فوتو: اقوردا
قاسىم-جومارت توقاەۆ Higgsfield AI ستارتاپىنىڭ تەحنيكالىق ديرەكتورى ەرزات دۋلاتپەن جانە MA7 Ventures ۆەنچۋرلىك پلاتفورماسىنىڭ نەگىزىن قالاۋشى مۇرات ابدىراحمانوۆپەن كەزدەسىپ, جاساندى ينتەللەكتىنى ەكونوميكاعا, مەملەكەتتىك باسقارۋ ىسىنە جانە الەۋمەتتىك سالاعا جۇيەلى تۇردە ەنگىزۋ, سونداي-اق IT-كاسىپكەرلىكتى, ۆەنچۋرلىك جانە AI-يندۋستريانى دامىتۋ ماسەلەلەرىن تالقىلادى.
پرەزيدەنت Higgsfield AI ستارتاپىنىڭ جەتىستىگىن جوعارى باعالاپ, ەلىمىزدە جاساندى ينتەللەكت سالاسىندا جاھاندىق كوشباسشى سانالاتىن كومپانيانىڭ قۇرىلۋى زور تابىس ەكەنىن ايتتى.
مەملەكەت باسشىسىنىڭ ايتۋىنشا, قازاقستان IT سالاسىنداعى كومپانيالار تەز ارادا ىسكە قوسىلىپ, قارقىندى تۇردە دامىپ, الەمدىك نارىققا شىعاتىن الاڭعا اينالۋى قاجەت. بۇل – نەگىزگى مىندەت.
ەرزات دۋلات Higgsfield كومانداسىنىڭ 95 پايىزى قازاقستان ازاماتتارىنان قۇرالعانىن, بۇل جاستاردىڭ الەۋەتىن تانىتاتىنىن جەتكىزدى. سونىمەن قاتار ول AI-يندۋسترياعا قاجەتتى كادر دايارلاۋ جانە بىرلەسكەن ءبىلىم بەرۋ باستامالارىن جۇزەگە اسىرۋ ىسىندە مەملەكەتپەن سەرىكتەس بولۋعا دايىن ەكەنىن راستادى.
مۇرات ءابدىراحمانوۆ ۆەنچۋرلىك يندۋستريا مەملەكەتتەردىڭ تەحنولوگيالىق دامۋىنىڭ تەتىگى سانالاتىنىنا توقتالدى. بۇل ورايدا قازاقستاننىڭ جاھاندىق ۆەنچۋرلىك يندۋستريانىڭ تولىق قاتىسۋشىسى بولۋعا مۇمكىندىگى زور.
ايتا كەتەيىك, مەملەكەت باسشىسى قاسىم-جومارت توقاەۆ قارجىلىق مونيتورينگ اگەنتتىگىندە جيىن وتكىزدى. جيىندا پرەزيدەنت مەملەكەت قارجىسىن جىمقىرۋشىلاردىڭ ارەكەتى ەش اقىلعا سىيمايتىنىن, الەۋمەتتىك سالادا قالىپتاسقان قارجىلىق جاعدايدى رەتكە كەلتىرۋ كەرەك ەكەنىن ايتتى.
سونداي-اق ق.توقاەۆ جيىن سوڭىندا قىزمەتتىك بورىشىن ۇلگىلى اتقارعانى ءۇشىن قارجىلىق مونيتورينگ اگەنتتىگىنىڭ ءبىر توپ قىزمەتكەرىن مەملەكەتتىك ناگرادامەن ماراپاتتادى.
