وڭىرلىك كوممۋنيكاتسيالار قىزمەتى الاڭىندا الماتى قالاسى ءبىلىم باسقارماسىنىڭ ستراتەگيا جانە كاسىپتىك ءبىلىم بەرۋ ءبولىمىنىڭ باسشىسى ەرىك ابىشاەۆ تەحنيكالىق جانە كاسىپتىك ءبىلىم بەرۋ (تجكب) جۇيەسىن مەملەكەتتىك قولداۋ مەن كوللەدج ينفراقۇرىلىمىن دامىتۋ بارىسى تۋرالى بايانداپ, بيىل تجكب جۇيەسىنىڭ بيۋدجەتى 53,3 ملرد تەڭگەنى قۇرايتىنى اتاپ ءوتتى.
بۇل تەگىن ءبىلىم الۋعا قولجەتىمدىلىكتى كەڭەيتىپ, ستۋدەنتتەرگە الەۋمەتتىك قولداۋدى كۇشەيتۋگە مۇمكىندىك بەرەدى.
«تەحنيكالىق جانە كاسىپتىك ءبىلىم بەرۋ سالاسىنداعى مەملەكەتتىك ساياسات ءار ستۋدەنتتىڭ ءۇي-ىشىنە سالماق سالماي, سۇرانىسقا يە بولىپ وتىرعان ماماندىقتى وقىپ, ولاردىڭ بارىنشا ءبىلىم الىپ, ءجۇرىپ-تۇرۋىنا قاجەتتى جاعداي جاساۋعا باعىتتالعان», دەدى ەرىك ابىشاەۆ.
قازىر الماتىداعى 88 كوللەدجدە 86 مىڭنان استام ستۋدەنت ءبىلىم الىپ جاتىر. ولاردىڭ 50 پايىزدان استامى مەملەكەتتىك ءبىلىم بەرۋ تاپسىرىسى اياسىندا تەگىن وقيدى. بىلتىر مەملەكەتتىك تاپسىرىس بويىنشا 17 491 ستۋدەنت قابىلدانىپ, الدىنعى جىلمەن سالىستىرعاندا جوعارى كورسەتكىشتى كورسەتتى.
«بۇل ءار جاستىڭ ءۇي-ىشىنە سالماق سالماي, ساپالى كاسىپتىك ءبىلىم الۋىنا ناقتى مۇمكىندىك بەرەتىن قادام. كادر دايارلاۋ ەكونوميكانىڭ باسىم سالالارى بويىنشا 131 ماماندىق پەن 220 بىلىكتىلىكتى قامتيدى, بۇل جاستاردىڭ ەڭبەك نارىعىندا سۇرانىسقا يە قۇزىرەتتەردى مەڭگەرۋىنە جول اشادى», دەدى سپيكەر.
كوللەدجدەر ينفراقۇرىلىمىن دامىتۋعا دا ەرەكشە كوڭىل بولىنگەن. بىلتىر مەملەكەتتىك كوللەدجدەردى جوندەۋ مەن جابدىقتاۋعا جەرگىلىكتى بيۋدجەتتەن 2,4 ملرد تەڭگە ءبولىندى. الەۋمەتتىك ارىپتەستەردىڭ ەسەبىنەن ءتورت كوللەدجدىڭ ماتەريالدىق-تەحنيكالىق بازاسى دا 538 ملن تەڭگەگە جاڭارتىلدى.
الماتىداعى كوللەدج ستۋدەنتتەرى سونداي-اق شەتەلدە پراكتيكادان ءوتىپ جاتىر. ەرىك ابىشاەۆتىڭ ايتۋىنشا, كوللەدجدەر ءوندىرىس ورىندارىمەن تىعىز بايلانىسىپ ءبىلىم بەرەدى. قازىر 22 مىڭنان استام ستۋدەنت, ياعني تەگىن وقيتىنداردىڭ 43,7 پايىزى وسى دۋالدى وقىتۋ جۇيەسى بويىنشا ءبىلىم الىپ جاتىر. بۇل مودەلدى ىسكە اسىرۋ ماقساتىندا 71 ماماندىق بويىنشا 770 كاسىپورىنمەن كەلىسىمشارت جاسالعان.
2025 جىلدىڭ قورىتىندىسى بويىنشا كوللەدج تۇلەكتەرىن جۇمىسقا ورنالاستىرۋ دەڭگەيى 94,3 پايىزدى قۇراپ, 17 مىڭنان استام تۇلەك تۇراقتى جۇمىسقا ورنالاسقان. سونىمەن قاتار, شەتەلدىك سەرىكتەستەرمەن ىنتىماقتاستىق اياسىندا الماتىنىڭ التى كوللەدجىنەن 110 ستۋدەنت قىتايدا, تاعى 16 ستۋدەنت گەرمانيانىڭ كاسىپورىندارىندا اقىلى وندىرىستىك پراكتيكادان ءوتىپ قايتتى.
سونىمەن قاتار قالاداعى مەملەكەتتىك كوللەدجدەردە WorldSkills ستاندارتتارى بويىنشا دەمونستراتسيالىق ەمتيحانى ەنگىزىلگەن.
