەتۋگە مۇمكىندىك بەرەدى. جوسپاردا مەملەكەتتىك باسقارۋدىڭ تسيفرلىق ترانسفورماتسيالاۋى ماڭىزدى ورىن الادى. باستى مىندەت – دەرەكتەر مەن اۆتوماتتاندىرۋ جانە زاماناۋي تسيفرلىق پلاتفورمالار ارقىلى مەملەكەتتىك ورگانداردىڭ تيىمدىلىگىن ارتتىرۋ.
– قوعام تسيفرلاندىرۋدىڭ مۇمكىندىگىن قانشالىقتى پايدالانا الىپ وتىر؟
– «eGov mobile» قوسىمشاسىن 6,4 ملن پايدالانۋشى قولدانادى. بۇل وتكەن جىلمەن سالىستىرعاندا 2,2 ملن-عا ارتىق. «eGov Business» ىسكە قوسىلىپ, قازىردىڭ وزىندە 4,6 ملن ادامعا قىزمەت كورسەتىپ ۇلگەردى. بيىل «اتامەكەن» ۇكپ-مەن بىرلەسىپ, اكىمدىكتەر مەن تابيعي مونوپوليا سۋبەكتىلەرىنىڭ قىزمەتتەرى, مەملەكەتتىك قولداۋ شارالارى «eGov Business» پلاتفورماسىنا شىعارىلادى, سونداي-اق تاۋەكەلدەردى باسقارۋ جۇيەسى جەتىلدىرىلەتىن بولادى.
ازاماتتار حالىققا قىزمەت كورسەتۋ ورتالىقتارىنا جىل سايىن شامامەن 15 ملن رەت جۇگىنەدى, ونىڭ 80%-ى توپ-10 مەملەكەتتىك قىزمەتكە تيەسىلى. وتكەن جىلى بۇل قىزمەتتەردى تولىق تسيفرلاندىرۋ باستالدى. ولاردىڭ بىرقاتارى تولىقتاي ونلاين فورماتقا كوشىرىلىپ, ناتيجەسىندە حقكو-لارعا كەلۋشىلەر سانى ايتارلىقتاي ازايدى. وسىلايشا, بۇل ورتالىقتار, «Apple Store» فورماتىنا ۇقساس حالىققا ارنالعان تسيفرلىق كەڭسەلەرگە اينالادى. ازاماتتار قىزمەتتەردى وزىنە-ءوزى قىزمەت كورسەتۋ ارقىلى الاتىن بولادى.
ال «الەۋمەتتىك ءاميان» جوباسى اياسىندا 6,7 مىڭ مەكتەپتە تەگىن تاماق ۇيىمداستىرىلىپ, 49 ملن تۇسكى اس بەرىلدى, وسىلايشا 15-30% ارالىعىندا قارجى ۇنەمدەلدى. سونداي-اق «الەۋمەتتىك ءاميان» ازاماتتاردى امبۋلاتوريالىق ءدارى-دارمەكپەن قامتاماسىز ەتۋ شەڭبەرىندە كەپىلدەندىرىلگەن دارىلىك زاتتار پاكەتىن الۋعا مۇمكىندىك بەرەدى. قىزمەت 700-دەن استام مەملەكەتتىك ءدارىحانانى قامتيدى. بىلتىر 17 ملن رەتسەپتىڭ 13,9 ميلليونى تسيفرلىق مەحانيزم ارقىلى بەرىلگەن. بيىل بۇل تاجىريبەنى قوسىمشا تولەم تەتىگىمەن جەكە دارىحانالارعا كەڭەيتۋ جوسپارلانىپ وتىر.
مينيسترلىك تولىق تسيكلدى, ياعني باسىنان اياعىنا دەيىن قىزمەتتەردى ءبىر پلاتفورمادا الۋ ءۇشىن «AlemGPT» مۋلتياگەنتتىك پلاتفورماسىن ازىرلەپ, سىناقتان وتكىزىپ جاتىر. بولاشاقتا «AlemGPT» بارلىق قىزمەت بويىنشا تولىققاندى جي-كومەكشىگە اينالادى.
– جي جۇيەلى تۇردە ەنگىزىلىپ جاتقانىمەن, ءالى كۇنگە دەيىن ەلىمىزدە بايلانىس جوق ەلدى مەكەندەر بار. مۇنداي اۋىلدار ينتەرنەتتىڭ يگىلىگىن قاشان كورەدى؟
– ەلىمىزدىڭ شالعاي وڭىرلەرىن ينتەرنەتپەن قامتاماسىز ەتۋ ءۇشىن سپۋتنيكتىك بايلانىس جوبالارى كەزەڭ-كەزەڭىمەن ىسكە اسىرىلىپ جاتىر. قازىر قازاقستاندا سپۋتنيكتىك ينتەرنەت قىزمەتىن كورسەتەتىن ءۇش وپەراتور جۇمىس ىستەيدى. بۇعان قوسا, تاعى ەكى شەتەلدىك كومپانيانىڭ نارىققا كەلۋى جوسپارلانىپ وتىر, ولارمەن قاناتقاقتى سىناقتار بيىل وتكىزىلەدى. سونىمەن قاتار وسى جىلى «قازاقستان تەمىر جولى» پويىزدارى مەن «Air Astana» اۋە كومپانياسىنىڭ ۇشاقتارىن سپۋتنيك ينتەرنەتىنە قوسۋ كوزدەلگەن. بۇل جولاۋشىلار ءۇشىن جول ۇستىندە دە تۇراقتى بايلانىسقا قول جەتكىزۋگە مۇمكىندىك بەرەدى. قازاقستاننىڭ ەۋروپا مەن ازيا اراسىنداعى ءتيىمدى گەوگرافيالىق ورنالاسۋى حالىقارالىق ينتەرنەت-ترافيك ترانزيتىندە ماڭىزدى ءرول اتقارۋعا جول اشادى. وسى الەۋەتتى كۇشەيتۋ ماقساتىندا كاسپي تەڭىزىنىڭ تۇبىمەن ازەربايجان رەسپۋبليكاسىنا دەيىن وپتيكالىق تالشىقتى كابەل تارتۋ جوباسى جۇزەگە اسىرىلىپ جاتىر. اتالعان جوبانى بيىلعى جىلدىڭ سوڭىنا دەيىن اياقتاۋ جوسپارلانعان.
– قابىلدانعان «جاساندى ينتەللەكت تۋرالى» زاڭ مەن تسيفرلىق كودەكستىڭ جي دامۋىنداعى ءرولى قانداي بولماق؟
– وتكەن جىلى ءبىز «جاساندى ينتەللەكت تۋرالى» زاڭنىڭ قابىلدانۋى باعىتىندا جۇمىس جۇرگىزدىك. بۇل زاڭ ورتالىق ازياداعى العاشقى زاڭ بولىپ, جاساندى ينتەللەكتىنى قاۋىپسىز ءارى جاۋاپتى تۇردە ەنگىزۋدىڭ قۇقىقتىق نەگىزىن قالادى. زاڭ ەكونوميكا مەن قوعامدا جي قولدانۋدىڭ ناقتى ەرەجەلەرىن قالىپتاستىرىپ, يننوۆاتسيا, قاۋىپسىزدىك جانە ازاماتتاردىڭ قۇقىقتارىن قورعاۋ اراسىنداعى تەپە-تەڭدىكتى قامتاماسىز ەتەدى. جاساندى ينتەللەكتىنى ەنگىزۋدەگى ادامعا بەيىندى ءتاسىلدى ەسكەرگەن العاشقى ەلدەردىڭ ءبىرىمىز. قۇجات جي-ءدى پايدالانۋدا ەتيكالىق, اشىق جانە جاۋاپتى پايدالانۋ قاعيداتتارىن بەكىتەدى. جۇيەلەر تاۋەكەل دەڭگەيىنىڭ اۆتونومدىلىق دارەجەسىن جانە قولدانۋ رەجىمى بويىنشا جىكتەۋدى ەنگىزەدى جانە ءتۇرلى مانيپۋلياتسيالار مەن كەمسىتۋشىلىككە تىيىم سالادى. ال تسيفرلىق كودەكستىڭ نەگىزگى ءرولى – ازاماتتاردىڭ تسيفرلىق قۇقىقتارىن قورعاۋ جانە جاڭا بۋىنداعى تسيفرلىق مەملەكەتكە كوشۋدىڭ زاڭدىق نەگىزىن قالىپتاستىرۋ. وسى ارقىلى ءبىز تسيفرلاندىرۋدى جۇيەلى باسقارۋعا كوشەمىز دەگەن ءسوز.
اڭگىمەلەسكەن –
ايتولعان ءجۇنىسحان,
«Egemen Qazaqstan»
