سىرتقى ىستەر مينيسترلىگى مالىمدەگەندەي, 30 كۇنگە دەيىنگى تەگىن تۋريستىك جانە مەديتسينالىق ۆيزا رەسىمدەۋ بىردەن كۇشىنە ەندى. ەل ازاماتتارى ۇندىستانعا تەگىن ۆيزانى e-Visa ونلاين جۇيەسى ارقىلى نەمەسە استانا, الماتى جانە شەتەلدەگى ءۇندىستان ديپلوماتيالىق وكىلدىكتەرىندە راسىمدەي الادى. وسى ورايدا, ءسىم ۆيزاعا ءوتىنىشتى مەملەكەتتىك قىزمەتتەر ارقىلى عانا بەرۋدى ەسكە سالادى.
ۆيزا الۋدى جەڭىلدەتۋ ەكىجاقتى تۋريستەر اعىنىن ارتتىرىپ, ءۇندىستاندى ەل ازاماتتارىنا قولجەتىمدى باعىتقا اينالدىرۋعا مۇمكىندىك بەرمەك. ال ءۇندىستان ازاماتتارىنا قازاقستاندا ۆيزاسىز 14 كۇنگە دەيىن بولۋىنا رۇقسات ەتىلگەن.
ايتا كەتسەك, ءۇندىستاننىڭ قازاقستانداعى ەلشىسى سايلاس تانگال ەلىمىزگە 2025 جىلى ءۇندىستاننان شامامەن 250 مىڭ تۋريست كەلگەنىن مالىمدەدى.
«تۋريزم, سونىڭ ىشىندە مەديتسينالىق جانە ساۋىقتىرۋ ءتۋريزمى ىنتىماقتاستىقتىڭ بولاشاعى زور باعىتىنا اينالادى. 2025 جىلى قازاقستانعا كەلگەن ءۇندى ازاماتتارىنىڭ سانى 250 مىڭ ادامعا جەتتى», دەدى ديپلومات.
ەلىمىز كەيىنگى جىلدارى ءۇندىستاننىڭ مەديتسينالىق تەحنولوگيالار, فارماتسەۆتيكالىق ءوندىرىس, تەلەمەديتسينا مەن ءداستۇرلى مەديتسينا سالاسىنداعى تاجىريبەسىنە قىزىعۋشىلىق تانىتىپ كەلەدى. دەنساۋلىق ساقتاۋ ءمينيسترى اقمارال ءالنازاروۆا ءۇندىستان ەلشىسىمەن كەزدەسۋدە ءۇندى ەلىمەن فارماتسەۆتيكا سالاسىنداعى كەلىسسوز جۇرگىزىلىپ جاتقانىن ايتتى. ۇكىمەت تاراتقان مالىمەتكە سايكەس قازىر ەلىمىزدە ءۇندى كومپانيالارى شىعارعان 965 دارىلىك زات پەن 248 مەديتسينالىق بۇيىم تىركەلگەن.
جالپى, ءۇندىستان ءتاج-ماحال سىندى ساۋلەت ونەرىنىڭ جاۋھارىمەن الەمگە تانىمال. جىلىنا ونداعان ميلليون تۋريست تاماشالايتىن تاڭعاجايىپ ماۆزولەيدى وسىدان ءتورت عاسىر بۇرىن 1631 جىلى موعول پاتشاسى شاح جاحان جارى مۋمتاز ماحالعا ارناپ سالدىرتقان. ءتاج-ماحال ۋتتار-پرادەش شتاتىنىڭ اگرا قالاسىندا ورنالاسقان. اق ءمارماردان سالىنعان كەسەنەنىڭ سىرتى مەن ءىشى جارتىلاي اسىل تاستارمەن بەزەندىرىلگەن. كەسەنەنىڭ ەكى جاعىندا مەشىت پەن قوناقۇي ورنالاسقان.
ءتاج-ماحالعا باراردا اۋەلى دەليگە جەتىپ الۋ قاجەت. بۇگىندە ءۇندىستان مەن قازاقستان اراسىندا اپتاسىنا 15 تىكەلەي رەيس قاتىنايدى. دەلي مەن ءتاج-ماحال ورنالاسقان اگرا قالاسىنىڭ اراسى 239 شاقىرىم.
سونداي-اق ۇندىستانداعى جاممۋ كاشمير شتاتىنىڭ باس قالاسى سريناگار قازاق پەن ءۇندى ەلىن بايلانىستىراتىن التىن كوپىرگە اينالارى ءسوزسىز. ارينە, بۇعان دەيىن دە وسى ايماققا ەلىمىزدىڭ ءىرى تۇلعالارى ءجيى ات باسىن بۇرعان, ەندى كاشمير ايماعىنا وتانداستارىمىز ەركىن ساياحاتتاي الادى.
سريناگار قالاسىندا ايگىلى تاريحشى, ادەبيەتشى, موعولستان مەن وعان ىرگەلەس ەلدەردىڭ تاريحى تۋرالى اسا قۇندى دەرەكتەر جيناقتالعان «تاريحي راشيدي» كىتابى مەن «جاھانناما» داستانىنىڭ اۆتورى مۇحاممەد حايدار دۋلاتي جەرلەنگەن. مۇحاممەد حايدار دۋلاتي جازعان دەرەكتەردىڭ ارقاسىندا قازاق حاندىعىنىڭ قۇرىلۋ تاريحىن 1465 جىلدان باستالادى دەپ ەسەپتەيمىز.
ۇلى موعولدار يمپەرياسىنىڭ سۇلتاندارى جەرلەنگەن «مازار-ي-سالاتين» قورىمىندا تاريحي تۇلعانىڭ كەسەنەسى 2018 جىلى جاڭارتىلعان. باق-تا جاريالانعان اقپاراتقا سايكەس زيرات باسىندا ۋردۋ جانە اعىلشىن تىلىندە جازىلعان تاقتاتاس بار. بۇل اقپاراتتىق تاقتا 2015 جىلدىڭ قىركۇيەك ايىندا ورناتىلعان.
«بيىكتەن تومەنگە سريناگارعا قاراپ تۇرمىز. كاشمير جازىعىنىڭ ەنى 20, ال ۇزىندىعى 200 شاقىرىمداي دەسەدى. سريناگاردىڭ بيىكتەن دە كوركەم كورىنەتىنىن بايقادىق. وسى جەردە, ارينە, مۇحاممەد حايداردىڭ دا ات باسىن تىرەپ, كاشميردىڭ سۇلۋلىعىنا, كوركەم تابيعاتىنا ءتانتى بولعاندىعىنا كۇمان جوق. ۇلى عالىم جەرلەنگەن «مازار-ي-سالاتين» – «سۇلتاندار زيراتى» گيمالايدان باستاۋ الاتىن جەلام وزەنىنىڭ بۇرالاڭداپ اعاتىن تۇسىندا. ول جەرگە ەسكى شاھارداعى ءبىر كوشەنى جارىپ ءوتىپ جەتتىك. «مازار-ي ءسالاتيندى» 1997 جىلى جەلتوقساندا وسىندا ارنايى كەلگەنىمدە كورگەنمىن. مۇحاممەد حايداردىڭ زيراتىن وسى قابىرستاننىڭ سولتۇستىك جاعىنداعى بيىكتەۋ جەردەن تاپقانمىن», دەپ كاشمير ساپارىنان ەستەلىك قالدىرعان ەدى ءابساتتار قاجى دەربىسالى «Egemen Qazaqstan» گازەتىندە جاريالانعان «گيمالاي اسقان قازاقتار» اتتى ماقالاسىندا. ايتا كەتسەك, 1540–1551 جىلدارى كاشمير پاتشاسى بولعان مىرزا حايدار ءدۋلاتيدىڭ زيراتىن ءابساتتار قاجى دەربىسالى 1994 جىلى كاشميردەن ىزدەپ تاپقان.
سونداي-اق دىنمۇحامەد قوناەۆ ء«وتتى داۋرەن وسىلاي» دەگەن كىتابىندا 1955 جىلدىڭ 16 ماۋسىمىندا ءۇندىستان پرەمەر-ءمينيسترى دجاۆاحارلال نەرۋ قىزى ينديرا گانديمەن بىرگە الماتىعا كەلگەن ساپارىنان ەستەلىك جازعان ەدى. اۆتور قۇرمەتتى مەيمانداردىڭ: «مىناۋ ءبىزدىڭ كاشمير عوي؟», دەپ تاڭعالعانىن جازادى.
جالپى, ءۇندىستان – كورىكتى جەرلەرىمەن ەرەكشەلەنەتىن, باي مادەني مۇراسى بار ەلدەردىڭ ءبىرى. تاريح پەن مادەنيەت توعىسقان ەلدە تۋريستەرگە ات باسىن تىرەيتىن ورىندار كوپ. ماسەلەن, «قىزعىلت قالا» اتانعان دجايپۋر شتاتىنىڭ استاناسى رادجاستحاندا حاۆا-ماحال (جەل سارايى), امبەر فورت, سيتي پالاس, دجانتار مانتار وبسەرۆاتورياسى سەكىلدى تاريحي نىساندار ورنالاسقان. سونداي-اق الەم ەلدەرىنىڭ تۋريستەرى ءۇندىستاننىڭ ەڭ كونە جانە قاسيەتتى قالالارىنىڭ ءبىرى ۆارناسيگە (ۋتتار-پرادەش) كوپتەپ اعىلادى. بۇل قالا – گانگ وزەنىنىڭ بويىندا ورنالاسقان, ۇندىلەردىڭ ءدىني ورتالىعى. مۇندا كەلگەن تۋريستەر گانگتا تاڭەرتەڭگى عيبادات راسىمدەرىن تاماشالاي الادى.
قازىر ەلىمىزدە ءۇندى مادەنيەتى يوگا, ءۇندى كينوسى, كلاسسيكالىق بي مەن مۋزىكا ارقىلى كەڭىنەن تانىمال بولسا, ءۇندىستاندا قازاق ەلى مادەني فەستيۆالدار مەن كونتسەرتتەر ارقىلى تانىستىرىلىپ كەلەدى.
تۋريستىك اگەنتتىكتەردىڭ مالىمەتىنە سۇيەنسەك, قازىر ءۇندىستاننىڭ ۋتتاراكحاند شتاتىنداعى ريشيكەش پەن حاريدۆار قالالارىنا تۋريستەردىڭ قىزىعۋشىلىعى جىل سايىن ارتىپ كەلەدى. ريشيكەش گيمالاي تاۋلارىندا ورنالاسقان, يوگا مەن مەديتاتسيا ورتالىعى رەتىندە تانىمال قالا بولسا, حاريدۆار – ءۇندى ءدىنىن ناسيحاتتايتىن قاسيەتتى قالالاردىڭ ءبىرى. بۇل ەكى قالا دا گانگ وزەنىنىڭ بويىندا ورنالاسقان.
ەلىمىزدىڭ ازاماتتارىنا ارنالعان 30 كۇندىك ۆيزاسىز رەجىم تۋريزم, مادەنيەت, دەنساۋلىق ساقتاۋ سالالارىن ودان ءارى دامىتۋعا سەرپىن بولماق.
