قوبىز ۇنىندە تىلسىم سىر بار. ونى تىڭداعاندا عاسىرلار قويناۋىنداعى بابالاردىڭ كونە سارىنىن ەستىگەندەي بولاسىڭ. تالانتتى ونەرپازدىڭ كەشىندە وسىنداي كۇيدى باستان كەشتىك. كونتسەرت بارىسىندا جۇرتشىلىق قوبىزدىڭ باي تاريحىمەن تانىسىپ, جىلى اسەرگە بولەندى. سونداي-اق كەش يەسى قورقىت, ىقىلاس, تاتتىمبەتتىڭ تۋىندىلارىن ناقىشىنا كەلتىرىپ تارتتى.
جالپى, قوبىز – تۇركى حالىقتارىنا ورتاق مۋزىكالىق اسپاپ. سوندىقتان بۇل كونتسەرتتە تاتار, قاراقالپاق, تاعى باسقا تۇركى حالىقتارىنىڭ شىعارمالارى دا ورىندالدى.
باعدارلامانىڭ ماقساتى – قوبىز ونەرىن دارىپتەپ, ونىڭ ورىنداۋشىلىق مۇمكىندىگىن دامىتۋ. بۇرىن قوبىزدى باقسىلىق داستۇرمەن بايلانىستىراتىن.
ماقسات مەدەۋبەك بۇگىندە قوبىز اسپابى زاماناۋي تالاپقا ساي اكادەميالىق باعىتتا دامۋدا ەكەنىن ايتتى.
«قازىر قوبىزبەن انتونيو ۆيۆالدي, ۆولفگانگ امادەي موتسارت, يوزەف گايدن, يوگان سەباستيان باح سىندى الەمگە ايگىلى كومپوزيتورلاردىڭ شىعارمالارىن ورىنداۋعا بولادى. سونىمەن قاتار ەسترادالىق جانردا دا قوبىزدىڭ الەۋەتى زور. بۇل اسپاپ ارقىلى جەڭىل كاۆەرلىك تۋىندىلاردى ورىنداپ, كەڭ اۋديتورياعا ناسيحاتتاۋعا مۇمكىندىك مول», دەيدى ول.
قىسقاسى, ونەر كەشىنە كەلگەن كورەرمەن دارىندى قوبىزشىنىڭ ورىنداۋىنداعى كۇيلەردى تىڭداپ, رۋحاني دەمالدى.
