فوتو: pinterest.com
ماسەلە پرەمەر-مينيستر ولجاس بەكتەنوۆ وتكىزگەن شەتەلدىك ينۆەستورلار كەڭەسىنىڭ ارالىق وتىرىسىندا قارالدى. جيىندا دەنساۋلىق ساقتاۋ ءمينيسترى اقمارال ءالنازاروۆا سالانى دامىتۋ بويىنشا اتقارىلىپ جاتقان جۇمىستار تۋرالى باياندادى.
ءدارى-دارمەكتەر مەن مەديتسينالىق قىزمەتتەردىڭ تىزبەسى ققس-تان بوساتىلدى
ءمينيستردىڭ ايتۋىنشا, ۇزاقمەرزىمدى دەموگرافيالىق بولجامدار مەن الداعى 10-15 جىلدا ەلدە دارىلىك زاتتارعا سۇرانىس كولەمىن ەسكەرە وتىرىپ, ينۆەستورلارمەن بىرلەسكەن جاڭا تەتىكتەر ازىرلەنگەن. سونىڭ ناتيجەسىندە ينۆەستيتسيالار تۋرالى كەلىسىمدەردىڭ جاڭارتىلعان فورماتى ەنگىزىلىپ, ول سالىقتىق جانە كەدەندىك جەڭىلدىكتەرمەن قاتار ينفراقۇرىلىمدىق قولداۋدى جانە ءونىمدى وتكىزۋدىڭ ۇزاقمەرزىمدى كەپىلدىكتەرىن قامتيدى.
«بۇگىندە ۇكىمەت وتىرىسىندا جالپى قۇنى 620 ملن اقش دوللارىن نەمەسە 316 ملرد تەڭگەنى قۇرايتىن 6 ينۆەستيتسيالىق جوبا ماقۇلداندى. بۇل, ەڭ الدىمەن, قازاقستاننىڭ ءدارى-دارمەكپەن قامتۋداعى دەربەستىگىن كۇشەيتۋگە باعىتتالعان قادام. الداعى 2-4 جىلدا ەلىمىزدە 400-دەن استام جاڭا دارىلىك زاتتار وندىرىلەدى», دەدى اقمارال ءالنازاروۆا.
سونداي-اق سوڭعى ەكى جىلدا فارماتسەۆتيكا سالاسىنا تارتىلعان ينۆەستيتسيا كولەمى ايتارلىقتاي وسكەنى اتاپ ءوتىلدى. بۇل كورسەتكىش 47 ملن دوللاردان 87 ملن دوللارعا دەيىن, ياعني ەكى ەسەگە جۋىق ارتقان. جاڭا جوبالار اياسىندا مىڭنان استام جاڭا جۇمىس ورنىن اشۋ كوزدەلىپ وتىر.
سالاداعى جۇيەلى جۇمىستار فارماتسەۆتيكالىق جانە مەديتسينالىق ونەركاسىپتى دامىتۋدىڭ 2030 جىلعا دەيىنگى تۇجىرىمداماسى شەڭبەرىندە جالعاسىن تابادى. بۇگىندە قازاقستاندا فارماتسەۆتيكا ءۇشىن كادر دايارلاۋدىڭ تولىققاندى جۇيەسى قالىپتاسقان. بۇل باعىتتا مەملەكەتتىك قولداۋ كورسەتىلىپ, دۋالدى ءبىلىم بەرۋ تەتىكتەرىن دامىتۋعا ەرەكشە ءمان بەرىلىپ وتىر.
جاڭا 4 فارماتسەۆتيكالىق زاۋىت سالىنادى: ەلىمىزدە قانداي ءدارى-دارمەكتەر وندىرىلەدى؟
بۇدان بولەك, 1 قاڭتاردان باستاپ تەگىن مەديتسينالىق كومەكتىڭ كەپىلدەندىرىلگەن كولەمى جانە ءمامس اياسىندا ءدارى-دارمەكتەر مەن مەديتسينالىق قىزمەتتەردى يمپورتتاۋ جانە وتكىزۋ قوسىلعان قۇن سالىعىنان بوساتىلدى. سونىمەن قاتار جالعان پرەپاراتتاردىڭ اينالىمىنا باقىلاۋدى كۇشەيتۋ جانە جاۋاپكەرشىلىكتى ارتتىرۋعا باعىتتالعان زاڭنامالىق تۇزەتۋلەر ازىرلەنگەن. بۇل شارالار ىشكى نارىقتى قورعاپ, ساپالى ءارى قاۋىپسىز ءدارى-دارمەكپەن قامتاماسىز ەتۋگە مۇكىندىك بەرەدى.
