پرەزيدەنت ءوز سوزىندە قازىر ەلىمىزدە 1 ۇلتتىق جانە 20 ايماقتىق فرونت-وفيس تابىستى جۇمىس ىستەپ تۇرعانىن ەسكە سالدى. ونىڭ ايتۋىنشا, ەرىكتىلەردىڭ سانى دا ارتىپ كەلەدى. 2020 جىلى قازاقستاندا 50 مىڭ ۆولونتەر بار ەدى. قازىر ولاردىڭ قاتارى 300 مىڭ ادامعا جەتكەن. ەلگە پايدالى جۇمىسپەن اينالىساتىن ۇيىمداردىڭ سانى ءتورت ەسەگە جۋىق ءوسىپ, 800-دەن استى.
قاسىم-جومارت توقاەۆ ۆولونتەرلەر فورۋمىندا ءسوز سويلەدى
«قازىرگى تاڭدا ەرىكتىلەرىمىز ەكولوگيا, ءبىلىم, مادەنيەت جانە باسقا دا سالالار بويىنشا ماڭىزدى باستامالار كوتەرۋدە. سونىڭ ىشىندە «جاس اعاش», «ەكو باقىلاۋ», ء«بىلىم ۆولونتەرلەرى» جوبالارىن ەرەكشە اتاپ وتۋگە بولادى. وسىنداي ءىس-شارالارعا 100 مىڭعا جۋىق ەرىكتى قاتىستى. ءار باستامانىڭ ەلگە, قوعامعا بەرەر پايداسى مول. مەن وزدەرىڭىز سياقتى جاسامپاز جاستارعا زور ءۇمىت ارتامىن. ءبىز ءبارىمىز ءبىر ەل بولىپ, اۋقىمدى شارۋا اتقاردىق. ەندى توقتاماي, تەك قانا العا قاراي ءجۇرۋ ءۇشىن زامان اعىمىنا ساي بولۋ وتە ماڭىزدى», دەدى مەملەكەت باسشىسى.
ەسكە سالايىق, بۇگىن پرەزيدەنت يسپانيا كورولى VI فەليپەنى تۋعان كۇنىمەن قۇتتىقتاپ, جەدەلحات جولدادى.
