وبلىستىق اۋىل شارۋاشىلىعى باسقارماسىنىڭ دەرەگىنە سۇيەنسەك, مال سانىن كوبەيتۋ باعىتىنداعى جۇمىستار جۇيەلى جالعاسۋدا. وتكەن جىلى «اگرارلىق نەسيە كورپوراتسياسى» ارقىلى 3,3 ملرد تەڭگە قارجى ءبولىنىپ, ناتيجەسىندە 12,1 مىڭ باس جىلقى, ءىرى قارا جانە ۇساق مال ساتىپ الىنعان.
سونىمەن قاتار بورداقىلاۋ الاڭدارىنىڭ قۋاتتىلىعىن ارتتىرۋ ماقساتىندا اتالعان كورپوراتسيا 5 پايىزدىق جەڭىلدەتىلگەن مولشەرلەمەمەن ەكى جاڭا نەسيەلەۋ باعدارلاماسىن ىسكە قوستى. العاشقى باعدارلاما اياسىندا اقسۋ, الاكول اۋداندارى مەن تالدىقورعان قالاسىنداعى ءۇش بورداقىلاۋ الاڭىنا جالپى كولەمى 1,5 ملرد تەڭگە نەسيە بەرىلدى. ەكىنشى باعدارلاما بويىنشا قارجىلاندىرۋ كوكتەم مەزگىلىندە باستالماق. قازىرگى تاڭدا وڭىردە 29,2 مىڭ ءىرى قاراعا ەسەپتەلگەن 72 بورداقىلاۋ الاڭى جۇمىس ىستەيدى.
جەكەمەنشىك ينۆەستيتسيا دا نازاردان تىس ەمەس. ماسەلەن, «NAT AGRO» جشس ءوز قاراجاتى ەسەبىنەن 1,5 ملرد تەڭگەگە 2 مىڭ باسقا ارنالعان بورداقىلاۋ الاڭىنىڭ قۇرىلىسىن اياقتاعان. كاسىپورىن جىلىنا 1 500 توننا ەت ءوندىرۋدى جوسپارلاپ وتىر.
جالپى, 2026 جىلى مال شارۋاشىلىعى سالاسىنا بولىنەتىن سۋبسيديا كولەمى وتكەن جىلمەن سالىستىرعاندا ەكى ەسەگە ۇلعايتىلۋى — سالاعا دەگەن مەملەكەتتىك قولداۋدىڭ ارتا تۇسكەنىن اڭعارتادى. بۇل شارالار ءوڭىردىڭ ازىق-ت ۇلىك قاۋىپسىزدىگىن نىعايتىپ قانا قويماي, اۋىل ەكونوميكاسىنىڭ دامۋىنا سەرپىن بەرمەك.
